Jeremia 29:14 - O Debleskro Lab 2024 (Sinte-Manouche)

¹⁴ palle moukau man t'mendar te hatsell, penell o baro Devel. Oun me lau t'men dran t'maro pandepen vin, oun anau t'men khetne dran i tsele menshende oun themma, kay tradom t'men, penell o baro Devel. Oun me anau t'men pale an kava them, kay moukom t'men krik te anell.

O Debleskro Drom 2021 (Sinte)

¹⁴ palle mukau man tumendar te hatsell, penell o baro Dewel. Un me lau tumen dran tumaro pandepen win, un anau tumen khetne dran i tsele menshende un themma, kai tradom tumen, penell o baro Dewel. Un me anau tumen pale an kau them, kai mukom tumen krik te anell.

Jeremia 29:14 ပူးပေါင်းရင်းမြစ်များ

1. Familjakro liil 28:9

Oun tou, miro čavo Salomo, pats ap o Debleste tiro dadestar, te vell yob tiro Devel. Kre tiro tselo djiyeha, hoy lo touke penell! Yob dikell an i menshengre djia, oun hayvell, hoy an lengre sherya trouyel djal. Te rodeh les, hatseh les. Te moukeh les, čivell lo tout pale hako tsireske.

Debleskri gili 126:1

I gili te givell ap o drom an Yerusalem. Har anas men o baro Devel pale pash i berga Sion, hams mer har save, hoy souni denna.

Debleskri gili 126:4

Baro Devel, an pale lauteren mendar, kay pandle hi, yaake har tou aneh kol tikne panya pale, an o them, kay o kham pralstounes hi.

Debleskri gili 32:6

Doleske mangenn tout lauter kolla an, kay tiro hi, an ko tsiro, kay taprell len i daar. Palle, te venn i bare panya, nay taprenn le len gar.

Debleskri gili 46:1

I gili yekestar, kay hi dran i familya Korah. Kay gili hi o rayeske pral i gipangre, te givell lo lat har koy gili terne ča.

Jesaja 14:1

O baro Devel krell peskro dji peskre menshenge pre. Oun pale rodell lo peske i Israelitaryen vin, oun moukell len an pengro them te djivell. Oun vi-themarya venna oun djivenna khetne lentsa.

Jesaja 43:5

Ma dare! Me hom touha! Me anau kolen, kay toutar hi, khere dran i themma, kay kote hi, kay o kham pre djal, oun kay o kham tele djal.

Jesaja 43:6

Ap i rayende pral i themma, hoy hi serves oun čačes toutar, penau: De kay! Ma rike len pale! Anenn mire čaven oun čen foun doural, anenn len dran i palstoune themma i phoubyatar!

Jesaja 45:19

Me rakrom gar čorrhanes an i khatepen, kay kek shounell, oun penom gar ap o Yakobeskre čavende: Rodenn man čičeske! Me, o baro Devel, rakrau o čačepen, oun penau t'menge, hoy čačo hi.

Jesaja 55:6

Rodenn o baro Debles yaake rah yob moukell pes te hatsell! Denn les an-gole yaake rah yob gar dour hi!

Jeremia 12:15

Pal kova, kay anom kol vavar menshen dran lengro them, krau me lenge miro dji pale pre, oun anau len pale an lengro them, kote, kay yon glan ko tsiro djivan.

Jeremia 3:14

Avenn pale, t'mer čave, kay nashan mandar krik, penell o baro Devel. Me hom t'maro ray. Me kamau t'mendar te lell yekes dran hako foro oun douy dran haki familya, oun kamau t'men an Sion te anell.

Jeremia 30:10

Doleske ma dare, tou, miro boudepaskro Yakob! Ma traash, Israel, penell o baro Devel. Shoun, me lau tout oun tire čaven vin dran ko dour them, kay pandle han. T'mer venn khere an t'maro them. Kote djal t'menge mishto. Kek krell t'menge kote čilačepen. Či hounte krell t'menge daar.

Jeremia 30:18

Kova penell o baro Devel: Me anau mire menshen pale khere an pengro them, oun krau miro dji haki familyake pre. Oun o foro Yerusalem vell pale pre-čiddo ap peskre berge, oun o baro rayeskro zorelo kheer kote, kay lo tardo his.

Jeremia 30:3

Dik, o tsiro vella, kay lau o pandepen krik mire menshendar, o kherestar Israel oun o kherestar Youda, penell o baro Devel; Oun me anau len pale an ko them, hoy lengre phourende dom, te vell kova lengro them.

Jeremia 31:16

Kanna penell o baro Devel: Mouk tiri gole oun tiro ropen! Khosse tire sva! Kova, hoy kral tire čavenge, his gar čičeske, penell o baro Devel. Yon venn pale pale dran o them, kay van le tele rikedo.

Jeremia 31:17

Tire čave, kay pal toute venna, venn pale khere. Oun boud lačepen vell ap lende.

Jeremia 31:23

Kova penell o baro Devel, ko ray pral o bolepen oun i phoub, kay o Israeleskro Devel hi: “An ko tsiro, kay anau len pale dran kol themma, kay yon pandle his, penenn i menshe dran i forya an o them Youda: O baro Devel mou čivell peskri barht ap toute, tou them, kay o čačepen khere hi, oun o Devel ap peskri berga djivell.

Jeremia 51:10

[I Israelitarya penenn:] O baro Devel sikras, kay ham an o čačepen tardo. Avenn, te djas ap i berga Sion, te penas, hoy maro baro Devel lačo koova kras.

Jeremia 8:3

Oun lauter kolla, kay pral ačan kal čilače menshendar, kay djivenn kote, kay me len tradom, lenge vals o merepen feteder har o djipen. Kova penell o baro Devel, ko ray pral o bolepen oun i phoub.

Ezekiel 37:21

Oun pen ap lende: Kava penell o baro Devel, maro ray: Denn yak, me lau i Israelitaryen dran kol tsele themma vin, an kolende yon hounte djan, oun lau len khetne haki rigyatar, oun anau len pale an lengro them.

Ezekiel 39:25

Kanna krau, penell o baro Devel, maro ray, te vell lauter pale mishto o Yakobeske, oun krau miro dji pre o tselo khereske Israel. Miro tselo djiyeha krau, te vell bouder gar djoungeles rakedo pral mande.

Amos 9:14

Me anau mire menshen Israel pale an lengro them. Oun yon krenn i tele-phagede forya pale neves, oun djivenn koy dren, oun čivenn drakengre rouka an i phoub, oun piyenn lengri mool, čivenn rouka an i phoub oun rhan lengre roukengre.

Micha 4:12

Yon djinenn gar, hoy o baro Debles lentsa glan hi. Yon hayvenn gar, te anas lo len kate khetne, har djob, hoy vin dino vell.

Zefanja 3:20

An ko tsiro anau t'men khere. oun anau t'men khetne. An ko tsiro dikenn t'mer: Me krau, te vell t'menge pale lauter mishto. Me krau t'men bares oun an-dikles an i tsele themma ap kay phoub. Kova penell o baro Devel.

Remarja 10:20

O Yesaya trashas gar te penell, hoy o Devel pral lende penas: Me moukom man kolendar te hatsell, kay rodan man gar. Oun sikrom man kolende, kay gar pal mande poučan.

5. Mose 30:1

Kanna penom t'menge kal tsele laba, te nay rodenn vin: Kamenn t'mer, te vell o Debleskri barht pral t'mende? Kamenn t'mer te vell leskro praasepen pral t'mende? Te vell koy bibarht pral t'mende, oun t'mer djivenn an i vavar themma, kay t'maro baro Devel t'men tradas, venn t'menge kal laba an o dji.

5. Mose 30:3

palle krell t'maro baro Devel peskro dji t'menge pre oun lell t'men dran o pandepen vin. Oun yob anell t'men pale khetne oun pale pale dran i tsele themma, kay lo t'men tradas.

5. Mose 30:5

T'maro baro Devel anell t'men an ko them, koles t'mare phourenge his. Oun t'mer lenn les t'menge dren. Oun yob dell t'men boud bravlepen, oun krell t'mendar boudeder har t'mare phoure his.

5. Mose 4:7

Kay hi savi bari natsyona, kolenge lengro devel ap i rig vell, har menge maro baro Devel ap i rig vell hako kopo, kay dah mer les an-gole?