Hiob 5:5 - O Debleskro Lab 2024 (Sinte-Manouche)

⁵ Ko djob, hoy yob činas oun dren anas, kova rhan kolla pre, hoy bokenn. Ninna kova, hoy mank i soubyengre bourra bares vas, lan le penge. Bokle menshe rhan leskro bravlepen.

O Debleskro Drom 2021 (Sinte)

⁵ Ko djob, hoi job tchinas un dren anas, kowa chan kolla pre, hoi bokenn. Ninna kowa, hoi mank i subjengre burra bares was, lan le penge. Bokle menshe chan leskro brawlepen.

Hiob 5:5 ပူးပေါင်းရင်းမြစ်များ

2. Familjakro liil 33:11

Doleske moukas o baro Devel i pralstunen pengre lourdentsa dran o them Assour pral lende te vell; kolla tapran o Manasse i sasteha oun pandan les shellentsa dran lolo saster, oun anan les an o them Babilonia.

Hiob 1:15

Kote peran kolla dran o them Saba pral mende, oun randan i firhen oun dan tire boudepangren o rhareha moulo. Oun me nay nashom, me kokres, te nay penap kova touke.”

Hiob 1:17

Har ko boudepaskro gomme rakras, vas i vavar oun penas: “I Kaldearya van ap triin rigya oun peran pal tire khamele dren oun lan len penge krik, oun dan tire boudepangren o rhareha moulo. Oun me nay nashom, me kokres, te nay penap kova touke.”

Hiob 12:6

I khera kolendar, kay i vavaren zoryah tele rikrenn, hi zoreles tardo. Oun kek krell kolenge daar, kay krenn savo koova te vell o Devel rhoyedo, Yon patsenn, te hi len o Devel an pengro vast.

Hiob 2:3

Oun o baro Devel poučas o bengestar: “Dal tou ninna yak ap miro boudepaskro, o Hiob? Kek vavar hi ap i phoub, kay hi yaake har kova. Yob hi an o čačepen tardo, oun kek doosh hi ap leste. Yob mangell man an, oun rikrell pes dour krik o čilačepastar. Ninna kanna anell lo kek doosh ap peste, kay tou mandar kamal, te anap les an i bibarht, ninna te kras lo či.”

Hiob 20:15

Leskro randedo koova hi har i rhapen, hoy hounte čadell lo pale vin. O Devel lell ko randedo koova lestar krik.

Hiob 20:22

An ko tsiro, kay les an lauter boudeder har doha hi, vell i daar pral leste. I phari bibarht dell les tele.

Hiob 22:10

Doleske djal touke kanna, har te vals pandlo an i netsa. Oun tou trisseh i daryatar, hoy tout ap yek kopo tapras.

Debleskri gili 109:11

Kova, kay leske love patsas, kova lell lestar lauter, hoy les hi. Menshe, kay gar lestar hi, lenn lauter, koleske yob boudras.

Jesaja 62:8

O baro Devel das pes sovel oun das peskro čačo vast pre, oun hadas peskri zoreli moussi, oun penas, te dell kek tsiro bouder, kay moukell lo kolen tiro djob te rhal, kay kourenn pen touha, oun vitar gar i menshen dran vavar themma tiri mool te piyell, kolake tou yaake phares boudral.

Jeremia 51:34

O foro Yerusalem penell: O Neboukadnezar, ko baro ray dran o them Babilonia, rhas man pre oun maras man. Har i baro panyeskro sap rhas lo man, oun kras peskro per pesso miro bravlepah. Palle vitsras lo man krik har i khoro, kay či dren hi. “Mou vell pral o foro Babilon ko čilačepen, hoy vas menge ninna kerdo”, penenn i menshe ap i berga Sion. “I Babilonarya moukan maro rat te nashell. Kanna mou nashell lengro rat!”

Jeremia 51:44

O baro Devel penell: Ava, me dom o rhorheno debles Bel an o them Babilonia peskri phagi, oun tserdom dran leskro mouy kova, hoy yob pre rhas. I menshe dran vavar themma nashenn leske bouder gar palla. I massurya o forestar Babilon peran khetne.

Ropaskre gilja 2:16

Halauter, kay ap toute čilačo hi, krenn pengro mouy dour pre pral toute, denn shol, oun sikrenn touke pengre danda. “Mer dam les khetne”, penenn le. “Ava, kava hi kava dives, kay mer kamam, te vell lo! Mer lam, hoy kamam.”

Ropaskre gilja 2:5

O baro Devel vas har yek, kay hi čilačo ap mende. Yob das o them Israel khetne. Yob phagas i tsele shoukar khera tele oun kras i zorele forya paash. Boud ropen oun doukepen anas lo pral o them Youda.

Hosea 8:7

Kova, hoy le krenn, hi har te čivans le i dourho an i phoub oun kek djob. Oun hoy vin vell, hi i baro phourdepen. Kek djob vell baro. Kova hoy pre djal, anell kek yarro. Oun te anals kova yarro, vans vavar menshe oun rhans les pre.

5. Mose 28:33

Lauter, hoy ap tiri harhetikri phoub baro vas, koleske tou phares boudral, rhan save menshe, kay venn dran i dour them. Oun tou veh zoryah tele rikedo, oun hounte boudress tel douka tiro tselo djipen.

5. Mose 28:51

Oun yon rhan t'mare firhen. Oun halauter, hoy ap t'mari phoub bares vas, rhan le pre. T'menge moukenn le či pral, kek djob, kek mool, kek djet oun vitar kek terne t'mare groumyendar, bakrendar oun bouzyendar. Yaake hounte merenn t'mer i bokatar, bis te kek t'mendar bouder koy hi.

Čačepangre 6:11

Oun ko baro Debleskro bolepaskro vas, oun beshas pes tel ko baro rouk, hoy pash i platsa his, hoy kharella Ofra. Koy platsa his o Yoashes dran i familya Abiyeser. Oun leskro čavo Gideon his an ko kashteskro, hoy kerdo his, te krenn le mool dran i drake. Oun kote das lo khatemen o djob vin, te nay taprenn i Midianarya gar ko djob ninna.