Filiparja 3:20 - O Debleskro Lab 2024 (Sinte-Manouche)

²⁰ Maro them, kay khere ham, hi o bolepen, kay o ray, o Yezous Kristo, hi. Mer dikah ap ko dives, kay vell lo pale, oun te dell lo men o djipen, hoy gar pre-herella.

O Debleskro Drom 2021 (Sinte)

²⁰ Maro them, kai khere ham, hi o bolepen, kai o rai, o Jesus Kristo, hi. Mer dikah ap ko diwes, kai well lo pale, un te dell lo men o djipen, hoi gar pre-herella.

Filiparja 3:20 ပူးပေါင်းရင်းမြစ်များ

Debleskri gili 16:11

Tou sikreh o drom, kay an o djipen anell. Pash toute hom barhtelo. Te hom kote, kay tou hal, bashrell miro dji hako tsiro.

Debleskri gili 17:15

Me krom, hoy čačo hi. Doleske nay dikau tout. Te djangrau pre, dikau me tout oun hom čalo i barhtyatar.

Gosewe laba 15:24

Kova, kay hayvell, hoy mishto oun gar mishto hi, koleske djal peskro drom pre an o djipen. Oun yob rikrell pes pale o dromestar, kay djal tele pash i moulende.

Mateo 19:21

Penas o Yezous ap leste: “Te kameh tou o tselo Debleskro kamlepen te krell, palle bike lauter, hoy tout hi! Oun de kol love i čorvelende! Palle hi tout i bravlepen an o bolepen. Oun am oun dja mantsa!”

Louka 12:21

O Yezous penas doureder: “Yaake djal koleske, kay anas peske boud bravlepen khetne, oun hi čorvelo glan o Debleste.”

Louka 14:14

Te kreh tou kova, hal tou barhtelo! Kol menshe nay denn tout či pale. Te krell o Devel kol moulen djido, kay kran, hoy yob kamas, palle dell lo tout kova lauter pale, hoy tou lenge kral.”

Bičepangre 1:11

Kolla penan: “Morshale dran o them Galilea, hoske han t'mer koy tardo, oun dikenn an o bolepen? Kava Yezous, kay djas t'mendar krik an o bolepen, kova vell yaake dran o bolepen pale, har dikan t'mer les an o bolepen te djal.”

1. Korintarja 1:7

T'men hi haki zoor, hoy o Debleskro Dourho della. Oun t'mer dikenn ap ko dives, kay vell maro ray, o Yezous Kristo, pale.

1. Korintarja 15:48

Yaake har ko phoubyakro mensho, o Adam, his, yaake hi kolla, kay ap i phoub hi. Yaake har ko bolepaskro mensho, o Yezous Kristo, hi, yaake hi kolla, kay an o bolepen hi.

2. Korintarja 4:18

Kava raylepen hi menge. Mer dikah gar ap kova, hoy i menshe nay dikenna. Na-a, mer dikah ap kova, hoy kanna kek nay dikella. Kova, hoy yon kanna dikenna, hi yek kopo bouder gar koy. Kova, hoy yon gar dikenna, kova ačella hako tsireske.

2. Korintarja 5:8

Čačepah, maro dji hi zorelo, oun mer kamams, te moukas i phoub, te vas khere pash o Debleste.

Galatarja 4:26

Hi ninna i foro Yerusalem an o bolepen. Ko Yerusalem hi har i rayetsa, i Sara. Lakre čave hi gar pandlo ap o Moseskre laba. Yoy hi mari day.

Efesarja 2:19

Kanna han t'mer bouder gar save menshe, kay vin hi oun o Debles gar prindjrenna. Na-a, khetne kol vavar patslentsa han t'mer kanna o Debleskre menshe oun han khere pash leste.

Efesarja 2:6

Har djangras yob o Yezous Kristes i moulendar pre, djangras men lo ninna pre, oun beshas men an o bolepen pash leste.

Filiparja 1:10

Yaake nay dikenn, hoy mishto oun čačo hi. Oun ap ko dives, kay vell o Yezous Kristo pale, han t'mer an o čačepen glan leste tardo, oun kek doosh hi ap t'mende.

Filiparja 1:27

Kanna, krenn lauter, te djan yaake ap o Yezouseskro drom, har kova t'mende siklo vas! Krenn kova ninna, te hom gar pash t'mende! Te dikau t'men gar, kamaus te shounap, te rikrenn t'mer lauter khetne an o patsepen, oun te krenn i tseli zoryah lauter, te vell o patsepen ap o Yezous Kristeste zorelo pash t'mende.

Kolossarja 1:5

T'maro patsepen oun kamlepen vell dran kova, kay dikenn t'mer ap ko dives, kay djivenn t'mer o Debleha khetne an o bolepen. Kova shounan t'mer ap ko tsiro, har t'menge o lačo lab o Yezous Kristestar penlo vas. Oun ko lab hi čačo.

1. Tessalonikarja 1:10

T'mer dikenn ap ko dives, kay vell o Debleskro čavo dran o bolepen pale. Kova hi o Yezous, koles kras o Devel i moulendar djido. Yob lell men dran o Debleskri rholi vin, hoy pral i menshende vella.

1. Tessalonikarja 4:16

Ap ko dives, kay vell maro ray Yezous tele dran o bolepen, shounah, har yek gole della. O Debleskro pralstouno bolepaskro dell bari gole, oun yek phourdell an o Debleskri bashepaskri. Palle stenn kol moule pre, kay patsan ap o Yezous Kristeste.

2. Timoteo 4:8

Kova, hoy kanna glan mande hi, hi ko shoukar koova, hoy kolla lenna, kay kran, hoy o Devel kamella. Oun kova dell man maro ray Yezous. Yob hi ko čačepaskro ray, kay djal pal o čačepen. Ko shoukar koova dell lo man ap ko dives, kay yob o čačepen vi-rakrell pral i tsele menshende. Ko shoukar koova dell yob gar mande kokres. Yob dell kova lauterende, kay dikenn o tselo djiyestar ap ko dives, kay vell lo pale.

Tito 2:13

Oun mer dikah ap ko barhtelo dives, kay vell o Yezous Kristo pale an o shoukar raylepen. Yob hi maro baro Devel, kay las men dran o čilačepen vin.

Hebrearja 12:22

Kova lauter dikan t'mer gar. Na-a. T'maro tsillo, kay venn khetne o Debleha, hi ap i berga Sion an o bolepen. Kote hi o foro o djido Deblestar tardo, o nevo foro Yerusalem. Kote hi boud boud zerya bolepangre, kay sharenn o Debles.

Hebrearja 9:28

yaake hounte meras o Yezous Kristo yek kopo i menshenge, te lell lo i doosh boud lendar ap peste. Ap ko tsiro, kay vell lo i douyto kopo, vell lo gar, te lell lo i doosh i menshendar krik. Na-a. Palle vell lo kolenge, kay čivan pengro dji ap leste, te lell lo len pash peste, oun te dell lo len lauter kova, hoy hi lenge an o bolepen.

Debleskro tsiro 1:7

Dikenn, yob vella dran o bolepen, oun hakeno dikell les, ninna kolla, kay les ap o troushel dan. Oun an hake themma rovenn le pral leste, oun penenn le: “Patsams mer ap leste!” Ava, yaake hounte vell kova. Amen.