Galatarja 2:15 - O Debleskro Lab 2024 (Sinte-Manouche)

^15-16 Mer ham bibolde. Yaake vam mer boldo. Oun ham gar kolendar, kay kek bibolde hi oun gar ap o Debleskro drom djana. Ninna te ham gar kolendar, djinah, kay kek mensho čačo vella glan o Debleste, te djivell lo pal o Moseskre laba. Na-a, o Devel krell koles čačo glan peste, koon patsell ap o Yezous Kristeste. Doleske patsah mer o tselo djiyestar ap o Yezous Kristeste, te vas čačo glan o Debleste.

O Debleskro Drom 2021 (Sinte)

^15-16 Mer ham bibolde. Jaake wam mer boldo. Un ham gar kolendar, kai kek bibolde hi un gar ap o Debleskro drom djana. Ninna te ham gar kolendar, djinah, kai kek mensho tchatcho wella glan o Debleste, te djiwell lo pal o Moseskre laba. Na-a, o Dewel krell koles tchatcho glan peste, koon patsell ap o Jesus Kristeste. Doleske patsah mer o tselo djijestar ap o Jesus Kristeste, te was tchatcho glan o Debleste.

Galatarja 2:15 ပူးပေါင်းရင်းမြစ်များ

Tito 3:3

Glan ko tsiro, kay hams gar patslo, hams ninna save menshe, kay prindjran o čačepen gar. Mer shounam gar ap o Debleste, oun djam gar ap leskro drom. Hams pandlo ap djoungelo koova, hams čilačo oun dikam čilače yakentsa ap kova, hoy i vavaren his. Hams čilačo oun rhoyemen ap i vavarende, oun yon ap mende.

Efesarja 2:3

His i tsiro, kay djivam mer halauter har yon, oun kram o čilačepen, hoy an mende hi. Mer kram, hoy mer kamam, oun hoy menge an o shero vas. Oun o Debleskri rholi his ninna pral mende har pral kol vavar menshende.

Remarja 3:9

Hoy hi kanna? Hi i bibolde feteder glan o Debleste tardo har kolla, kay kek bibolde hi? Na-a, yaake har penom: I bibolde, har kolla, kay kek bibolde hi, halauter kran čilačo koova.

Filiparja 3:4

Me nay sharoms man ninna, te rikrom menshengro koova. Yek te sharell pes, te hi lo činlo ap peskro mass, palle nay sharoms man boudeder.

Remarja 4:16

Doleske krell o Devel kolen čačo, kay ap leste patsenna. Leskro čačepen dell o Devel čičeske lauterenge, kay ap leste patsenna. Yaake ačell ko lab, hoy yob o Abrahameste das, lauterenge, kay venna pal o Abrahameste, i biboldenge har kolenge, kay djivenn dran o patsepen har o Abraham. Kova hi o dad mendar lauterendar.

Bičepangre 22:21

O ray Yezous penas ap mande: Dja dran o foro Yerusalem vin! Me bičrau tout an i vavar themma pash kolende, kay kek bibolde hi.

Mateo 9:11

Oun har i Farisarya kova dikan, penan le ap i Yezouseskre malende: “Hoske rhal t'maro sikepaskro kolentsa, kay lenna i biboldendar kol love i Remaryenge dren, oun kol vavarentsa, kay ninna pale-čiddo hi?”

1. Samuel 15:18

Oun o baro Devel bičras tout pash i čilače Amalekarya oun penas touke: Mare len oun de lauter paash, hoy len hi! Koure tout lentsa, bis te lauter moulo hi.

Louka 24:7

Yob penas t'menge: O Mensheskro Čavo hounte vell an i čilače vasta dino, oun ap o troushel dino. Oun pal triin divessa stell lo i moulendar pre.”

Galatarja 2:17

Mer ninna, kay ham bibolde, kamah, te krell men o Devel čačo glan peste. Kol labentsa penah mer, kay ham pale-čidde oun čilače glan o Debleste, yaake har i tsele vavar menshe ap i phoub. Penau kanna, kay o Yezous Kristo men ap o čilačo drom anas? Na-a!