Jesaja 19:25 - O Debleskro Lab 2024 (Sinte-Manouche)

²⁵ O baro Devel, ko ray pral o bolepen oun i phoub, čivell peskri barht ap lende oun penell: Barhtelo hal tou Egiptia. T'mer han mire menshe. Barhtelo hal tou Assour. T'men krom me mire vastentsa. Barhtelo hal tou Israel. T'men rodom me mange vin, te venn mire menshe.

O Debleskro Drom 2021 (Sinte)

²⁵ O baro Dewel, ko rai pral o bolepen un i phub, tchiwell peskri bacht ap lende un penell: Bachtelo hal tu Egiptia. Tumer han mire menshe. Bachtelo hal tu Assur. Tumen krom me mire wastentsa. Bachtelo hal tu Israel. Tumen rodom me mange win, te wenn mire menshe.

Jesaja 19:25 ပူးပေါင်းရင်းမြစ်များ

Debleskri gili 100:3

Ma bistrenn: O baro Devel kokres hi o Devel! Yob kras men, oun leskre ham mer. Leskre menshe ham, oun yob hi menge har i bakrengro, kay djal glan leskre bakre oun anell len kote, kay len doha rhapaske hi.

Debleskri gili 115:15

Mou vell ap t'mende i barht kolestar, kay o bolepen oun i phoub kras.

Debleskri gili 138:8

Baro Devel, tou leh miro koova an tiro vast. Baro Devel, tiro lačepen ačella hako tsireske. Ma mouk kova, hoy lal an tiro vast!

Jesaja 19:24

Ap ko dives vell o Israel o triinto baro them khetne i themma Egiptia oun Assour. Oun kolla triin hi i sikepen, havi bari barht o Devel i tsele menshenge ap i phoub anell.

Jesaja 27:13

Oun ap ko dives vell an i bari phourdepaskri phourdedo. Oun i Israelitarya, kay his nashedo an o them Assour, oun kay his vin tradedo an o them Egiptia, kolla lauter venna oun mangenn o baro Debles an ap o Debleskri berga an o foro Yerusalem.

Jesaja 29:23

Te dikenn leskre čave ko koova, hoy mire vastentsa mashkral lende krau, palle hadenn le miro lab; yon sharenn man, o Yakobeskro Debles, kay hom kokres o čačo Devel. Oun yon mangenn man an, o Israeleskro Debles.

Jesaja 45:11

Kava penell o baro Devel, kay kokres o čačo Devel hi. Yob hi o Israeleskro Devel, oun kova, kay les kras: Hounte penap t'menge, hoy mire čaventsa krau? Kamenn mange glan te činell, hoy te krap mire vastentsa?

Jesaja 45:14

Kava penell o baro Devel: O bravlepen dran o them Egiptia, oun kova, hoy i menshe dran Etiopia dren lan, vell pash toute, te vell lo tiro. Oun kol bare zorele morsha dran Seba venn tire boudepangre. Pandles shellentsa venn le pash toute, oun vitsrenn pen glan toute ap i phoub, oun penenn: Kokres pash toute hi o Devel, oun dell kek vavar devel.

Jesaja 60:21

Tire menshe hi halauter an o čačepen tardo. Oun kava them hi lenge hako tsireske. Yon hi har i tikne rouka, hoy čivom an i phoub, oun hoy bares van. Mire vastentsa krom len, te sikrap miro raylepen.

Jesaja 61:9

Lengre čave, kay pal lende venna, hi prindjedo oun an-diklo pash i menshende an hake themma. Oun koon len dikell, hayvell: Kolla hi i menshe, ap kolende o baro Devel peskri barht čivas.

Jesaja 63:17

Hoske, baro Devel, moukeh tou men tire dromendar tele te djal, te kram mare djia har bar, yaake te djivam bouder gar touha? Ab pale pash mende! Ma biste tire boudepangre! Mer ham tire menshe.

Jesaja 64:8

Baro Devel, mouk tiri rholi gar yaake bares te vell, te bistress mari doosh gar bouder. Dik ap mende, mangah tout, tire menshe ham halauter.

Jesaja 65:23

Yon boudrenn gar čičeske, oun lengre čave venn gar boldo, te merenn le sik. Yon hi menshe, ap kolende o baro Debleskri barht čiddo hi, – ap lende, ninna ap lengre čavende.

Jeremia 10:16

Har vavarčandes hi ko Devel, koles o Yakobeskre čave an-mangenna! Yob hi kova, kay kras halauter. Oun i Israelitarya hi leskre menshe. Yob kharell: o baro Devel, ko ray pral o bolepen oun i phoub.

Jeremia 2:7

Oun me anom t'men an i lačo them, kay boud rhapen hi, te rhan ko tselo lačo koova, hoy kote baro vella. Oun har t'mer an ko them djan, kran les t'mer pale-čiddo. Oun miro them vas djoungeles glan mire yaka.

Hosea 2:23

An ko tsiro, penell o baro Devel, kamau te shounell: Me shounau, hoy o bolepen mandar mangell, oun o bolepen shounell, hoy i phoub lestar mangell.

Zakarie 8:13

T'mer menshe dran o them Youda oun dran o them Israel, hans i menshenge an vavar themma har menshe, ap kolende i bibarht čiddo hi. Kanna krau t'mentsa yaake, te dikenn le miri barht ap t'mende. Doleske ma darenn! Krenn t'mare vasta zoreles!”

4. Mose 24:1

Har o Bileam kanna dikas, kay o baro Debleske kova mishto hi, te rakrell lo i barht pral o Israel vin, rodas yob gar pal i sikepen, hoy leske penell, hoy o Devel kamella, yaake har kras yob kol vavar kope. Yob rissras pes oun dikas ap o moulo tato them,

4. Mose 6:24

Mou dell tout o baro Devel barht oun zoor, oun dell garda ap toute!

4. Mose 6:27

T'mer te rakrenn yaake miro lab pral i Israelitarya vin, dau me len barht oun zoor.”

Remarja 3:29

O Devel hi gar kokres i biboldengro Devel. Na-a, yob hi ninna o Devel kolenge, kay kek bibolde hi.

Galatarja 6:15

Hi či moldo, te hal tou ap o mass činlo. Hi vitar či moldo, te hal tou gar ap o mass činlo. Yek koova molella: O Devel kras dran mende neve menshe.

Efesarja 1:3

Sharas maro Debles! Yob hi o Devel oun o dad maro rayestar, o Yezous Kristestar, oun das peskro tselo bolepaskro bravlepen mende, kay ham patslo ap o Yezous Kristeste.

Efesarja 2:10

Kova, hoy mer kanna ham, kras o Devel dran mende. Har vam patslo ap o Yezous Kristeste, das lo men o nevo djipen, te kras mer ko lačo koova, hoy yob menge vin rodas oun an mare vasta das.

5. Mose 32:9

I Israelitarya hi leskre menshe. Yon, o Yakobeskre čave, hi kolla, kay rodas lo peske vin.

Filiparja 1:6

Doleske djinau: O Devel kras i lači boudi an t'mende. Oun yob krell ninna, te ačenn pash leste, te venn lačes glan leste tardo ap ko dives, kay vell o Yezous Kristo pale.

1. Petro 2:10

Glan i rah tsiro hans t'mer gar leskre menshe. Kanna han t'mer o Debleskre menshe. Glan i rah tsiro djinan t'mer gar, kay hi les i baro dji t'menge. Kanna kras lo peskro dji t'menge pre.