Gosewe laba 6:17 - O Debleskro Lab 2024 (Sinte-Manouche)

¹⁷ yaka, kay dikenn tele ap i vavarende; i mouy, hoy rakrell rhorhepen; vasta, hoy marenn saven, kay kek čilačepen kran;

O Debleskro Drom 2021 (Sinte)

¹⁷ jaka, kai dikenn tele ap i wawarende; i mui, hoi rakrell chochepen; wasta, hoi marenn sawen, kai kek tchilatchepen kran;

Gosewe laba 6:17 ပူးပေါင်းရင်းမြစ်များ

2. Rajengro liil 21:16

Ninna moukas o Manasse boud menshen te marell, ap kolende kek doosh his. An o foro Yerusalem nashas lengro rat har pani. Koy pashel vas koy doosh, hoy lo ap o them Youda anas, har anas lo i menshen ap i čilačo drom, kay kran le, hoy gar mishto hi an o baro Debleskre yaka.

2. Rajengro liil 24:4

oun maras boud saven, kay kek čilačepen kran, oun anas lengro rat pral peste. Oun o tselo foro Yerusalem his pherdo rat. Kava koova kamas o baro Devel gar te bistrell.

Debleskri gili 10:4

O čilačo rikrell o nak pral oun penell peske: O Devel poučell gar palla. Lauter, hoy leske an o shero trouyel djala, hi: Dell kek Devel.

Debleskri gili 101:5

Koon rakrell čorrhanes djoungelo koova pal o doumo kolendar, kay troul leste hi, koles pandau leskro mouy. Kamau koles gar, kay pre-phourdo hi, oun ap vavar menshende tele dikell.

Debleskri gili 131:1

I gili o Davidestar te givell ap o drom an Yerusalem. Baro Devel, me hom gar pre-phourdo, oun mire yaka dikenn gar tele ap i vavarende. Me kamau gar baro koova, vitar gar savo koova, hoy dour pral mande hi.

Debleskri gili 18:27

Tou hal lačo ap koleste, kay hi lačo ap i vavarende oun hal gosveder har kova, kay ap bange dromma djal.

Debleskri gili 31:18

Baro Devel, mouk man gar čičeske gole te dell ap toute! Kre, te ladjenn pen i čilače! Yon mou djan tele oun merenn! Palle nay rakrenn le bouder gar,

Debleskri gili 5:6

Kol pre-phourden kameh tou gar glan tire yaka te dikell, oun tou rhoyreh tout ap hakeneste, kay i vavarenge čilačepen krella.

Debleskri gili 5:7

Tou mareh kolen, kay o rhorhepen rakrenna. Praasedo hi glan o baro Debleste kolla, kolen doosh ap o rat i vavarendar hi, oun kay i vavaren rhorhenn.

Gosewe laba 1:11

Yon nay penans: “Am mentsa! Mer lourah yekes pre oun marah les. Mer nay hatsams saven, kay kek čilačepen an lengro shero hi. Kolen lah palla, te vell men čomone sapaske.

Gosewe laba 1:16

Yon denn an i herya, te krenn le čilačepen. Sik nashenn le, te marenn le menshen.

Gosewe laba 12:22

O baro Devel dikell rhoyedes ap kolende, kay rhorhenna. Lačes dikell yob ap kolende, kay krenn o čačepen.

Gosewe laba 14:5

Te penell i morsh o labestar, hoy lo dikas oun shounas, rakrell lo o čačepen. Te penell i rhorheno, hoy lo dikas oun shounas, anell lo rhorhepen pre.

Gosewe laba 16:5

O baro Devel dikell rhoyedes ap hakeneste, koles i pre-phourdo dji hi. O vast pre, kova lell peskri phagi.

Gosewe laba 17:7

Kova djal gar, te krenn i narvele bare oun shoukar laba. Vitar gar djal, te rakrell i an-diklo morsh rhorhepen.

Gosewe laba 21:4

I čilačen hi i pre-phourdo dji oun yaka, hoy tele dikenn ap i vavarende. Kova hi lengri doosh.

Gosewe laba 26:28

Kova, kay rhorhepen rakrell, kamell o vavareske čilačepen te krell oun les doukrell. Oun kova, kay goudle labentsa rakrell, anell i bibarht.

Gosewe laba 28:17

I mensho, kay i vavares moulo das, kova ačell ap o naashepen, yaake rah har djivell lo. Kek te rikrell les pre!

Gosewe laba 30:13

Hi menshe koy, kay patsenn pendar, har lačo yon hi, oun dikenn tele ap hako vavareste.

Gosewe laba 6:16

Shob koova hi, ap kolende dikell o baro Devel rhoyedes; oun i eftato koova hi leske o djoungleder:

Jesaja 1:15

Oun te hadenn t'mer t'mare vasta pre, te mangenn man an, palle čakrau me mire yaka tele, te dikap t'men gar. Oun ninna te mangenn mandar pale te pale, me shounau t'men gar: T'mare vasta hi pherdo rat.

Jesaja 2:11

Hakeno, kay dikell tele ap o vavareste, hounte dikell tele glan peste i ladjatar. Oun i pre-phourde menshe venn phagedo. Ap ko dives hi kokres o baro Devel baro.

Jesaja 3:16

Oun o baro Devel penas: Dikenn, har pre-phourde yon hi, kol djouvya an o foro Yerusalem! Lengre sherya hidjrenn le pre, vitsrenn pengre yakentsa trouyel, te dikenn len hakeno. Yon khelenn pash o naashepen. Lengre pire hadenn le yaake, te bashrenn kol verklia, hoy le troul pengre pire čivan.

Jesaja 3:9

O čilačepen dikell dran lende vin. Oun yon anenn doosh ap pende oun kolah sharenn le pen ninna gomme, yaake har kol menshe an o foro Sodom ninna kran. I bibarht vell ap lende, koya anenn yon kokres pengro djoungelo djipah pral pende!

Jeremia 26:15

Djinenn! Te marenn man, marenn t'mer yekes, kay kek doosh ap leste hi, oun anenn miro rat ap t'mende oun ap kava foro oun kolende, kay dren djivenn. Čačepah, o baro Devel bičras man pash t'mende, te penap kava lauter glan t'mare kanda.”

Johanni 8:44

T'maro dad hi o beng. Oun t'mer krenna, hoy t'maro dad ninna kamella. Yob hi yek, kay marell i menshen hako tsiro. Oun yob hi gar an o čačepen tardo. O čačepen hi gar an leste. Te rakrell yob o rhorhepen, vell kova dran leste. Yob hi i rhorheno, oun anas o rhorhepen ap kay phoub.

5. Mose 19:10

Yaake hi t'men doha forya kay nay nashell yek dren. Oun yaake krenn t'mer, te vell an t'maro them, hoy t'maro baro Devel t'menge dell, kek mensho maredo, ap koleste kek doosh hi. Te vals savo mensho maredo, anans bari doosh ap t'mende.

5. Mose 27:25

“Praasedo vell kova, kay i vavarestar love lell, te dell lo koleske i vavares moulo, ap koleste kek doosh hi.” Oun i tsele menshe hounte penenn: Amen!

1. Petro 5:5

Kol terne menshenge penau me: Krenn kova, hoy kol phoureder phrala t'menge penenna! Hakeneske penau: Kek te krell, har te vell lo bareder har ko vavar! O Devel hi gar ap i rig kolendar, kay krenn pen bares. Na-a, yob hi lačes kolenge, kay krenn pen gar bares.

Debleskro tsiro 22:15

Vin hi kolla, kay moukan o Debleskro drom, kolla, kay kran bengeskro koova, kolla, kay loubran trouyel, kolla, kay maran vavaren, kolla, kay mangan vavar koova an har o Debles, oun hakeno, kay kamell oun krell o rhorhepen.