Ezekiel 7:23 - O Debleskro Lab 2024 (Sinte-Manouche)

²³ Kre i shello! O tselo them hi pherdo kolendar, kay lan rateskri doosh ap pende. Oun o foro hi pherdo kolentsa, kay rikran i vavaren i zoryah tele.

O Debleskro Drom 2021 (Sinte)

²³ Kre i shello! O tselo them hi pherdo kolendar, kai lan rateskri doosh ap pende. Un o foro hi pherdo kolentsa, kai rikran i wawaren i sorjah tele.

Ezekiel 7:23 ပူးပေါင်းရင်းမြစ်များ

2. Rajengro liil 21:16

Ninna moukas o Manasse boud menshen te marell, ap kolende kek doosh his. An o foro Yerusalem nashas lengro rat har pani. Koy pashel vas koy doosh, hoy lo ap o them Youda anas, har anas lo i menshen ap i čilačo drom, kay kran le, hoy gar mishto hi an o baro Debleskre yaka.

2. Rajengro liil 24:4

oun maras boud saven, kay kek čilačepen kran, oun anas lengro rat pral peste. Oun o tselo foro Yerusalem his pherdo rat. Kava koova kamas o baro Devel gar te bistrell.

Jesaja 1:15

Oun te hadenn t'mer t'mare vasta pre, te mangenn man an, palle čakrau me mire yaka tele, te dikap t'men gar. Oun ninna te mangenn mandar pale te pale, me shounau t'men gar: T'mare vasta hi pherdo rat.

Jesaja 59:3

I vavarengro rat kras t'mare vasta ratlo, oun koy doosh, hoy ap t'mende lan, kras t'mare goushte čiklo. T'maro mouy rakrell rhorhepen, oun t'mari čip čilačepen.

Jesaja 59:7

T'mare herya nashenna pal o čilačepen, oun hi sik, te moukenn le kolen te ratell, kay kek čilačepen kran. Kova, hoy moukenn t'menge an o shero te djal, hi har nay rhorhenn oun doukrenn i vavaren. Ap t'mare dromma ačell phagedo djipen pale.

Jeremia 2:34

Ninna hatsan le ap tire koola o rat i čorvelendar, kay kran kek čilačepen, oun kay tou gar koy pashel tapral, kay phagan le an tiro kheer dren. Ninna te kral tou kova lauter,

Jeremia 22:17

Yoyakim, tire yaka oun tiro dji dikenn ap či vavares, har te vess bravleder tiro rhorhepah. Tou mareh kolen, kay kek čilačepen kran, oun rikreh i menshen zoryah oun daventsa tele.

Jeremia 27:2

O baro Devel penas ap mande: Kre touke i kasht oun čip les ledertikre doryentsa troul tiri meen, har i kasht troul i groumyakri meen čiddo vell!

Jeremia 40:1

I lourde dran Babilonia tapran boud menshen dran o foro Yerusalem oun dran vavar gaba oun forya an o them Youda. Yon pandan len shellentsa oun anan len khetne an o foro Rama, te anenn le len pandles an o them Babilonia. Mank lende his ninna o Yeremia, peskre vasta i shellentsa pandles. Kote hatsas les o pralstouno i lourdendar, o Nebouzaradan, oun moukas les te djal. Pal kova rakras o baro Devel o Yeremiyeha.

Jeremia 6:7

Yaake har dran i brounna o pani vella, yaake vell dran o foro o čilačepen. I gole kolendar, kay venn zoryah tele rikedo oun doukedo, shounau. Menshe lenn glan mande dava oun venn maredo.

Jeremia 7:6

Ma rikrenn kolen tele, kay hi dran i vavar them, vitar gar kol čaven, kay len kek dad bouder hi, oun kol romyen, kay len kek rom bouder hi! Ma denn kol menshen ratles, kay kek čilačepen kran! Ma nashenn vavar deblenge palla. Yon anenn t'men an i bibarht.

Ropaskre gilja 3:7

Yob čivas i massouri troul mande, te nay vau gar vin, oun čivas sasterne shelle troul mire pire.

Ezekiel 11:6

T'mer dan bouden moulo an kava foro. Oun i dromma an kava foro hi pherdo kolendar, kay van moulo dino.

Ezekiel 12:19

Oun pen ap i Israelitarya, kay hi pash toute an kava them: Kava penell o baro Devel, maro ray, pral kolende, kay djivenn an o foro Yerusalem an o them Israel: Boud čilačo koova krenn le: Yek rikrell o vavares tele. Doleske vell ko dives, kay rhan le pengro maro daryah, oun piyenn pengro pani trisslepah i trashatar. Lengro them vell i mouklo them, kay či ačell.

Ezekiel 18:12

oun rikrell i čorvelen zoryah tele, ninna kolen, kolen gar doha djipaske hi, oun lell zoryah peske, hoy gar leskro hi. Te patsas lo love vin, dell lo kova gar pale, hoy das les ko čorvelo ko tsireske, kay les siyaan pash leste hi. Oun yob mangell i rhorhene deblen an, oun krell, hoy glan o Debleske yaka djoungeles hi.

Ezekiel 22:13

Me dau mire vasta khetne kol lovenge, hoy t'mer rhorhepah khetne anan, oun ko rateske kolendar, kay pash t'mende maredo van.

Ezekiel 22:27

Tire pralstoune hi har divye djoukle, kay marenn, oun hi boklo pal rat. Yon marenn menshen, te lenn le lengro koova penge.

Ezekiel 22:9

Mank t'mende hi save menshe, kay rakrenn rhorhepen, te anenn le doosh ap vavarende, yaake te venn kolla maredo. Vavar t'mendar rhan o mass save firhendar, hoy i rhorhene deblenge maredo van, oun krenn vi-ladjedo koova mank t'mende:

Ezekiel 45:9

Kava penell o baro Devel, maro ray: Kanna hi doha! T'mer raya pral o Israel, herenn pre, te rikrenn i menshen i zoryah tele! Doukrenn len bouder gar! Krenn, hoy mishto oun čačo hi! Moukenn tele, te tradenn mire menshen dran pengre khera vin! Kava penell o baro Devel, maro ray.

Ezekiel 8:16

Oun yob anas man dren ap koy tikni platsa glan o baro Debleskro kheer. Oun glan o voudar o kherestar mashkral i glanstouni halla oun i sasterni rhačepaskri his 25 (biish-te-panč) morsha tardo. Kolla rissran pengre dume khatar o baro Debleskro kheer, oun dikan ap koy rig, kay o kham pre djal. Oun yon moukan pen ap i phoub te perell, oun mangan o kham an.

Ezekiel 8:17

Oun yob penas ap mande: Tou mensho, dikal tou kava? Hi i menshenge dran o kheer Youda gar doha, te krenn le ko tselo djoungelo koova kate? O tselo them kran le pherdo čilačepen. Hounte rhoyrenn le man pale te pale? Dik, har rikrenn le penge zenele patria glan pengre naka!

Ezekiel 9:9

Oun yob penas ap mande: I doosh, hoy i menshe dran o kheer Israel oun dran o kheer Youda ap pende anan, hi yaake boud. Boud marepen hi an o them. Oun an o foro rikrenn i zorele i vavaren zoryah tele. Oun yon penenn: “O baro Devel djas peske dran kava them. Yob dikell men gar!”

Hosea 4:2

Kova, hoy pash t'mende hatslo vell hi koshepen, rhorhepen, čorepen, menshe venn moulo dino, oun boud morsha rhorhenn pengre romyen, oun boud djouvya pengre romen. Oun yon marenn yekes pal o vavares.

Micha 2:2

Kamenn le yekeskro kotar phoub, randenn le les, oun lenn penge khera vavar menshendar, har yon kamenna. Čilači zoryah djan le ap yekeste, oun lenn penge leskro kheer oun kova, hoy les peskro dadestar vas.

Micha 7:2

Kek, kay o Debleskro drom djal, hi bouder an kava them. Kek dell mank i menshende, kay an o čačepen tardo hi. Yek rodell, har te marell lo o vavares. Oun hakeno lell o vavares palla, te taprell lo les.

Nahum 3:10

Ninna kava foro vas dren lino, oun leskre menshe pandles anlo an i vavar them. Lengre čave van moulo dino ap hako drom. Pral lengre pralstunende vitsran le kashta, koon kones lella. I tsele pralstunen pandan le sasterne shellentsa.