Jesaja 31:2 - O Debleskro Lab 2024 (Sinte-Manouche)

² Ninna yob hi gosevo oun djinell hoy lo krell. Yob bičrell i bibarht, oun lell gar peskre laba pale, kolentsa yob len trad das. I čilačen dell lo i phagi oun ninna kolen, kay lenge ap i rig van.

O Debleskro Drom 2021 (Sinte)

² Ninna job hi gosewo un djinell hoi lo krell. Job bitchrell i bibacht, un lell gar peskre laba pale, kolentsa job len trad das. I tchilatchen dell lo i phagi un ninna kolen, kai lenge ap i rig wan.

Jesaja 31:2 ပူးပေါင်းရင်းမြစ်များ

Hiob 12:13

O Debles hi gosvepen oun ninna zoor. Yob hayvell halauter, oun nay penell, hoy te vell kerdo.

Hiob 12:16

Pash leste hi i zoor oun o čačo gosvepen. Les hi ninna i zoor pral koleste, kay perell o čačo dromestar tele, oun pral koleste, kay anell les o čačo dromestar tele.

Hiob 5:13

Yob taprell i goseven an pengro gosvepen. Oun kova, hoy kolla douy čipyentsa mank pende vin kran, kova moukell lo gar te djal.

Jesaja 1:4

T'menge djal djoungelo, t'mer čilače menshe, kay anan yaake boud doosh ap t'mende! T'mer han bede, čave, kay molenn či! T'mer moukan o baro Debles, kamenn či bouder te djinell o Israeleskro Deblestar, kay kokres o Devel hi, oun sikran leske t'maro doumo.

Jesaja 14:20

Tou kral tiro them paash, oun maral i menshen an tiro them. Doleske veh tou gar paskedo har kol vavar raya, kay an barrengre khera paskedo van. Oun tiri čilači familya vell bistedo hako tsireske.

Jesaja 21:17

Oun kol morshendar dran Kedar, kay hayvenn mishto o bogeha karye te dell, ačenn gar boud pral. Kova penau me, o baro Devel, koon o Israeleskro Devel hi.

Jesaja 22:14

Ap mande penas o baro Devel, ko ray pral o bolepen oun i phoub: “Kaya doosh vell lendar gar krik lino yaake rah har djivenn le.”

Jesaja 28:21

O baro Devel stell pre, har kras lo pash i berga Perassim, oun vell rhoyedo har an i tala Gibeon, te krell lo lauter, hoy yob peske glan las. Oun kova hoy yob kanna krell, hayvenn t'mer gar. Kova vell t'menge yaake glan, har te vals gar lestar.

Jesaja 28:29

Ninna kava djal vin o baro Deblestar, ko rayestar pral o bolepen oun i phoub. Kova, hoy yob peske glan las, hi yaake shoukar, te ačell menge o rakepen krik. Oun leskro gosvepen hi baro.

Jesaja 30:3

Kova djal t'menge gar mishto. O Farao nay rikrell gar peskre vasta pral t'mende. O them Egiptia nay vell gar t'maro khatepen. T'mer hounte djan khere i ladjah.

Jesaja 30:7

Kova lauter hi čičeske. Hoy i Egiptarya nay krenn, hi či moldo. Doleske penau ap o them Egiptia: Tou hal i Rahab, kay ačell beshdo oun krell či.

Jesaja 31:3

I Egiptarya hi menshe oun kek debla. Oun lengre graya hi firhe, – len hi kek debleskri zoor. Ap ko tsiro, kay hadell o baro Devel peskro vast pre, te dell lo len, perenn kolla, kay van i vavarenge ap i rig, khetne kolentsa. Oun khetne merenn le.

Jesaja 32:6

Ko dinelo mensho rakrell dinlepen. Oun an leskro dji hi djounglepen. Yob rakrell douy čipyentsa, oun kova, hoy lo pral o baro Debleste penell, hi gar čačo. Kolen, kay bokenna, dell lo či te rhal, oun kolen, kay troush hi, moukell lo gar te piyell.

Jesaja 45:7

Me hom kova, kay krell, te vell dives oun rati. Me hom kova, kay dell barht oun bibarht. Me, o baro Devel, krau kova lauter.

Jesaja 9:17

O menshengro čilačepen hi har i yag, hoy rhal troul peste, oun rhačrell soubyengre bourra oun soubyengro zenlepen, oun ninna o tselo veesh. Oun pesso kalo yagakro dourho djal kote pre.

Jeremia 10:12

Yob, o baro Devel, kras i phoub peskri zoryah. Dran peskro gosvepen čivas lo i phoub zoreles tardo, oun kras o bolepen koy pral.

Jeremia 10:7

Hakeno hounte trashell toutar oun hounte hadell tout. Tou hal o baro ray pral i themma! Ap toute hounte shounenn le. Mashkral kol tsele gosevende oun bare rayende ap kay phoub hi kek yaake har tou hal.

Jeremia 36:32

Koy las o Yeremia i nevo liil oun das les o Baroukes, ko činepaskres, koleskro dad o Neriya his. Oun o Barouk činas kol tsele laba pre, hoy o Yeremia leske glan penas, kol laba, hoy an o ersto liil tardo his, hoy o Yoyakim, ko baro ray pral Youda an i yag vitsras. Oun boud vavar laba, hoy yaake har kolla his, van koy pashel činlo.

Ezekiel 29:6

Yaake dikenn oun hayvenn halauter, kay an o them Egiptia djivenn, te hom me o baro Devel. Tou, Egiptia, hals i menshenge an o them Israel har i shilftikro khass.

Amos 3:6

Phourdell yek an i kourepaskri trompeta an o foro, oun i menshe lenn kek daar? Na-a! Vell i bibarht pral o foro, hoy o baro Devel bičras gar? Na-a!

Zefanja 3:8

Doleske djinenn, penell o baro Devel, ko dives vell, kay vau me, oun rakrau o čačepen vin pral i phoub. Me lom mange glan, te anap i menshen khetne dran vavar themma ap i phoub, te čorap miri rholi pral lende vin. Ava, miri zoreli rholi, hoy rhačell har i yag, vell pral i tseli phoub oun rhal lat pre.

Zakarie 1:6

Kol laba, hoy yon, mire boudepangre, t'mare phourenge penan, tapran len. Koy moukan le pengro čilačo drom, oun penan: Kova, hoy o baro Devel, ko ray pral o bolepen oun i phoub, mentsa kras, hi i phagi maro čilačo djipaske oun ko čilačo koova, hoy kram, yaake har penas lo.

4. Mose 10:35

Oun har djas ko sonakaskro morhton doureder, penas o Mose: “Baro Devel, ste pre, oun trade kolen krik, kay kamenn touke čilačepen! Kre, te nashenn le halauter penge toutar!”

4. Mose 23:19

O Devel hi gar i mensho, kay rhorhella, vitar gar i mensheskro čavo, koles khaytell, hoy yob kras. Penell yob čomone, hoy yob gar krella? Penell yob kova, kay rikrell yob gar?

Mateo 24:35

O bolepen oun i phoub ačenna gar. Mire laba ačenna hako tsiro.

Remarja 16:27

Yob kokres hi gosevo, oun bičras menge o Yezous Kristes. Sharedo vell yob hako tsiro! Amen.

Josua 23:15

Oun yaake har ko tselo lačo lab čačo vas, hoy t'maro baro Devel ap t'mende penas, yaake hi kova ninna kol čilače labentsa. Te rikrenn t'men gar ap kova, hoy t'maro baro Devel t'mentsa vin kras, oun djan pash vavar debla, oun mangenn len an, palle vell o baro Debleskri rholi pral t'mende. Oun sik ačell bouder kek t'mendar djido an kava lačo them, hoy t'maro baro Devel t'men das.

Judas 1:25

Sharas koles, kay kokres o Devel hi! Yob las men dran o čilačepen vin, har maro ray, o Yezous Kristo, menge meras. Maro Devel hi o baro ray. Les hi i tseli zoor kanna oun glan kava tsiro oun an ko tsiro, hoy vella. Amen.

1. Samuel 2:3

Moukenn tele t'maro sharepah! Ma krenn t'men bares! Moukenn bouder kek pre-phourde laba dran t'maro mouy vin! O baro Devel hi i Devel, kay kova djinell. Oun kova, hoy i menshe krenna, lell yob an o yak oun penell, hoy kova molella.