Hebrearja 10:30 - O Debleskro Lab 2024 (Sinte-Manouche)

³⁰ Mer djinah, kay o Devel penas: Me dau len ko čilačepen pale, hoy yon kran. Miri rholi vell ap lende. Oun pale hi činlo: O Devel rakrell o čačepen pral peskre menshende vin.

O Debleskro Drom 2021 (Sinte)

³⁰ Mer djinah, kai o Dewel penas: Me dau len ko tchilatchepen pale, hoi jon kran. Miri choli well ap lende. Un pale hi tchinlo: O Dewel rakrell o tchatchepen pral peskre menshende win.

Hebrearja 10:30 ပူးပေါင်းရင်းမြစ်များ

Debleskri gili 135:14

O baro Devel anell peskre menshenge o čačepen, oun krell peskro dji pre peskre boudepangre.

Debleskri gili 50:4

O Devel vell te rakrell lo o čačepen vin pral peskre menshende. Ap o bolepen oun i phoub dell yob gole:

Debleskri gili 94:1

Baro Devel, tou hal o Devel, kay o čilačepen pale deh kolenge, kay vavaren čilačepen kran. Ab, oun sike tout!

Debleskri gili 96:13

glan o baro Debleste. Yob vella. Ava, yob vella, oun anell o čačepen ap i phoub. Yob rakrell o čačepen vin pral i menshende an hake themma. Oun hi lengro čačepaskro ray, kay djal pal o čačepen.

Debleskri gili 98:9

glan o baro Debleste! Yob vella oun rakrell o čačepen vin pral i tseli phoub. Yob hi o čačepaskro ray pral i tsele themma, oun dell hakeneste pal kova, hoy lo kras.

Jesaja 59:17

Oun yaake har rivell i lourdo i sasterno gad an, yaake rivell yob o čačepen an. Oun yaake har i lourdo i sasterni stadi ap peskro shero čivell, yaake čivell yob o kourepaskri barht ap peste. Leskri rholi hi har i plaashka ap leste, te dell lo kolende pengri phagi, kay i vavarenge čilačepen kran.

Jesaja 61:2

Me vom bičedo, te dap vin gole, te vas ko bersh, kay sikrell o baro Devel peskro lačepen ap peskre menshende. Ninna vas ko dives, kay dell maro Devel hakenes ko čilačepen pale, hoy yob ap o them Youda kras. Yob bičras man, te khossap i sva tele kolenge, kay kanna rovenn.

Jesaja 63:4

An miro dji vas o dives, kay dau hakenes pale, hoy lo kras. Oun ko bersh vas, kay lau mire menshen dran o čilačepen vin.

Ezekiel 18:30

Doleske penau me, o baro Devel, t'maro ray: Me krau o čačepen vin pral t'mende dran o kheer Israel – pral hakeneste, yaake har djivas lo. Moukenn t'maro čilačo drom! Krenn bouder gar ko tselo čilačo koova, hoy kran, te anenn kek doosh ap t'mende.

Ezekiel 34:17

T'menge, mire bakre, penau: Me, o baro Devel, t'maro ray, krau o čačepen vin mashkral yek bakro oun o vavar bakro. T'mer morshkane bakre oun morshkane bouzya,

3. Mose 19:18

Ma de o čilačepen pale, hoy i vavar ap toute kras, oun hidje leske či palla. Tou vess yaake lačes ap leste, har hal lačes ap toute kokres. Me hom o baro Devel.

Nahum 1:2

O baro Devel hi i Devel, kay kamell, te mangenn i menshe kek vavar debles an har les kokres. Leskri rholi vell pral kolende, kay hadenn pen pral leste. Kolen, kay kamenn lestar či te djinell, dell yob i phagi. Oun bistrell gar, hoy yon ap leste kran.

Remarja 12:19

Mire kamle phrala oun phenya, ninna te kras yek t'menge čilačo koova, ma denn leske pale! Moukenn les! O Devel dell les i phagi. An o Debleskro lab hi činlo: O Devel penas: Me dau len pale. Me dau len i phagi.

Remarja 13:4

O Devel das len pengri boudi, te djal touke lačes. Tou te kre čilačo koova, palle hounte daress tou lendar. Hi gar čičeske, te vell len i zoor, te denn le i phagi. O Devel das len koy boudi, te denn le kolen i phagi, kay kran i čilačo koova.

2. Korintarja 5:10

Ap ko dives, kay rakrell o Yezous Kristo o čačepen pral mende vin, hounte vas mer halauter glan leste tardo. Oun hakeno lell pal kova, hoy yob kras, har djivas lo ap i phoub: lačo koova har čilačo koova.

1. Samuel 25:26

Oun kanna, miro ray, me dau man sovel glan o djido Debleste oun glan toute: O baro Devel rikras tout pale, te aness tou rat ap toute oun dess tiro vasteha pale, hoy o Nabal ap toute kras. Kamau, te djal lauterenge, kay kamenn tout čilačepen, yaake har o Nabaleske!

1. Samuel 26:10

Palle penas lo: “Me dau man sovel pash o djido Debleste: Yob kokres marell les, nay vell ap leskro tsiro, kay hounte merell lo, nay vell an o marepen.