Jesaja 2:11 - O Debleskro Lab 2024 (Sinte-Manouche)

¹¹ Hakeno, kay dikell tele ap o vavareste, hounte dikell tele glan peste i ladjatar. Oun i pre-phourde menshe venn phagedo. Ap ko dives hi kokres o baro Devel baro.

O Debleskro Drom 2021 (Sinte)

¹¹ Hakeno, kai dikell tele ap o wawareste, hunte dikell tele glan peste i ladjatar. Un i pre-phurde menshe wenn phagedo. Ap ko diwes hi kokres o baro Dewel baro.

Jesaja 2:11 ပူးပေါင်းရင်းမြစ်များ

2. Samuel 22:28

Tou veh ap i rig i čorvelenge, oun kol pre-phourden kreh tou tiknes.

Debleskri gili 18:27

Tou hal lačo ap koleste, kay hi lačo ap i vavarende oun hal gosveder har kova, kay ap bange dromma djal.

Debleskri gili 18:28

Tou veh ap i rig i čorvelenge, oun kol pre-phourden kreh tou tiknes.

Debleskri gili 20:8

Vavar menshe patsenna ap i zoor pengre grayendar oun vourdya. Mer dah gole ap maro baro Debleste.

Debleskri gili 46:10

Ap o marepen penell lo: “Mouk tele ap i tseli phoub!” Kol kashta, kolentsa dan le karye, phagell lo khetne, oun lengre rhare dell lo paash, i kourepangre vourdya rhačrell lo pre.

Debleskri gili 46:11

“Moukenn tele”, dell lo gole, “oun hayvenn, te hom me o Devel. Me hom o pralstouno pral i menshende an i tsele themma, ava, o pralstouno pral i tseli phoub.”

Debleskri gili 94:2

Tou hal o čačepaskro ray pral i tseli phoub, de kol pre-phourden pengri phagi!

Gosewe laba 16:5

O baro Devel dikell rhoyedes ap hakeneste, koles i pre-phourdo dji hi. O vast pre, kova lell peskri phagi.

Gosewe laba 30:13

Hi menshe koy, kay patsenn pendar, har lačo yon hi, oun dikenn tele ap hako vavareste.

Jesaja 10:12

An ko tsiro, kay kras o baro Devel, maro ray, lauter, hoy yob peske glan las, te krell lo ap i berga Sion oun an Yerusalem, lell lo peske o baro rayes o themestar Assour glan, koleskro dji yaake pre-phourdo hi, oun koleskre yaka tele dikenn ap i vavarende.

Jesaja 12:1

I dives vella, kay i menshe an Yerusalem givenna: Me sharau tout, baro Devel! Ava, tou hals rhoyedo ap mande. Kanna hal bouder gar rhoyedo oun rakreh lačes mantsa.

Jesaja 12:4

Oun ap ko tsiro denn t'mer gole: Parkrenn t'men pash o baro Debleste! Denn ap leste gole, te vell lo ap t'mari rig! Penenn i menshenge an i tsele themma, hoy lo kras. Penenn hakeneske te hi leskro lab bareder har hako vavar lab!

Jesaja 13:11

O baro Devel penell: Me anau bibarht ap i phoub, oun moukau o tselo čilačepen, hoy i čilače kran, ap lende pale te vell. I pre-phourden hi bouder či, koleha nay sharenn le pen. Oun me krau kol pre-phourden tikno, kay rikran pengri zoryah kolen tele, kay len kek zoor hi.

Jesaja 14:15

Ava, tele pash i moulende djal tou, an o telstouno moulengro them!

Jesaja 2:17

Palle vell lenge kova krik lino, koleha i menshe phourdan pen pre. Oun lengro sharepen ačell gar. Ap ko dives hi kokres o baro Devel o Devel pral halauter.

Jesaja 23:9

O baro Devel, ko ray pral o bolepen oun i phoub penas, te vell kova yaake. Yob kamas lenge ko tselo raylepen krik te lell, koleha yon pen yaake bares kran, oun kamas i an-dikle morshen ap i phoub tiknes te krell.

Jesaja 24:21

Oun ap ko dives dell o baro Devel i bolepangre lourden lengri phagi, oun ninna i bare rayen ap i phoub.

Jesaja 25:9

Ap ko dives penell hakeno: Dik, kova hi maro Devel! Ap koleste rikram men, te vell lo ap mari rig. Yob hi maro baro Devel, ap koleste men rikram! Givas i barhtyatar: Yob las men vin dran o merepen.

Jesaja 26:1

Ap ko dives givenn le kay gili an o them Youda: Men hi i zorelo foro. O Devel čivas zorele massourya troul mende, te krell kek menge čilačepen.

Jesaja 28:5

Ap ko dives hi o baro Devel, ko ray pral o bolepen oun i phoub, har i shoukar rayeskri stadi oun shereskro sonakay kolenge, kay pral ačan leskre menshendar.

Jesaja 29:18

Ap ko dives shounenn kolla, kay nay shounenn gar, i laba dran i liil. Oun i korele nay dikenn oun djivenn bouder gar an o kalepen oun an i rat.

Jesaja 30:18

Doleske dikell o baro Devel ap ko dives, kay nay vell lo t'menge pale lačes, oun te nay krell lo peskro dji t'menge pre. O baro Devel hi i Devel, kay hako tsiro o čačepen krell. Barhtelo hi hakeno, kay ap leste dikell.

Jesaja 30:23

Palle dell o baro Devel brishin ap o djob, hoy tou ap tiro kotar phoub vin vitsral. Oun tiri phoub anell yaake boud djob vin, te vell tout boudeder har doha maro. Oun tire firhen vell doha zenlepen te rhal ap i bourhlo zenelo them.

Jesaja 37:23

Koon hi kova, pral koleste čilače laba rakral? Oun kones tire labentsa praasal? I pre-phourdo hal, oun ap mande tele dikal, pral o Israeleskro Debleste tout hadal!

Jesaja 4:1

Ap ko tsiro taprenn efta djouvya yek morshes oun penenn: Mer kamah kokres maro rhapen oun mare ripya te ginell. Romedine men, te vell i ladj mendar krik lino!

Jesaja 40:23

Yob krell, te vell i pralstunen bouder či penepaske, oun i rayenge pral i phoub lell lo lengri zoor krik.

Jesaja 52:6

Doleske vell i dives, kay moukau me mire menshen te djinell, koon hom. Oun palle hayvenn le, me hom kova, kay penell: Kate hom!

Jeremia 12:9

O them mire menshendar vas i them, kay i divye djoukle khetne van. Oun troul lende hi save čirkle, kay rhan mass: Avenn khetne t'mer tsele divye firhe! Kate hi rhapen!

Jeremia 9:24

Shounenn, penell o baro Devel, ko tsiro vell, kay dau hakenes i phagi, kay činlo hi ap peskro mass, oun djivell, har te vals lo gar činlo:

Ezekiel 38:14

Tou, mensho, pen ap o Gog laba, hoy mandar venna! Pen: Kava penell o baro Devel, maro ray: An ko tsiro, kay mire menshe Israel an o lačepen djivenn kek daryah, kreh tou tout ap o drom.

Ezekiel 38:19

Oun an miri bari oun tati rholi dau man sovel: Čačepah, an ko tsiro trissell i phoub an o them Israel zoreles.

Ezekiel 39:11

An ko dives dau i platsa an o them Israel, kay vell o Gog paskedo. Koya hi koy tala, hoy kharell Abarim, oun hi pash o baro pani ap koy rig, kay o kham pre djala. Kote vell yob peskre boud lourdentsa paskedo. Doleske nay djan kolla, kay ap i raysa hi, bouder gar vergel. Koy tala vell kharedo Tala Hamon Gog.

Ezekiel 39:22

Oun an ko tsiro dikenn oun hayvenn i Israelitarya, te hom me o baro Devel, lengro Devel, oun bistrenn kova bouder gar.

Daniel 4:34

Me, o Neboukadnezar parkrau man pash o bolepaskro rayeste oun hadau les oun sharau les. Lauter, hoy yob krell oun kras, hi mishto. Oun leskre dromma hi čačo. Oun kolen, kay pen bares krenn, nay krell lo tiknes.”

Hosea 2:16

Doleske dik, me kamau lat te tserdell, oun kamau lat an o moulo tato them te anell. Oun kote rakrau kamles lah.

Hosea 2:18

Palle, penell o baro Devel, kharell li man pale miro rom, oun gar bouder miro Baal.

Hosea 2:21

Israel, tou veh miri romni hako tsireske. Me djau touha trouyel, har mishto oun čačo hi. Me hom lačes ap toute, oun krau miro dji pre touke.

Amos 9:11

O baro Devel penell: Ap ko dives krau o Davideskro kheer neves, kova hoy kanna khetne peredo hi. Kote, kay lo paash hi, krau les tseles. Kote, kay barra vin phagedo hi, čivau len pale pre. Me krau les yaake har lo glan boud tsiro his.

Obadja 1:8

Me, o baro Devel penau: An ko tsiro lau i goseven an o them Edom krik. Oun ap i berge Esau djinell bouder kek, hoy te krell.

Micha 2:3

Doleske penell o baro Devel ap lende: Kanna hom me, kay lell pes čilačo koova glan, hoy anau ap t'maro kheer! Vell yaake, har te vals i dori troul t'mari meen, oun t'mer nay tserdenn t'maro shero bouder gar vin, oun rikrenn les bouder gar pre. Savo čilačo tsiro vell pral t'mende.

Micha 4:6

O baro Devel penell: O tsiro vell, kay anau mire menshen pale khetne, yaake har anell i bakrengro peskre bakren pale khere, hoy doukedo hi oun krik tradedo van. Me dom len pengri phagi.

Micha 5:10

Oun tire forya dau paash, oun tire tsele zorele khera phagau tele.

Zefanja 3:11

An ko tsiro hounte ladjenn t'mer Israelitarya t'men bouder gar doleske kay t'men pral mande hadan, oun yaake boud čilačepen kran. Me lau kol pre-phourden, kay rikran yaake boud pendar, mashkral dran t'mende krik. Ap miri berga, kay me djivau, dell bouder kekes, kay krell pes bares.

Zefanja 3:16

An ko tsiro vell penlo ap i menshende an o foro Yerusalem: Ma trashenn t'men, t'mer an Yerusalem! Ma moukenn t'mare vasta tele te perell!

Zakarie 9:16

Ap ko dives lell len lengro baro Devel vin dran i čilače vasta. Yob hi lenge har i bakrengro, kay dell garda ap peskre bakren. Har i kouč barra ap i rayeskri stadi krenn le o them shoukar.

Louka 18:14

Oun o Yezous penas: “Me penau t'menge: O Devel dikas ap kaleste, oun his leske lačo oun gar ko vavareske. Kova, kay pes bares krella, koles sharell o Devel gar. Oun kova, kay pes gar bares krella, koles krell o Devel bares.”

2. Korintarja 10:17

Koon kamell pes te sharell, kova hounte sharell kova, hoy o Yezous Kristo kras.

2. Korintarja 10:5

Te penenn yon, te dals kek Devel, sikrah mer, kay lengre pre-phourde laba gar čačo hi. Halauter, hoy lenge an o shero trouyel djal oun hadell pes pral o Yezous Kristeste pre, dah mer paash.

2. Tessalonikarja 1:10

ap ko dives, kay vell maro ray Yezous pale, te vell lo sharedo peskre menshendar. Oun i tsele patsle dikenn les, oun hi barhtelo pral leste, ninna t'mer, kay patsan ap o Debleskro lačo lab, hoy mer t'menge penam.

1. Petro 5:5

Kol terne menshenge penau me: Krenn kova, hoy kol phoureder phrala t'menge penenna! Hakeneske penau: Kek te krell, har te vell lo bareder har ko vavar! O Devel hi gar ap i rig kolendar, kay krenn pen bares. Na-a, yob hi lačes kolenge, kay krenn pen gar bares.