Jesaja 16:14 - O Debleskro Lab 2024 (Sinte-Manouche)

¹⁴ Kanna penell yob: An triin bersha – kek dives sikeder oun kek dives palla – vell o Moabeskro bravlepen oun sharepen krik lino. Kol boud menshendar ačenn gar boudeder djido har i vast pherdo. Oun kolla hi gar zorelo.

O Debleskro Drom 2021 (Sinte)

¹⁴ Kanna penell job: An triin bersha – kek diwes sikeder un kek diwes palla – well o Moabeskro brawlepen un sharepen krik lino. Kol bud menshendar atchenn gar budeder djido har i wast pherdo. Un kolla hi gar sorelo.

Jesaja 16:14 ပူးပေါင်းရင်းမြစ်များ

1. Mose 31:1

Oun o Yakob shounas, hoy o Labaneskre čave pal leste rakran oun penan: “O Yakob las peske halauter, hoy maro dadeskro his. Kova, hoy maro dadeskro his, kolestar vas lo yaake bravelo.”

Ester 5:11

Glan lende phourdas pes o Haman pre oun penas lenge, har baro leskro bravlepen hi, oun kitse morsh čave les hi, oun har hadas les o baro ray oun čivas les pral i tsele pralstunende oun pral i tsele rayeskre boudepangre.

Hiob 14:6

Palle dik lestar krik, mouk les kokres, te nay krell lo peskro diveskri boudi!

Hiob 7:1

I menshe hounte boudrenn phares ap kay phoub. Pengro tselo djipen marenn le pen tele har i boudepangre, kay venn haki rati playsedo.

Jesaja 11:14

Palle djan le khetne bari zoryah ap i Filistarya, kay kote djivenn, kay o kham tele djal. Oun khetne randenn le kolen vin, kay an i themma djivenn, kay o kham pre djal. I themma Edom oun Moab lenn le dren. Oun i Ammonarya hounte krenn, hoy yon penenn.

Jesaja 15:5

Miro dji rovell pral o them Moab; lengre menshe nashenn penge yaake dour har o foro Soar, yaake dour har Eglat-Shelishiya. Hi save, kay djan pre ap o drom an Louhit o ropah. Vavar djan ap o drom an Horonayim, oun denn bari gole i doukatar.

Jesaja 16:13

Kalla hi kol laba, hoy o baro Devel glan tsirya pral o them Moab rakras.

Jesaja 17:4

An ko tsiro hi o themes Israel bouder kek raylepen, kote, kay bravlepen his, hi kanna čorvlepen.

Jesaja 21:16

Yaake rakras o baro Devel, maro ray, ap mande: An yek bersh – kek dives sikeder oun kek dives palla – vell o tselo raylepen dran o them Kedar krik lino.

Jesaja 23:9

O baro Devel, ko ray pral o bolepen oun i phoub penas, te vell kova yaake. Yob kamas lenge ko tselo raylepen krik te lell, koleha yon pen yaake bares kran, oun kamas i an-dikle morshen ap i phoub tiknes te krell.

Jesaja 25:10

O baro Devel rikrell peskro vast pral kay berga. I menshen an o them Moab stakrell lo tel peskre herya khetne, yaake har phouss khetne stakedo vell, hoy an i čik čiddo hi.

Jesaja 25:11

Ninna te hadenn le pengre vasta oun krenn len bourhles har i shvimari, djan le tele, oun ninna kova, hoy le pengre vastentsa kran. Yaake krell o baro Devel len tiknes.

Jesaja 7:16

Glan te vas ko tsiro, kay djinell lo kova, vell ko them mouklo čiddo, glan koleskre douy bare rayende tout savi bari daar hi.

Jeremia 48:42

O Moab hadas pes pral o baro Debleste. Doleske vell lo yaake dino, te hi lo bouder kek natsyona.

Jeremia 9:23

Koon kamell pes te sharell, kova te sharell pes, kay yob prindjrell man, oun te hayvell yob, kay me o baro Devel hom. Me krau miro dji pre i menshenge, oun krau, hoy čačo oun mishto hi ap i phoub. Savo koova hi mishto glan mire yaka. Kova penau me, o baro Devel.

5. Mose 15:8

Kre tire vasta leske dour pre! Oun pats leske love ap kova, hoy yob touke koy čivell, te vell les ap halauter pale doha.