Jeremia 7:31 - O Debleskro Lab 2024 (Sinte-Manouche)

³¹ Oun kran an koy tala Ben Hinnom i rhačepaskri, hoy kharell Tofet, te rhačrenn yon pengre čaven oun čen. Savo koova penom me lenge gar. Oun kova vas mange gar an o shero.

O Debleskro Drom 2021 (Sinte)

³¹ Un kran an koi tala Ben Hinnom i chatchepaskri, hoi kharell Tofet, te chatchrenn jon pengre tchawen un tchen. Sawo koowa penom me lenge gar. Un kowa was mange gar an o shero.

Jeremia 7:31 ပူးပေါင်းရင်းမြစ်များ

2. Rajengro liil 17:17

Oun yon moukan pengre čave oun ča an i yag te rhačrell, oun kran dourkepen oun dravepen. Oun yaake dan le pen an savo koova, hoy glan o baro Debleskre yaka djoungeles hi oun rhoyran les.

2. Rajengro liil 23:10

O Yosia kras ninna koy platsa pale-čiddo, hoy kharella Tofet, oun hi an i tala Hinnom čiddo. Kova kras lo, te nay rhačrell kek peskro čaves vitar gar peskri čay an i yag o rhorheno debleske Molok.

2. Rajengro liil 23:20

Oun moukas i tsele rashayen, kay i moule deblenge boudran, te marell ap lengre rhačepangre, oun rhačras menshengre kokale koy pre. Oun palle vas lo pale an o foro Yerusalem.

2. Familjakro liil 28:3

oun rhačras soungepaskro koova an i tala, hoy kharell Ben-Hinnom. Ninna rhačras lo peskre čaven i rhorhene deblenge. Yaake kras lo savo djoungelo koova, har i menshe an vavar themma kran, – save menshe har kolla, kay o baro Devel glan i Israelende dran o them tradas.

2. Familjakro liil 33:6

Oun yob moukas peskre čaven an i yag te djal an i tala Ben-Hinnom, oun shounas ap čirklengre golya oun vavar sikepen, oun kras dourkepen oun rikras peske dravepangre oun save menshen, kay i moulen poučan. Yaake kras lo boud koova, hoy čilačo hi glan o baro Debleskre yaka, te rhoyrell lo les.

Jesaja 30:33

I rah tsiro hi i rhačepaskri platsa kerdo, dour tele djal li oun bourhles hi li. Ninna o baro rayeske hi li kerdo. Yag hi koy oun boud kashta rhačepaske. Oun o dourho o baro Deblestar phourdell zoreles koy pre, oun krell i yag, hoy lauter pre rhačrella.

Jesaja 57:5

Tel hako baro rouk loubrenn t'mer trouyel, te sharenn i rhorhene deblen! Oun an i tala mank i bare barra marenn t'mer lenge t'mare čaven, har te vans le firhe.

Jeremia 19:2

Oun dja vin an koy tala Ben-Hinnom, kay glan ko foreskro voudar hi, kay i paash-dine pirya čiddo hi. Oun pen i menshenge kol laba, hoy me touke penau.

Jeremia 2:23

Har nay peneh tou: Me krom man gar pale-čiddo? Me nashom gar kol deblenge palla, hoy kharenn Baal. Dik ap toute, hoy tou kreh an i tala! Ma biste, har djival! Har i khamela, kay hi bipandlo, nasheh tou trouyel,

Jeremia 32:34

Koy pashel čivan le pengre rhorhene deblen an ko kheer, hoy mange kerdo vas. Oun yaake kran le les pale-čiddo.

Jeremia 32:35

Oun yon kran moulne platse o rhorheno debleske, o Baaleske an o telstouno them, kay kharella Ben-Hinnom, te nay moukenn le pengre čaven oun čen o debleske Molok an i yag te djal. Savo koova penom me lenge gar. Oun an kek tsiro vas mange kova an miro shero dren, te poučoms savo koova lendar. Har yon savo djoungelo koova kran, anan le i doosh ap o tselo them Youda.

Ezekiel 16:20

Tire čave oun ča, kay hi mire čave, kolen lal tou oun dal len lenge moulo, te rhan le len pre. His touke gar doha, te moukal man?

Ezekiel 20:26

Oun har moukan le pengre phoureder morsh čaven i rhorhene deblenge te rhačrell, rakrom pral lende vin: “T'mer han mange pale-čiddo.” Yaake kamom len bari daar te krell, te hayvenn le, te hom me o baro Devel.

Ezekiel 20:31

Bis ap kava dives rhačrenn t'mer firhen kol rhorhene deblenge, oun krenn t'men yaake pale-čiddo. Ninna rhačrenn lenge t'mare čave. Oun me moukap man t'mendar dran o kheer Israel, te poučell? Pash miro djipen, penell o baro Devel, maro ray, dau man sovel, te moukau man gar t'mendar te poučell!

3. Mose 18:21

Tou rhačress kek tire čavendar o rhorheno debleske Molok. Sau koova sikrals, te hom me, tiro Devel, touke či moldo. Me hom o baro Devel!

Micha 6:7

Hi o baro Devel barhtelo pral boud zerya bakre, oun deesh zerya khore djet? Hounte dap leske miro phoureder čaves, te vell miri doosh krik lino oun ko čilačo koova, hoy krom?

5. Mose 12:31

Ma krenn sau kova t'maro baro Debleha! Kova lauter, hoy yon pengre deblenge kran, hi djoungelo oun čilačo glan o baro Debleskre yaka. Ninna pengre morsh čaven oun pengre čen rhačran le lenge an i yag.

5. Mose 17:3

oun djal koy oun mangell vavar deblen an, oun vitsrell pes tele glan o kham, o čon oun i bolepangre momlia, oun krell yaake savo koova, kolestar me penom, te krenn kova gar,

5. Mose 18:10

Kek mank t'mende hounte rhačrell peskro morsh čaves oder peskri čat an i yag o Debleske. Kek mank t'mende hounte vell i dourkepaskro, kek i dravepaskro, kek, kay krell vavar bengeskri koova,

Josua 15:8

oun foun kotar doureder pre an i tala Ben-Hinnom, hoy ap koy rig koy bergatar čiddo hi, kay o kham pralstounes tardo hi. Ap koy berga hi ko foro čiddo, kay i Yebousarya djivan. Kava foro hi kanna Yerusalem. Oun kotar djas o drom doureder bis pral pre ap i berga, hoy hadell pes ap koy rig foun i tala Hinnom, kay o kham tele djal. Kay berga hi čiddo ap i nordetikri rig ko telstouno themestar, hoy kharell Refayim.