Galatarja 5:22 - O Debleskro Lab 2024 (Sinte-Manouche)

²² Kones hi o Debleskro Dourho an peskro dji, dran koleste vella lačepen: Les vell o Debleskro kamlepen oun barht an o dji. Yob kamell kek čingepen. Yob rikrell lauter vin. Yob hi lačes ap i vavarende. Les hi i baro dji i vavarenge. Kova, hoy yob penell, ap kova rikrell pes yob.

O Debleskro Drom 2021 (Sinte)

²² Kones hi o Debleskro Ducho an peskro dji, dran koleste wella latchepen: Les well o Debleskro kamlepen un bacht an o dji. Job kamell kek tchingepen. Job rikrell lauter win. Job hi latches ap i wawarende. Les hi i baro dji i wawarenge. Kowa, hoi job penell, ap kowa rikrell pes job.

Galatarja 5:22 ပူးပေါင်းရင်းမြစ်များ

Debleskri gili 1:3

Kova hi har i rouk, hoy tardo hi pash o pani. Ap o čačo tsiro venn leskre roukengre baro. Oun leskre patria ačenn zenelo. Lauter, hoy yob krella, djala mishto.

Debleskri gili 92:14

Yon hi har rouka, kay hi tardo an o baro Debleskro kheer, oun kay venn zenelo ap i platsa glan o Debleskro kheer.

Sikepaskro 7:8

Feteder hi, te pandess tiro mouy, har te kress tiro mouy pre o rakepaske. Feteder hi, te dess gar sik pre, har te vess pre-phourdo.

Jeremia 33:6

Kanna shoun, me kamau kava foro pale zoreles te krell, oun leskro doukepen sasto te krell, te djal leskre menshenge mishto, oun te nay djivenn le kek daryah.

Hosea 14:8

Oun me hom lenge har i rouk, kay leskre moussya pral lende rikrell, oun tel koleste yon beshdo hi. Oun lenge vell djob pale bares. Oun yon venn har i drakengro rouk, koles boud boud drake hi. Lačes vell pral lende rakedo, har pral koy mool dran o Libanon.

Mateo 12:33

Te hi t'men i lačo phabyengro rouk, hi t'men ninna lače phabya. Te hi t'men i phabyengro rouk, kay gar lačo hi, hi t'men ninna phabya, kay gar lačo hi. Ap kova, hoy o roukestar vella, dikenn t'mer, har ko rouk hi.

Louka 13:9

Oun te hidjrell ko rouk an o vavar bersh fayge, kova hi mishto. Te hidjrell lo či, de les tele!”

Johanni 15:16

T'mer rodan man gar vin. Me rodom t'men vin, te djivenn yaake, te vell dran t'maro djipen lačo koova, hoy ačella. Oun o dad dell t'men halauter, hoy mangenn lestar an miro lab.”

Johanni 15:2

Hako zenelo kasht ap mande, hoy anell kek drake, činell yob tele. Oun ko kasht, hoy anell drake, krell yob djoudjo, te anell lo boudeder drake.

Johanni 15:5

Me hom ko drakengro rouk. Oun t'mer han kol kashta. Koon ačell an mande oun me an leste, dran koleste vell boud lačepen. T'mer te han gar mantsa khetne, nay krenn t'mer či.

Remarja 14:17

Kolla, kay o Devel o ray pral lende hi, kolla čingrenn gar pral kova, hoy yon rhana oun hoy yon piyenna. Na-a. Yon djivenn pal o čačepen, hoy o Deblestar vella oun čingrenn gar, oun o Debleskro Dourho dell len barht an o dji.

Remarja 15:14

Mire phrala, me djinau čačepah, t'maro dji hi pherdo lačepen. Oun t'mer djinenn lauter, hoy o Devel t'mendar kamella. Yaake nay sikrell ko yek o vavareste o čačo drom.

Remarja 15:3

Ninna o Yezous Kristo dikas gar ap peste, te djal leske mishto. An o Debleskro lab hi činlo pral leste: O praasepen kol menshendar, kay o Debles praasan, peras ap leste.

Remarja 15:30

Mire phrala, mangau t'mendar an o lab maro rayestar o Yezous Kristestar, oun an o kamlepen, hoy o Debleskro Dourho men das: Mangenn mantsa khetne o Debles o tselo djiyeha,

Remarja 6:22

Kanna han t'mer bouder gar pandlo ap o čilačepen. T'mer van o Debleskre boudepangre. Oun t'mer djivenn o Debleskro djipen. Oun kova anell t'men an o djipen, hoy gar pre-herella.

Remarja 7:4

Yaake hi kova ninna t'mentsa, mire phrala. Har o Yezous Kristo meras, meran t'mer leha. O Moseskre laba hi bouder gar o ray pral t'mende. Kol labenge han moulo. Kanna hi t'men i vavar ray. Kova hi o Yezous Kristo, koles o Devel i moulendar djido kras. Kanna nay djivah yaake, te vell o Devel sharedo!

Remarja 8:5

Kolla, kay djivenn pengro phouro djipen, djivenn yaake, har yon kamenna. Kolla, kay djivenn o nevo djipen, hoy o Debleskro Dourho len das, kolla kamenn kova te krell, hoy o Debleskro Dourho kamella.

1. Korintarja 13:13

Kanna ačenna menge kalla triin: – O patsepen ap o Debleste; – i barht, te djinah mer, te vell lauter mishto; – o Debleskro kamlepen. O bareder kol trinendar hi o Debleskro kamlepen.

Galatarja 5:13

Mire phrala, o Devel das t'men gole, te djivenn i djipen, kay han bouder gar pandlo ap čomone. Kal labentsa penau gar, te krenn t'mer nay, hoy kamenna, oun djivenn nay t'maro phouro djipen. Na-a, avenn yek o vavareske koy! Krenn kova dran o kamlepen!

Efesarja 4:23

Moukenn t'men o Deblestar neves te krell!

Efesarja 5:9

Lauter kolla, kay ap leskro drom djana, krenn kova, hoy lačo oun čačo hi, oun penenn o čačepen.

Filiparja 1:11

Oun ko boud lačo oun čačo koova, hoy t'mer kran, krell o Debles bares. Kova kran t'mer an i zoor, hoy o Yezous Kristo das t'men.

Kolossarja 1:10

Palle djivenn t'mer yaake, te vell o Devel sharedo, oun krenn lauter, hoy hi lačo oun mishto glan leskre yaka. Oun dran t'maro djipen vell boud lačo koova. Oun t'mer prindjrenn o Debles hako tsiro feteder.

2. Tessalonikarja 3:2

Mangenn lestar ninna, te dell lo garda ap mende, te nay krenn men kol midjak oun čilače menshe kek čilačepen. Gar hakeno patsell ap o Yezous Kristeste.

1. Timoteo 3:11

I djouvya, kay hi i patslenge koy, hounte djivenn ninna lačes glan i menshengre yaka. Yon rakrenn kek rhorheno koova pral i vavarende. Yon rakrenn kek dinelo koova. Yon krenn pengri tseli boudi mishto.

1. Timoteo 4:12

Ninna te hal tou terno, ma mouk tout ap i rig te čivell! Tou djivess yaake, te dikenn i vavar patsle, har hounte djivenn yon. Kova dikenn le ap tire laba, tiro djipen, tiro kamlepen i vavarenge, tiro patsepen ap o Yezouseste, oun tiro djoudjo dji.

1. Petro 1:22

T'mer shounan ap o čačo lab, oun čivan o čilačepen dran t'maro djipen krik. Kanna nay kamenn t'men čačepah har phrala oun phenya. Moukenn gar tele, te kamenn t'men o tselo djiyestar!

1. Petro 1:8

Koles kamenn t'mer o djiyestar, ninna te dikan les gar. Ap leste patsenn t'mer, ninna te dikenn les kanna nay gar. T'maro patsepen anell t'men pash o Debleste an o bolepen. Kote hi t'mari barht yaake baro, hoy i labentsa nay gar penenna.

1. Petro 5:12

Maro lačo phraal, o Silvano, vas mange ap i rig, te činell lo kava tikno liil. An kava liil kamoms te penap t'menge an o dji, te djinenn čačepah: O Devel hi t'menge lačo. Ačenn pash leste!