Jeremia 17:26 - O Debleskro Lab 2024 (Sinte-Manouche)

²⁶ Oun menshe venna dran kol forya o themestar Youda, oun dran i gaba troul Yerusalem, oun dran o them Benyamin oun dran kol tikne oun bare berge oun dran o them Negev. Oun yon anenn an o baro Debleskro kheer firhen rhačepaske oun rhapaske, djob oun kouč soungepaskro koova, oun vavar koova, koleha parkrenn le pen pash o baro Debleste.

O Debleskro Drom 2021 (Sinte)

²⁶ Un menshe wenna dran kol forja o themestar Juda, un dran i gaba trul Jerusalem, un dran o them Benjamin un dran kol tikne un bare berge un dran o them Negev. Un jon anenn an o baro Debleskro kheer viechen chatchepaske un chapaske, djob un kutch sungepaskro koowa, un wawar koowa, koleha parkrenn le pen pash o baro Debleste.

Jeremia 17:26 ပူးပေါင်းရင်းမြစ်များ

Esra 3:11

Oun yon givan, sharan oun parkran pen pash o baro Debleste: “Yob hi lačo oun leskro kamlepen hi an hako tsiro pral Israel.” Oun i tsele menshe dan gole i barhtyatar, har parkran le pen pash o baro Debleste doleske, kay i telstoune barra leskro khereske čiddo his.

Debleskri gili 107:22

Ninna hounte anenn le leske shoukar koova, te parkrenn le pen pash leste. Oun i barhtelo djiyeha hounte rakrenn le kolestar, hoy yob lenge kras.

Debleskri gili 116:17

Pash toute kamau me man te parkrell, oun tout an-mangell.

Debleskri gili 66:13

Doleske kamau an tiro kheer te djal, te anap touke firhen, hoy touke rhačedo venna. Kamau te dap tout, hoy dom man sovel glan toute.

Jesaja 58:13

Te rikreh tire herya pale, te djas gar ap i boudi ap o Debleskro dives, oun djah gar i lovenge palla ap ko dives, hoy mange hi, oun peneh: Kova hi miro shoukeder dives, kay sharau o baro Debles oun mangau les an, te shareh les tou yaake, te djas gar ap i boudi oun kek lovenge palla, oun kreh kek bare laba,

Jeremia 30:19

Oun i menshe, kay djivenn kote, givenn sharepaskre gilya, oun denn gole i barhtyatar. Oun me dau len boud čave, te venn le boudeder. Me krau len rayles oun bares oun gar tikneder.

Jeremia 32:44

Ava, kotya them venn ginlo, oun ginepaskre lila venn činlo. Kal lila venn pandlo oun i sikepen pre-čiddo, oun morsha hi kote pashel, te vell lauter čačes kerdo. Kova lauter vell yaake kerdo an o them Benyamin, an i gaba troul o foro Yerusalem, an vavar forya an o them Youda, ninna an i forya ap i bare oun tikne berge, oun an i forya an o them Negev. Me krau, te vell pale lauter mishto mire menshenge, penell o baro Devel.

Jeremia 33:11

kote vell pale sapen shounlo oun barhteli gole. O pirno oun leskri pirni, kay i biyab krenn, givenn pale. Oun vavar anenn firhen an miro kheer, te parkrenn le pen pash mande, oun givenn koy pashel: Parkrenn t'men pash o baro Debleste, ko rayeste pral o bolepen oun i phoub; yob hi kamles ap mende. Hako tsiro hi leskro lačepen menge koy. Me krau te djal kava themeske pale yaake mishto, har leske glan kova djas.

Jeremia 33:13

Oun i bakrengre ginenn pale pengre bakre, kitse yon hi, te djan le vin oun dren glan kol forya, kay hi ap i bare oun tikne berge, oun an o them Negev, oun an o them Benyamin oun troul Yerusalem, oun an i forya o themestar Youda. Kova penell o baro Devel.

Zakarie 7:7

Kava hi kova, hoy o baro Devel moukas te penell dran o mouy leskre rakepangre, kay glan mande koy his, har o foro Yerusalem bravelo his, oun boud menshe kote djivan, ninna an i forya trouyel oun an ko moulo them, hoy kharell Negev, oun an o telstouno them.

Hebrearja 13:15

Dran kova parkras men pash o Debleste, sharas les hako tsiro, oun kras o Yezouseskro lab bares.

1. Petro 2:5

Ninna t'mer han save djide barra. T'mentsa kamell o Devel peskro kheer pre te čivell. Yob rodas t'men vin, te venn t'mer leskre rashaya, oun te venn leske koy. An t'mende das o Yezous Kristo peskro Dourho. Doleske nay sharenn o Debles yaake, har yob kova kamella.

Debleskro tsiro 1:5

Lačepen oun barht t'menge! Kova dell t'men o Yezous Kristo! Yob sikrell i menshende o čačo drom pash o Debleste. Oun yob hi o glanstouno lauterendar, kay stenn i moulendar pre oun venn djido. Oun yob hi ninna o ray pral i tsele raya ap kay phoub! Yob kamell men o tselo djiyestar, oun las men dran mari doosh vin, oun playsras menge peskro rateha.