Jeremia 46:28 - O Debleskro Lab 2024 (Sinte-Manouche)

²⁸ Doleske, ma traash, Yakob, miro boudepaskro, penell o baro Devel. Me hom pash toute. Kol tsele natsyone, kay me tout tradom, moukau gar te djivell. Tout moukau te djivell. Dava hounte dap tout, har touke mishto hi. Kek daventsa nay moukau tout gar.

O Debleskro Drom 2021 (Sinte)

²⁸ Doleske, ma traash, Jakob, miro budepaskro, penell o baro Dewel. Me hom pash tute. Kol tsele natsjone, kai me tut tradom, mukau gar te djiwell. Tut mukau te djiwell. Dawa hunte dap tut, har tuke mishto hi. Kek dawentsa nai mukau tut gar.

Jeremia 46:28 ပူးပေါင်းရင်းမြစ်များ

Debleskri gili 46:11

“Moukenn tele”, dell lo gole, “oun hayvenn, te hom me o Devel. Me hom o pralstouno pral i menshende an i tsele themma, ava, o pralstouno pral i tseli phoub.”

Debleskri gili 46:7

Yob te dell gole, darenna i menshe an i vavar themma, oun bare rayenge vell i zoor krik lino pral pengre themma. I tseli phoub trissella i daryatar.

Jesaja 27:7

Das o baro Devel i Israelitaryen yaake har lo kolen das, kay len dan? Maras yob yaake boud lendar, har maras lo kolendar, kay len maran?

Jesaja 27:9

Yaake vell o Israelengri doosh krik lino. Oun ap kova sikrell pes, te hi lengri doosh krik lino: Te denn le i pre-čidde barra yaake khetne, kay mangan le i vavar deblen an, te ačell či har čik. Oun te moukenn le kek figure tardo, hoy sikrenn i debletsa Ashera, vitar kek boba, kay lake soungepaskro koova rhačedo vas.

Jesaja 41:10

Ma dare! Me hom touha! Ma dik darenes! Me hom tiro Devel! Me krau tout zoreles, me vau ap tiri rig, ava, me rikrau tout miri čači moussyah, hoy krell tout zorleder har i vavar.

Jesaja 43:2

Te djah tou an o pani, me hom pash toute, te tassenn tout kol zorele panya gar. Oun te djah tou an i yag, palle rhačell li tout gar, oun nay krell touke či.

Jesaja 44:1

Kanna shoun tou, Israel, miro boudepaskro, t'mer mire vi-rodede menshe, kolengro phouro dad o Yakob his.

Jesaja 45:23

Me dom man sovel pash mande kokres, oun hoy penom, hi čačo oun nay vell gar krik lino: Hakeno hounte vitsrell pes glan mande ap i phoub, oun hako mouy dell pes sovel

Jeremia 1:19

Ninna te čingrenn le touha, nay krenn le touke či. Me hom pash toute, te lap tout dran lengre vasta vin. Kova penau me, o baro Devel.

Jeremia 10:24

Baro Devel, de man i phagi an o čačepen, oun gar an tiri rholi, te maress man gar!

Jeremia 15:20

Me krau tout kal menshenge har i zoreli massouri. Ninna te djan le ap toute, nay vitsrenn le tout gar trouyel. Me, o baro Devel, hom pash toute, te vap ap tiri rig, oun te lap tout vin dran lengre vasta, –

Jeremia 23:4

Oun me dau pralstunen pral lende, kay hi har lače bakrengre: Yon denn garda ap lende, te hounte darenn oun trashenn le bouder gar. Kek bakro djal bouder nashedo. Kova penell o baro Devel.

Jeremia 25:9

Doleske moukau kol lourden te vell dran i themma, kay kote čiddo hi, kay norden hi. Lengro pralstouno hi o baro ray, o Neboukadnezar, dran o them Babilonia. Koles rodom vin, te krell yob, hoy kamau. Kolla perenn pral t'mende oun t'maro them, ninna pral kol tsele themma kay trouyel. Kal themma moukau yaake paash te dell, te ačell či har barra pral hako tsireske. Oun i vavar menshenge, kay kova dikenn, ačell o rakepen krik i trashatar, oun yon denn i vasta pral o shero khetne.

Jeremia 30:10

Doleske ma dare, tou, miro boudepaskro Yakob! Ma traash, Israel, penell o baro Devel. Shoun, me lau tout oun tire čaven vin dran ko dour them, kay pandle han. T'mer venn khere an t'maro them. Kote djal t'menge mishto. Kek krell t'menge kote čilačepen. Či hounte krell t'menge daar.

Jeremia 30:11

Me, o baro Devel, hom pash t'mende, te vap ap t'mari rig. Kol natsyone, mank kolende tradom t'men, kolla hounte djan tele. T'mer djan gar tele. T'mende dau i phagi har t'menge mishto hi. Kek daventsa nay moukau t'men gar. Vals gar mishto, te dap t'men kek phagi.

Jeremia 4:27

O baro Devel penas: Ninna te vell kay tseli phoub har i moulo them, kamau gar lauter paash te krell.

Jeremia 5:10

Nashenn pre, kay lengre drakengre rouka tardo hi, oun krenn len paash! Ma tserdenn i tsele bourra vin! Moukenn čomone tardo! Tserdenn i kashta i drakentsa vin, kolla hi gar mange.

Jeremia 5:18

Me, o baro Devel, kamau mire menshen gar lauteren te marell an ko tsiro.

Jeremia 51:46

Te shounenn t'mer, hoy an o them rakedo vell, nay darans t'mer, oun nay nashrans t'mare djia pengri zoor. Hako bersh vell vavar djoungelo koova rakedo: Bari zoryah djan le ap i tiknende an kava them, oun yek ray djal ap o vavareste.

Daniel 2:35

Koy djas i tseli figura paash. Oun o saster, i phoubyakri čik, o lolo saster, o roup oun o sonakay peran khetne an tikne kotya. Oun i dourho phourdas len krik har phouss. Oun kek nay hatsas len bouder. Oun ko bar, hoy koy figura khetne das, vas i bari berga, oun las i tseli phoub dren.

Habakuk 3:2

Baro Devel, me shounom, hoy tou lauter kral, Har baro hal tou, baro Devel! Kre savo koova pale an maro tsiro, savo baro koova, mouk les men ninna te dikell an maro tsiro! An tiri rholi biste gar tiro kamlepen!

Mateo 1:23

I terni čay, kay gomme kek morshestar an tapedo vas, lella i ternepen. Oun yon denn les o lab Emmanuel. Kova kharella: O Devel hi mentsa.”

Mateo 28:20

Penenn lenge, te rikrenn le ap lauter, hoy me t'menge penom! Čačepah, me hom pash t'mende hako dives yaake rah, har i phoub koy hi.”

Bičepangre 18:10

Me hom pash toute oun kek nay doukrell tout. An kava foro hi boud menshe, kay kamenna ap mande te patsell.”

1. Korintarja 11:32

Te lah mer i phagi o Deblestar, palle krell yob kova, te djas mer gar khetne i vavar menshentsa nashedo.

2. Timoteo 4:17

O ray Yezous his ap miri rig, oun das man i zoor, te nay penap kote o tselo lačo lab lestar, yaake te shounan les ninna kolla, kay hi kek bibolde. Oun yob las man yaake dran lengre vasta vin, har te voms dran i leveskro mouy vin lino.

Josua 1:5

Kek nay vell zorleder har tou, yaake rah har tou djiveh. Yaake har me o Moseha homs, yaake vau me touha. Me moukau tout gar, oun me djau gar toutar.

Josua 1:9

Penau touke pale: Ab zoreles! Oun ma traash gar! Ma dare či! Oun ma traash kekestar! O baro Devel hi tiro Devel oun hi touha, kay tou ninna djah.”

Debleskro tsiro 3:19

Lauteren, kay kamau o djiyestar, kolende sikrau lengri doosh, oun penau lenge daventsa, te shounenn le ap mande. Moukenn kanna t'maro čilačo drom, oun avenn pale ap miro drom!