Galatarja 3:13 - O Debleskro Lab 2024 (Sinte-Manouche)

¹³ Mer nashte rikram kova lauter gar. Oun dran kova vam tel o Debleskro praasepen. Oun o Yezous Kristo las ko praasepen mendar krik, har yob ap o troushel dino vas, oun yaake menge praasedo vas. O Debleskro lab penella: Hakeno, koon ap o troushel dino vella, hi praasedo.

O Debleskro Drom 2021 (Sinte)

¹³ Mer nashte rikram kowa lauter gar. Un dran kowa wam tel o Debleskro praassepen. Un o Jesus Kristo las ko praassepen mendar krik, har job ap o trushel dino was, un jaake menge praassedo was. O Debleskro lab penella: Hakeno, koon ap o trushel dino wella, hi praassedo.

Galatarja 3:13 ပူးပေါင်းရင်းမြစ်များ

2. Samuel 17:23

O Ahitofel shounas, kay vas kova gar kerdo, hoy yob penas. Koy čivas lo i ledertikri plarhta ap peskri bourika, beshas pes koy pre oun klissas khere an peskro foro. Kote penas lo i menshenge an peskro kheer, hoy te krenn le pal leskro merepen. Palle bladas lo pes pre, oun meras. Oun yob vas paskedo an o moulengro kheer peskro dadestar.

2. Samuel 18:10

Oun yek morsh dikas kova. Oun yob penas kova o Yoabeske oun penas: “Shoun, me dikom o Absalomes ap i baro rouk bladedo.”

2. Samuel 21:3

oun penas ap lende: “Hoy krap me t'menge? Oun har nay krau me kova pale mishto, hoy ap t'mende kerdo vas? Kamau, te dikenn oun rakrenn t'mer pale lačes ap i menshende o baro Deblestar.”

2. Samuel 21:9

Oun o David das len an kol vasta i Gibeonendar. Kolla bladan len pre ap koy berga glan o baro Debleste. Yaake van kol efta ap yek kopo maredo. Kova his an kol divessa, kay vas o djob tele činlo.

2. Rajengro liil 22:19

Oun kral tiro dji lenge pre. Oun kral tout tiknes glan o baro Debleste, har tou shounal, hoy me penom pral kava foro oun kol menshende, kay kate djivenna, te djal lenge yaake djoungeles, te ačell vavar menshenge o rakepen krik i trashatar. Oun kova, kay kamell te vell i bibarht pral i vavareste, penella: Touke te djal, har djas o foreske Yerusalem! Har tou kova shounal, kral tire koola paash, kay ap toute his, oun roval glan mande. Doleske shounom me tout ninna”, penell o baro Devel.

Ester 7:10

Yaake bladan le o Hamanes ap ko kasht pre, koles yob o Mordekayeske moukas pre te čivell. Oun i rholi o baro rayestar djas pale.

Ester 9:14

Oun o baro ray penas, te vell kova yaake kerdo. Oun ko lab vas činlo oun prindjedo kerdo an o foro Susa. Oun kol deesh moule čave o Hamanestar van ap kashta pre pandlo.

Jeremia 44:22

oun yob nay dikas bouder gar, har djan ap t'maro čilačo drom oun kran savo djoungelo koova! Doleske vas t'maro them i moulo them. I menshe, kay shounenn kolestar, denn i vasta pral o shero khetne. Oun te kamenn le yekes te praasell, penenn le: Mou djal touke har o themeske Youda! Kek mensho djivell bouder koy. Yaake hi kova kava dives!

Jeremia 49:13

Me, o baro Devel, dom man pash mande kokres sovel, te vell t'maro foro Bozra i foro, kolestar i menshe i trashatar pengro shero krik rissrenn. Pral koleste ladjenn le pen, yaake paash dino vell ko foro. Te kamell yek o vavares te praasell, penell lo: Mou djal touke har o foreske Bozra! Ninna i tsele vavar foryendar an o them Edom ačell či pral har barra hako tsireske!

Daniel 9:24

Efta kope efta-deesh (70) bersha hi ko tsiro, hoy o Devel peske glan čivas, te vell o čilačepen oun i doosh krik lino tire menshendar oun dran o Debleskro foro. Palle vell i phagi krik lino oun ko čačepen vell, hoy hako tsiro ačella. Oun kova, hoy an o dikepen diklo vas, vell čačo, ninna kova, hoy o Debleskre rakepangre glan-vi penan. Oun o Debleskro kheer vell pale neves o Debleste dino.

Daniel 9:26

Oun pal kol efta kope 62 (shob-deesh-te-douy) bersha vell ko ray maredo, kay o Deblestar bičedo vas. Oun kek his ap leskri rig tardo. Oun palle venna lourde yek rayestar, kay gomme vella, oun denn o fores oun o Debleskro kheer paash. Oun yon djan tele har an i baro pani. Oun yaake rah har i phoub gomme koy hi, ačell kourepen oun marepen. Kova hi i vi-kerdo koova.

Zakarie 13:7

O baro Devel, ko ray pral o bolepen oun i phoub, penell: “Miro rharo, hade tout! Dja ap o bakrengro pre, kay mange boudrella, ap koleste, kay pash mande tardo hi! De o bakrengres! Palle nashenn i bakre krik, hakeno ap peskri rig! Ninna ap i tiknende hadau miro vast.”

Mateo 26:28

Kay mool hi miro rat, hoy me ratau boudenge, te lap lengri doosh lendar. Yaake krau i drom, kay o Devel oun i menshe mala venna.

Mateo 27:5

Koy vitsras lo kol triyanda roupene beme an o Debleskro baro kheer, nashas lendar, čivas i dori troul peskri meen, oun tassras pes.

Bičepangre 5:30

Ko Devel mare phourendar moukas o Yezouses i moulendar pre te stell, koles, kay t'mer ap o troushel dan oun maran.

Remarja 4:25

O Yezous Kristo hi kova, koles o Devel bičras, te merell lo menge, oun te lell lo mari doosh mendar krik. Oun o Devel kras les i moulendar djido, te nay krell lo men čačo glan leste.

2. Korintarja 5:21

O Devel čivas mari tseli doosh ap maro rayeste, o Yezous Kristeste, kay yob kek čilačepen kras, te vas mer čačo oun erligo glan o Debleskre yaka.

Galatarja 3:10

Kol vavar, kay rikrenn pen ap o Moseskre laba, oun kamenn yaake čačo te vell glan o Debleste, kolla hi tel o Debleskro praasepen. O Debleskro lab penella: Hakeno hi praasedo, koon gar lauter krella, hoy o Moseskre laba penenna. Oun kek mensho hi koy, kay krell lauter, hoy o Moseskre laba penenna.

Galatarja 4:5

Yob vas, te lell lo kolen vin, kay hi pandlo ap o Moseskre laba, yaake te vas mer o Debleskre čave.

Efesarja 5:2

oun djivenn an o kamlepen, yaake har o Yezous Kristo peskro kamlepen mende sikras, har yob menge meras. Oun yaake das lo peskro djipen o Debleske. Oun o Devel dikas lačes ap leste.

5. Mose 21:23

palle ačell ko moulo gar pral i rat ap ko kashteste. Na-a, yob hounte vell paskedo ap ko emligo dives, te vell ko them gar pale-čiddo, hoy t'maro baro Devel t'men dell. Pash leste hi kova praasedo, kay hi pre-pandlo ap i kasht.

Tito 2:14

Yob das peskro djipen an o merepen, te las lo mari tseli doosh ap peste, oun te kras lo maro dji djoudjo, te vas mer leskre menshe, oun te kamas i tseli zoryah lačo koova te krell.

Hebrearja 9:12

Har o Yezous an o Debleskro kheer an o bolepen djas, anas lo gar i bakrengro rat peha, vitar gar i groumyengro rat. Na-a. Peskro rat anas lo glan o Debleste. Kova kras lo yek kopo oun gar boud kope. Oun yaake las lo mari doosh hako tsireske mendar.

Hebrearja 9:15

Har o Yezous Kristo meras, las lo i doosh kol menshendar krik, kay djan ap o phouro drom, oun kras lenge i nevo drom, kay nay venn le pash o Debleste, te djivenn lauter kolla, kay o Devel peske gole das, leha khetne hako tsiro, oun te lenn le ko shoukar bravlepen pash leste an o bolepen, yaake har yob penas.

Hebrearja 9:26

Te vals kova gar yaake, hounte merals lo boud kope yaake rah, har i phoub koy hi. Yob vas kanna an kava tsiro, kay mer djivah, te merell lo, oun te lell lo yek kopo hako tsireske i doosh i menshendar.

Hebrearja 9:28

yaake hounte meras o Yezous Kristo yek kopo i menshenge, te lell lo i doosh boud lendar ap peste. Ap ko tsiro, kay vell lo i douyto kopo, vell lo gar, te lell lo i doosh i menshendar krik. Na-a. Palle vell lo kolenge, kay čivan pengro dji ap leste, te lell lo len pash peste, oun te dell lo len lauter kova, hoy hi lenge an o bolepen.

1. Petro 2:24

O čilačepen, hoy mer kram, las o Yezous Kristo ap peste, oun hidjras les ap o troushel. Har yob menge meras, hi kova yaake, har te meram mer leha. Kanna hi o čilačepen an mende moulo. Oun mer djivah nay i lačo oun čačo djipen. Kol douka, hoy o Yezous ap peste las, kran maro djipen sasto.

1. Petro 3:18

Ninna o Yezous Kristo las yek kopo douka ap peste, har yob ap o troushel meras, oun mari doosh ap peste las. Yob his i lačo, oun meras i čilačenge. Kova kras lo, te anell lo len pash o Debleste. I menshe maran les. O Debleskro Dourho kras les djido.

1. Johanni 4:10

Kava hi o Debleskro kamlepen: Hi gar yaake, kay mer kamam o Debles. Na-a, yob kamas men, oun bičras peskro čaves, te lell yob mari doosh ap peste.

Debleskro tsiro 1:5

Lačepen oun barht t'menge! Kova dell t'men o Yezous Kristo! Yob sikrell i menshende o čačo drom pash o Debleste. Oun yob hi o glanstouno lauterendar, kay stenn i moulendar pre oun venn djido. Oun yob hi ninna o ray pral i tsele raya ap kay phoub! Yob kamell men o tselo djiyestar, oun las men dran mari doosh vin, oun playsras menge peskro rateha.

Debleskro tsiro 13:8

Lauter, hoy ap i phoub djivenna, sharenn ko firhes, – lauter kolla, kolengre laba gar činlo hi an o djipaskro liil. Kolla, kay lengre laba dren činlo hi an kava liil, hi yaake rah dren činlo, har i phoub koy hi. Kava liil hi o terno bakres, hoy maredo vas.

Debleskro tsiro 5:9

Oun yon givenn i nevi gili, oun penenn: Tou hal moldo, te less ko liil, oun te kress ko liil pre. Tou val maredo, oun playsral tiro rateha, te giness menshen tiro Debleske. Kolla venna dran hako them, haki natsyona, haki harmenatsyona oun hako rakepen.