Hebrearja 5:7 - O Debleskro Lab 2024 (Sinte-Manouche)

⁷ Har o Yezous ap i phoub djivas, kras lo lauter, hoy o Devel kamas. Doleske shounas les o Devel. An i daar mangas o Yezous o Debles i ropah oun bari golyah. Yob djinas, kova nay lell les dran o merepen vin.

O Debleskro Drom 2021 (Sinte)

⁷ Har o Jesus ap i phub djiwas, kras lo lauter, hoi o Dewel kamas. Doleske shunas les o Dewel. An i daar mangas o Jesus o Debles i ropah un bari goljah. Job djinas, kowa nai lell les dran o merepen win.

Hebrearja 5:7 ပူးပေါင်းရင်းမြစ်များ

Debleskri gili 22:24

T'mer, kay o baro Debles an-mangenna, sharenn les! T'mer lauter dran o kheer Yakob, hadenn les pre! Oun darenn lestar, t'mer lauter dran o kheer Israel!

Debleskri gili 69:1

I gili o rayeske pral i gipangre, te givell pash o bashepen ap i shob-doryengri bashepaskri. Kay gili kras o David.

Debleskri gili 88:1

I gili o rayeske pral i gipangre, te givell har koy gili Mahalat Leannoth. Kay gili kras yek dran i familya Korah. O Heman dran i familya Esra činas kal laba.

Jesaja 49:8

Kava penell o baro Devel: Har his o tsiro mishto, shounom ab tiri gole. Har vas ko dives, kay lom tout vin dran i bibarht, vom ap tiri rig. Oun me dom yak ap toute. Me lom tout: – te vess i drom, kay nay venn i menshe dran hake themma pash mande, – te čivess pale o them pre tardo, – te dess tou lende kol kotya them, hoy lenge hi, oun kanna mouklo hi,

Jesaja 53:11

Yob las yaake boud daar oun douka ap peste, doleske dikell yob ninna i momeli, oun leskro dji vell čalo. Miro boudepaskro hi tardo an o čačepen. Oun dran kova lauter, hoy ap leste vas, nay čivell yob ninna boud menshen an o čačepen. Oun lengri doosh lell yob ap peste.

Jesaja 53:3

I menshe dikan tele ap leste, oun čivan les ap i rig. I morsh pherde douka oun nasslepen his lo. I grerho his lo lenge, glan koleste yon pengro shero krik rissran. Oun menge his lo či-moldo.

3. Mose 2:2

Oun yob anell kova pash i rashayende dran o kheer Aron. Yek lendar lell i vast pherdo yarro o djeteha oun ko tselo soungepaskro koova, oun moukell kova ap i rhačepaskri te rhačrell. Kova sikrell, kay ko tselo rhapen, hoy anlo vas, o Debleske hi. Oun o lačo soungepen, hoy vell vin, soungell mishto o baro Debleske.

Mateo 27:46

Oun har trinenge his, das o Yezous bari gole: Eli, Eli, lema sabaktani? Kova kharella: Miro Devel, miro Devel, hoske moukal man tou?

Mateo 27:50

O Yezous das pale bari gole, oun meras.

Markus 15:34

Oun har trinenge his, das o Yezous bari gole: Eloy, Eloy, lema sabaktani? Kova kharella: Miro Devel, miro Devel, hoske moukal man tou?

Markus 15:37

Oun o Yezous das bari gole, oun meras.

Louka 23:46

Oun o Yezous das bari gole: “Miro dad, an tire vasta čivau me miro djipen!” Oun palle meras lo.

Johanni 1:14

Ko lab vas i mensho, oun djivas pash mende. Oun mer dikam leskro raylepen oun leskri zoor, kay o Devel peskro čaves das. Kova his pherdo lačepen oun čačepen.

Johanni 11:35

Oun o Yezous rovas.

Johanni 11:42

Me djinau, kay tou man hako tsiro shouneh. Me penau kava kol boud menshenge, kay hi kay tardo, te dikenn le oun te patsenn le, kay tou man bičral.”

Johanni 17:1

Pal kol laba dikas o Yezous pre an o bolepen oun penas: “Tata, o tsiro hi kay. Sike, havo raylepen oun havi zoor tou tiro čaveste dal, te sikrell yob ninna tiro raylepen oun tiri zoor!

Remarja 8:3

O Moseskre laba nay dan ko djipen gar. I menshe nay kran kova gar, hoy an o Moseskre lila činlo hi. Ko čilačepen, hoy an lende his, moukas len gar te krell, hoy o Devel lendar kamas. Doleske penas o Devel: “O čilačepen hounte merell.” Oun yob bičras peskro čaves, te vell lo i mensho har mer, kay čilačo ham. Yob las maro čilačepen ap peste oun meras. Oun yaake meras o čilačepen leha oun nashras peskri zoor pral mende.

Galatarja 4:4

Har ko čačo tsiro vas, bičras o Devel peskro čaves. Kova vas i mensho, oun pandlo ap o Moseskre laba.

1. Timoteo 3:16

Čačepah, an maro patsepen hi i baro čačepen: O Debleskro čavo vas i mensho. Hoy yob kras, hi čačo. Ko sikras men o Debleskro Dourho. I bolepangre dikan ap leste. An i tsele themma rakran le lestar. Ap i tseli phoub patsan le ap leste. An o bolepen las les o Devel pash peste.

Hebrearja 10:10

Har o Yezous Kristo ap o troushel menge meras, kras lo kova, hoy o Devel kamas. Oun mari doosh las lo yek kopo hako tsireske mendar, oun yob kras men yaake djoudjo oun erligo glan o Debleste.

Hebrearja 10:5

Doleske penas o Yezous Kristo, har yob ap i phoub vas, ap o Debleste: Mo Devel, marede firhen oun vavar koova kamal gar. Na-a. Man moukal i mensho te vell.

Hebrearja 11:7

Ninna o Noah patsas, hoy o Devel penas, har yob leha rakras, oun leste sikras, hoy pral i tsele menshende vella. Ninna te dikas o Noah kova gomme gar, shounas lo ap o Debleste, oun kras i baro panyeskro kheer. Yaake hounte meras yob peskre menshentsa gar. Har o Noah ko panyeskro kheer kras, vas diklo, te patsas yob, hoy o Devel penas. Ninna vas diklo, i vavar menshe patsan gar, hoy o Devel penas. Doleske hounte meran le. Ap o Noah penas o Devel: Tou patsal man. Tou hal kanna an o čačepen tardo glan mande.

Hebrearja 12:28

O Debleskro them an o bolepen, kay khere ham, ačell zoreles tardo, oun kote djah mer. Doleske parkras men pash o Debleste, shounas ap leste, daras lestar oun kras, hoy yob kamella!

Hebrearja 13:20

O Devel kras i drom, te nay vah pash leste. Yob kras o Yezouses, maro rayes, i moulendar djido. Kova ratas peskro rat menge, te nay vah pash o Debleste, oun djivah hako tsiro leha khetne. O Yezous vas maro baro bakrengro. Kova dell yak ap mende, har i bakrengro dell yak ap peskre bakre.

Hebrearja 2:14

Yon hi menshe dran rat oun mass. Doleske vas lo ninna i mensho har yon, oun meras, te las lo o bengeske i zoor krik pral o merepen.

1. Johanni 4:3

Koon kova bourhoste della, an koleste hi gar o Debleskro Dourho. Yaake rakrell o rhorheno, kay hadell pes pral o Yezous Kristeste. T'mer shounan, kay kova vella. Yob hi kanna ap kay phoub.

2. Johanni 1:7

Boud rhorhene sikepangre nashenn ap i phoub trouyel, kay kamenn i patslen o čačo dromestar tele te anell. Yon penenna, kay vas o Yezous Kristo gar i mensho dran mass oun rat. Kol sikepangre venna gar o Deblestar. Yaake har yon rakrenna, yaake rakrell ninna ko rhorheno, kay hadell pes pral o Yezous Kristeste.