Hebrearja 2:3 - O Debleskro Lab 2024 (Sinte-Manouche)

³ Mer te djah gar ap o nevo drom, kay lah o djipen, hoy gar pre-herella, palle vella o Debleskri rholi pral mende. Kava nevo drom sikras men maro ray Yezous. Oun leskre laba hi o čačepen. Kolla, kay les shounan, penan les menge.

O Debleskro Drom 2021 (Sinte)

³ Mer te djah gar ap o newo drom, kai lah o djipen, hoi gar pre-herella, palle wella o Debleskri choli pral mende. Kau newo drom sikras men maro rai Jesus. Un leskre laba hi o tchatchepen. Kolla, kai les shunan, penan les menge.

Hebrearja 2:3 ပူးပေါင်းရင်းမြစ်များ

Jesaja 12:2

O Devel lell man dran i bibarht vin. Me rikrau ap leste, oun darau gar. Peskri zoryah vas o baro Devel ap miri rig. Miri gilyah sharau les dran o dji. Yob las man vin.

Jesaja 20:6

Palle penenn kolla, kay pash o baro pani djivenn: Hi kolla kal menshe, pash kolende nasham, te lenn le men vin dran i vasta o baro rayestar pral Assour? Koon nay lell men kanna gomme koy vin?

Jesaja 51:5

O tsiro, kay miro čačepen vell, hi gar dour. Oun ko dives vell sik, kay lau t'men vin dran o čilačepen. Oun me vau o čačepaskro ray pral i vavar themma. I menshe, kay djivenn pash o baro pani, dikenn ap mande, te lap o kourepen krik.

Jesaja 51:8

Lenge djal har i ripen dran bakrengro bal, hoy i kirme paash rhan. Miro čačepen ačell hako tsiro tardo, oun hako tsireske lau t'men dran i bibarht vin.

Jesaja 62:11

Dikenn, o baro Devel moukell kal laba te shounell ap i tseli phoub: Penenn i menshenge an o foro Yerusalem: Kova, kay lell t'men vin dran o čilačepen, hi ap o drom. Kolen yob peske khetne anas, kolla hi pash leste. Ava, kolen yob peske ginas, kolla djan glan leste.

Ezekiel 17:15

I tsiro koy pre hadas pes o ray o themestar Youda, oun bičras morshen an o them Egiptia, te bičrenn le leske graya oun lourden. Djal kova mishto? Lell yek, kay savo koova krell, kek phagi? Nay phagell lo peskri sovel, oun lell kek phagi?

Ezekiel 17:18

O ray pral Youda phagas peskri sovel. Oun kova, hoy lo vin kras ko baro rayeha dran Babilonia, oun ap kova yob peskro vast das, rikras lo gar dren. Kava tselo koova kras yob. Doleske vell lo gar vin lino dran i bibarht.

Mateo 23:33

T'mer han sapa. Ava, čilače sapa han t'mer. O Devel vitsrell t'men an o bengeskri yag. Oun t'mer nashte nashenn gar glan koleste krik.

Mateo 4:17

Ap ko tsiro penas o Yezous ap i menshende: “Moukenn t'maro čilačo drom, oun djan ap o Debleskro drom! O tsiro vell sik, kay lell o Devel i menshen dran o čilačepen vin.”

Markus 1:14

Har o Yohanni stildo vas, djas o Yezous an o them Galilea, oun sikras i menshende o Debleskro drom.

Louka 1:2

Yon činan pre, hoy kolla penan, kay kote pashel his oun kova lauter dikan.

Louka 1:69

Yob bičras menge yek zoreles, te lell yob men dran o čilačepen vin. Oun kava vella o Davideskre menshendar.

Louka 24:19

Oun o Yezous penas: “Hoy djas?” Oun yon penan: “Kova, hoy kran le o Yezouseha dran Nazaret. Yob his o Debleskro rakepaskro, ap koleste o Debleskri zoor his. O Devel bičras les. Kova dikas hakeno ap kova, hoy yob penas oun kras.

Johanni 15:27

Ninna t'mer, kay hans o tselo tsiro pash mande, penenn i menshenge mandar, hoy t'mer dikan oun shounan.”

Bičepangre 1:22

ko tsirestar, kay moukas yob pes o Yohannestar te taufrell, bis ap ko dives, kay vas lo mendar an o bolepen lino. Kava morsh hounte penell mentsa khetne i menshenge, kay o Yezous i moulendar pre stas.

Bičepangre 2:22

Morshale dran Israel, shounenn kal laba, hoy penau t'menge! O Devel bičras ko morshes, o Yezouses dran Nazaret, pash t'mende. Kova kras baro oun zorelo koova mank t'mende, hoy kek vavar nay krella. Yaake sikras o Devel, kay o Yezous lestar vas. T'mer djinenn kova, oun dikan kova lauter.

Bičepangre 4:12

Kek vavar har o Yezous kokres nay anell men pash o Debleste. Ap i tseli phoub das o Devel kek vavares, kay nay lell men dran o čilačepen oun o merepen vin.”

Remarja 11:14

Me kamaus, te zilverenn mire menshe ap t'mende, te anap nay kolendar ninna ap o Yezouseskro drom.

Remarja 2:3

Tou te sikreh ap i vavarende, kay savo koova krenna, oun tou kreh kova ninna, patseh tou čačepah, tou nay nasheh o Debleskri rholyatar krik?

1. Korintarja 1:21

Ninna te dikenn i menshe o Debleskro gosvepen an halauter, hoy yob kras, prindjran yon pengro gosvepah o Debles gar. Doleske hatsas o Devel i vavar drom. Yob lell kol menshen dran o čilačepen vin, kay patsenn ap o rakepen pral o Yezouseskro merepen ap o troushel. Kol vavar menshe, kay gar patsenna, penenna: “Kova hi i dinelo rakepen, hoy t'mer kate rakrenna.”

1. Tessalonikarja 5:3

Te penenn i menshe: “Lauter hi mishto, kek kourepen hi kay, oun men hounte vell kek daar”, palle vell i bibarht pral lende, oun yon nay nashenn gar krik. Koy bibarht vell pral lende yaake sik, har i douka venn pral i djouvyate, kay lell i ternepen.

1. Timoteo 1:15

Hi čačo, hoy kanna penau. Oun t'mer nay patsenn man: Maro ray, o Yezous Kristo, vas ap kay phoub, te anell lo kolen ap o drom pash o Debleste, kay dour lestar an o čilačepen djivenna. Kolendar hom me o djoungleder.

Tito 2:11

Yaake sikras o Devel, har baro peskro lačepen i tsele menshenge hi. Yob kras i drom, te lell lo len dran o čilačepen oun o merepen vin.

Hebrearja 1:1

An o phouro tsiro rakras o Devel boud kope yaake te yaake ap peskre rakepangre, oun bičras len pash mare phourende, te penenn le lenge leskre laba.

Hebrearja 1:14

I tsele bolepangre hi leskre boudepangre. Kolen bičras o Devel ap i rig kolendar, kay djan ap o Debleskro drom, te lenn le o Debleskro djipen, hoy gar pre-herella.

Hebrearja 1:2

Kanna, an kava tsiro, bičras lo peskro čaves pash mende, te rakras yob ap mende. Koleste das o Devel lauter an leskre vasta, te vell yob o ray pral lauter. Koleha kras lo o bolepen oun i phoub.

Hebrearja 12:25

Denn yak, te shounenn ap o Debleste, kay ap t'mende rakrella! Har yob ap i phoub ap i phoure Israelitarya rakras, kaman le gar ap leste te shounell, oun leskri rholi vas pral lende. Kitse boudeder vell o Debleskri rholi pral mende, te shounah gar ap leste, kay dran o bolepen rakrella.

Hebrearja 4:1

Dran kova denn mishto garda, te dell kek t'mendar peskro patsepen pre! An o phouro tsiro penas o Devel peskre menshenge, te dell lo len i them, kay yon hako tsiro khere hi. Kava lab, hoy o Devel lenge penas, ačell menge ninna. An o phouro tsiro shounan le les, oun patsan les gar. Yaake van le gar an o Debleskro them.

Hebrearja 4:11

Doleske čivas mer maro tselo dji koy pre, te vas an leskro them dren, kay ham hako tsiro pash leste khere. Das yak, te perell kek mendar o Debleskro dromestar tele, har kol menshe an o phouro tsiro, kay shounan gar ap o Debleste!

Hebrearja 5:9

Oun yob kras kova lauter, oun či ačas pral, hoy hounte krals lo gomme. Yaake nay lell lo lauteren, kay ap leste shounenna, hako tsireske dran o čilačepen oun o merepen vin.

Hebrearja 9:28

yaake hounte meras o Yezous Kristo yek kopo i menshenge, te lell lo i doosh boud lendar ap peste. Ap ko tsiro, kay vell lo i douyto kopo, vell lo gar, te lell lo i doosh i menshendar krik. Na-a. Palle vell lo kolenge, kay čivan pengro dji ap leste, te lell lo len pash peste, oun te dell lo len lauter kova, hoy hi lenge an o bolepen.

1. Johanni 1:1

Mer činah t'menge pral koleste, kay his hako tsiro koy. Mer shounam les, oun dikam les. Ava, mer dikam les mare yakentsa, oun tapram les mare vastentsa. Yob hi ko lab, hoy o djipen della.

Judas 1:17

T'mer, mire phrala oun phenya, ma bistrenn kol laba, hoy t'menge kolla penan, kolen maro ray, o Yezous Kristo, bičras, te penenn le i menshenge leskre laba.

Debleskro tsiro 7:10

Oun yon dan zoreles gole: “Mer sharah maro Debles, kay ap o rayeskro beshepaskro beshdo hi oun ko terno bakres! Yon lan men vin dran o čilačepen oun o merepen.”