Filiparja 3:10 - O Debleskro Lab 2024 (Sinte-Manouche)

¹⁰ Kamoms te prindjrap či vavar har o Yezous Kristes oun o Debleskri zoor, kay kras les i moulendar djido. Oun me lau douka ap mande, yaake har yob douka ap peste las, te vap yaake har yob bis ap o merepen,

O Debleskro Drom 2021 (Sinte)

¹⁰ Kamoms te prindjrap tchi wawar har o Jesus Kristes un o Debleskri soor, kai kras les i mulendar djido. Un me lau duka ap mande, jaake har job duka ap peste las, te wap jaake har job bis ap o merepen,

Filiparja 3:10 ပူးပေါင်းရင်းမြစ်များ

Jeremia 9:23

Koon kamell pes te sharell, kova te sharell pes, kay yob prindjrell man, oun te hayvell yob, kay me o baro Devel hom. Me krau miro dji pre i menshenge, oun krau, hoy čačo oun mishto hi ap i phoub. Savo koova hi mishto glan mire yaka. Kova penau me, o baro Devel.

Mateo 20:23

“Hi čačo,” penas lo, “t'mer hounte lenna boud douka ap t'mende, yaake har me hounte lap len ap mande. Ninna te hi yaake, nay penau t'menge gar, koon beshell ap miri čači rig oun ap miri servi rig. Kova hi gar an miro vast. Miro dad an o bolepen rodas kolen vin, kay ap miri rig beshenna.”

Johanni 10:18

Kek lell miro djipen mandar. Dran mande vell kova, kay dau miro djipen. Kova hi an miro vast, te dap miro djipen. Oun kova hi an miro vast, te lap les pale. Yaake krau, hoy miro dad mange penas.”

Johanni 17:3

Kova hi ko djipen, hoy gar pre-herella: Te prindjrenn yon tout, kay tou hal o čačo Devel, oun te prindjrenn yon o Yezous Kristes, koles tou bičral ap kay phoub.

Remarja 8:17

Gar kokres leskre čave ham mer. Mer lah ninna lestar ko tselo lačepen, hoy les menge hi an o bolepen. Kova lah khetne o Yezous Kristeha. Te venn douka ap mende, yaake har van douka ap o Yezous Kristo, palle krell men o Devel ninna baro oun raylo leha.

Remarja 8:29

Har rodas lo len vin, his an leskro dji, te venn le yaake har peskro čavo. Kova te vell o phoureder mank boud phralende oun phenyende.

Remarja 8:36

An o Debleskro lab hi činlo: Mer ham tiro. Doleske kamenn le men hako tsiro te marell. Yon dikenn ap mende, har te vams bakre, hoy venn maredo.

2. Korintarja 1:10

Oun yob moukas men gar te merell, oun krell kova vitar gar an ko tsiro, hoy glan mende hi. Ava, ap leste dikah, te lell lo men pale te pale vin dran o merepen an ko tsiro, hoy gomme glan mende hi.

2. Korintarja 1:5

Yaake har vell boud pharo koova ap mende o Yezous Kristeske, yaake dell lo men ninna boud zoor an o dji.

2. Korintarja 13:4

Har yob ap o troushel dino vas, his yob gar zorelo. Kanna djivell yob dran o Debleskri zoor. Yaake har o Yezous Kristo ap o troushel gar zorelo his, ham mer vitar gar zorelo. Oun yaake har yob djido vas, ham mer leha ninna djido oun zorelo dran o Debleskri zoor. Kova nay dikenn, te hom pash t'mende!

Galatarja 2:20

Kova hom gar me, kay djivau kanna. Hi o Yezous Kristo, kay djivell an mande. Oun ko djipen, hoy kanna djivau, djivau me an o patsepen ap o Debleskro čaveste. Yob kamas te djivap, oun das peskro djipen mange an o merepen.

Galatarja 6:17

Ma krenn mange bouder kek douka! Man hi boud činepen ap mande, hoy sikrenna, kay vom o Yezouseske dino.

Efesarja 4:13

Kova te vell yaake, palle ham mer lauter khetne an yek patsepen, oun prindjrah o Debleskro čaves mishto. Boud oun boudeder hayvah, hoy yob mendar kamella, bis te djivah yaake har yob djivas.

Filiparja 3:8

Ava, kova lauter, hoy me ap ko tsiro patsom oun krom, hi mange kanna bouder či moldo. Me prindjrau kanna o Yezous Kristes. Yob hi miro ray. Doleske hi ko tselo vavar koova mange har čik, oun či moldo. O Yezous Kristes kokres kamau te prindjrell boudeder.

Kolossarja 1:24

Oun kanna hom barhtelo an kol douka, hoy anom t'menge ap mande. Yaake har o Yezous Kristo anas douka ap peste i patslenge, yaake hounte anap me ninna douka ap mande i patslenge.

Kolossarja 2:13

An o phouro tsiro, har t'mer an o čilačepen djivan, hans moulo o Debleske, oun hans gar leskre menshe. Kanna kras o Devel t'men o Yezous Kristeha djido, oun las t'mari tseli doosh t'mendar.

Kolossarja 3:1

O Devel kras t'men o Yezous Kristeha i moulendar djido. Doleske čivenn t'maro dji ap kova, hoy hi an o bolepen! Kote hi o Yezous Kristo ap i čači rig o Deblestar beshdo!

1. Petro 1:3

Mer sharah o Debles, ko dades maro rayestar, o Yezous Kristestar. O Devel kamas men yaake boud, te vas yob maro dad oun das men o nevo djipen. Oun an mare djia djinah zoreles, yaake har yob o Yezous Kristes i moulendar djido kras,

2. Petro 1:13

Me patsau, hi mishto t'menge, te penap t'menge kova yaake rah, har me djivau, te bistrenn t'mer kova gar, oun te venn gar khino, te krenn kova lauter.

1. Johanni 2:3

Mer te krah kova, hoy o Devel menge penas, te kras, djinah mer, te prindjrah les.

1. Johanni 2:5

Koon krella, hoy o Devel penella, an koleste hi čačepah o Debleskro tselo kamlepen. Oun ap kova dikah mer, te ačah o Debleha.

Debleskro tsiro 1:18

Me hom o djido. Oun me homs moulo, oun kanna hom djido oun djivau hako tsireske. Man hi i zoor pral o merepen. Oun man hi o klidepaskro an o moulengro them.