Jesaja 29:6 - O Debleskro Lab 2024 (Sinte-Manouche)

⁶ vell o baro Devel, o ray pral o bolepen oun i phoub, oun lell t'men vin dran lengre vasta. Yob vella bari golyah oun moukell i phoub trissell. Oun o bolepen dell gole, oun i zorelo dourho phourdell pral i phoub, oun bari yag rhal troul peste.

O Debleskro Drom 2021 (Sinte)

⁶ well o baro Dewel, o rai pral o bolepen un i phub, un lell tumen win dran lengre wasta. Job wella bari goljah un mukell i phub trissell. Un o bolepen dell gole, un i sorelo ducho phurdell pral i phub, un bari jag chal trul peste.

Jesaja 29:6 ပူးပေါင်းရင်းမြစ်များ

2. Samuel 22:14

Oun o baro Devel moukas o bolepen bari gole te dell, ava, o Devel pral halauter moukas pes te shounell bari golyah.

Debleskri gili 55:8

Dour krik djoms oun ačoms an o moulo tato them.

Jesaja 10:3

Hoy kamenn t'mer te krell ap ko dives, kay vell t'mari phagi pral t'mende? Ap ko dives, kay vell i bibarht foun doural pral t'mende? Pash koneste kamenn t'mer palle te nashell? Oun kay moukenn t'mer palle t'maro bravlepen?

Jesaja 26:14

I moule venn bouder gar djido, oun stenn bouder gar pre. Kolen, kay pral mende i raya his, dal tou lengri phagi: Yon hi bouder gar koy. Oun i menshe bistran len.

Jesaja 26:21

O baro Devel vell dran peskro kheer vin, te anell lo o čilačepen pale ap i sherya kolendar, kay o čilačepen kran. Palle vell o rat kolendar diklo, kay maredo van. Oun i phoub khatrell len bouder gar.

Jesaja 28:2

O baro Devel bičrell yekes, koles boud zoor oun penepaske hi. Oun kova vell har i baro divyo phourdepen, kay brishineskre barra dren hi, oun hoy lauter paash dell. Yob vitsrell halauter tel peste an i čik, yaake har i baro brishin, hoy lauter tel pani tassell.

Jesaja 30:30

Palle moukell o baro Devel peskri bari zoreli gole te shounell, oun i menshe dikenna, har leskri moussi tele dell an i rholi. Kote hi yag, hoy troul peste rhal, oun baro zorelo brishin, oun i zorelo phourdepen oun brishineskre barra.

Jesaja 31:9

Oun lengre zorele kourepangre hi har moulo i trashatar, oun lengre pralstoune moukenn koy pre-čiddi plarhta, hoy lengro sikepen his. Kova penell o baro Devel, kay ap i berga Sion khere hi, kay leskri yag rhačell. Oun leskro bob hi an o foro Yerusalem.

Jesaja 43:2

Te djah tou an o pani, me hom pash toute, te tassenn tout kol zorele panya gar. Oun te djah tou an i yag, palle rhačell li tout gar, oun nay krell touke či.

Ezekiel 38:22

Oun me dau les peskri phagi: I pharo nasslepen oun marepen vell ap leste. Oun zorelo brishin, brishineskre barra, oun yag oun shvefla moukau ap lende tele te vell, ap leste oun ap leskre lourdende, oun ap kol boud lourdende dran vavar themma, kay leha djan.

Amos 1:14

Me bičrau i yag ap i foreskre massurya o forestar Rabba, hoy rhačrell leskre zorele khera tele, ap ko dives, kay vell o kourepaskri gole dino, oun o kourepen vin phagell har i baro phourdepen.

Nahum 1:3

O baro Devel vell gar sik rhoyedo. Les hi bari zoor, oun čačepah, hakeneste, kay doosh ap peste anas, dell yob peskri phagi. Kote, kay o baro Devel djal, phourdell i zorelo dourho. Oun i volke hi har koy čik, hoy leskre pire pre vitsrenn.

Zakarie 14:5

Koy tala djal yaake dour har Azel. An koy tala mank o baro Debleskre berge nashenn t'mer t'menge yaake, har t'mare phoure nashan penge, har i berge trissan an ko tsiro, kay o Usiya o baro ray pral o them Youda his. Oun palle vell miro baro Devel. Oun leskre tsele bolepangre venn khetne leha.

Mateo 24:7

I pralstoune pral bare themma kourenn pen i vavar pralstunentsa. Oun i menshe dran yek them marenn kolen an i vavar them. An boud themma hi i menshen gar doha te rhal. Oun kate oun kote vell i phoub trisslemen.

Markus 13:8

I pralstoune pral bare themma kourenn pen i vavar pralstunentsa. Oun i menshe dran yek them marenn i menshen an i vavar them. Oun kate oun kote vell i phoub trisslemen. Boud menshen hi gar doha te rhal. Kova lauter vella yaake pral i phoub, har i douka venna pral i djouvyate, kay lell i ternepen.

Louka 21:11

Oun kay te koy vell i phoub zoreles trisslemen. An boud themma hi i menshen gar doha te rhal, oun baro nasslepen vell ap lende. Oun yon dikenn i baro koova ap o bolepen, hoy krell lenge bari daar.

Debleskro tsiro 11:13

Oun ap yek kopo trissas i phoub zoreles. Oun o deshto kotar ko forestar peras khetne. Oun efta zerya (7.000) menshe van maredo. Oun kol vavaren tapras i bari daar, oun yon sharan o Debles, kay an o bolepen hi.

Debleskro tsiro 11:19

Oun o Debleskro kheer an o bolepen vas pre kerdo. Oun an o Debleskro kheer dikom me ko sonakaskro morhton, hoy sikrella, kay o Devel o maal peskre menshendar hi. Oun i yag das karye dran o bolepen pre te tele. Oun o bolepen das bari gole, har koy gole, hoy o bolepen della, te dell baro brishin oun te djal yag tele dran o bolepen. Oun i phoub trissas, oun das brishin har bare barra.

Debleskro tsiro 16:18

Koy das i yag dran o bolepen karye pre te tele, oun vas i bari gole vin, har koy gole, hoy o bolepen krella, te dell baro brishin oun te djal yag tele ap i phoub. Oun i phoub trissas yaake zoreles, har dikan le kova gar yaake rah, har menshe ap i phoub hi.

1. Samuel 2:10

Kolla, kay čingrenn ap baro Debleste, venn moulo dino. Dran o bolepen bičrell o Devel peskri rholi pral lende. O baro Devel dell i tseli phoubyat peskri phagi. Yob rodell koles vin, kay baro ray vell, oun dell les bari zoor.