Ezekiel 7:20 - O Debleskro Lab 2024 (Sinte-Manouche)

²⁰ Lengro tselo shoukar koova kras, te van le pre-phourdo. Oun yon kran pen kolestar djoungele figure, rhorhene deblen, hoy le an-mangan. Doleske krom me, te vell kava koova lenge har čik.

O Debleskro Drom 2021 (Sinte)

²⁰ Lengro tselo shukar koowa kras, te wan le pre-phurdo. Un jon kran pen kolestar djungele figure, chochene deblen, hoi le an-mangan. Doleske krom me, te well kau koowa lenge har tchik.

Ezekiel 7:20 ပူးပေါင်းရင်းမြစ်များ

2. Rajengro liil 21:4

Oun an o baro Debleskro kheer čivas yob rhačepangre pre i moule deblenge, kote, kay o baro Devel penas: “An o foro Yerusalem kamau te mangenn le man an.”

2. Rajengro liil 21:7

Oun yob anas koy kashteni debletsa Ashera, hoy lestar kerdo vas, an o Debleskro kheer, kolestar o baro Devel ap o David penas oun leskro čaveste, o Salomo: “An kava kheer oun an o foro Yerusalem, hoy me mange vi-rodom dran o tselo Israel, kate kamau me, te mangenn le man an hako tsiro.

2. Familjakro liil 2:9

Oun shoun, tire morshen, kay denn kol rouka tele, dau me, 20.000 (biish-zerya) gone gib, oun 20.000 gone djob, 20.000 bare khore mool oun 20.000 bare khore djet.

2. Familjakro liil 36:14

Ninna i tsele pralstoune an o them Youda oun i rashaya oun i menshe an o them kran pengri doosh gomme bareder pengro djipah: Yon djivan pal ko djoungelo koova, hoy i menshe an i vavar themma kran, oun kran o baro Debleskro kheer pale-čiddo, ko kheer, hoy yob vi-rodas, te djivell lo kote an o foro Yerusalem.

Esra 3:12

Boud i phoure rashayendar, i Levitarendar oun i familyengre pralstunendar djinan, har o baro Debleskro phouro kheer vin dikas. Kolla rovan zoreles, har yon kanna dikan, har i telstoune barra kava nevo khereske čiddo van. Vavar dan gole i barhtyatar, yaake his, kay nay van le dour shounlo.

Debleskri gili 48:2

O baro Devel, zorelo hi lo! Maro Devel, moldo hi lo, te sharas les an peskro foro, hoy hi pral ap koy berga, kay yob djivella.

Debleskri gili 50:2

Ap i berga Sion, an o shoukeder foro, sikras pes o Devel an peskro raylepen.

Jesaja 30:22

Palle dikenn t'mer ap t'mare roupene oun sonakangre figure har ap čomone, hoy pale-čiddo hi. Krik kolentsa penenn t'mer oun vitsrenn len krik har čik.

Jesaja 64:11

Baro Devel, kameh tout pash kava lauter kanna gomme pale rikrell? Kameh tou či penell, oun mari ladj gomme doureder oun bareder te krell?

Jeremia 7:14

Doleske krau me kava khereha, har me ko foreha Shilo krom, ninna te vas kava kheer mange kerdo, oun t'mer patsenn, kote nay djal t'menge či. Me krau koy platsa paash, hoy dom t'men oun t'mare phouren.

Jeremia 7:30

Kol menshe an o them Youda krenn, hoy mange djoungeles hi, penell o baro Devel. Yon čivan kol djoungele deblen an kava kheer, hoy mange kerdo vas, oun kran les pale-čiddo.

Ropaskre gilja 1:10

Oun yon čivan pengre vasta ap lakro tselo kouč koova. Yoy hounte dikas peske yakentsa, har i vavar menshe an lakro Debleskro kheer dren djan. Oun tou, baro Devel, penal, te hounte djan yon gar kote dren.

Ropaskre gilja 2:1

Ah, o baro Debleskri rholi hi čiddo ap o foro Sion har i kali rati! Yerusalem, hoy sharedo vas bis an o bolepen, vas tele vitsedo ap i phoub. Ap ko dives, kay leskri rholi pral i berga Sion vas, his leske či, te his o foro i banko peskre pirenge.

Ropaskre gilja 2:7

Foun peskro altaro kamell lo bouder či te djinell. Peskro khereske sikrell lo o doumo. Leskre massurya das lo kolenge an o vast kay maro foro paash kran, oun koy pashel i bari gole dan an o baro Debleskro kheer, har an kol bare divessa, kay kote boud menshe khetne van.

Ezekiel 11:18

Te venn le kote khere, vitsrenn le kol tsele rhorhene deblen oun djoungele figuren vin dran o them.

Ezekiel 16:16

Oun tou lal tire rayle ripyendar, oun čival len kote ap i phoub, kay i rhorhene debla an-mangedo van. Oun yaake har i loubni dal tout hakeneske, kay kamas. Savo koova das an kek tsiro, oun vell bouder gar.

Ezekiel 16:19

Oun kova hoy dom me tout te rhal, ko lačo yarro, djet oun gvin čival tou glan lende, te dikenn le lačes ap toute. Ava, yaake dour djal tou, penell o baro Devel, maro ray.

Ezekiel 23:38

Oun kava hi gar lauter, hoy le kran: Ap ko emligo dives, har maran le pengre čaven o rhorhene deblenge, van le an miro kheer, oun yaake kran le miro kheer pale-čiddo. Oun kol divessa, kay mange hi, rikran le bouder gar dren. Ava, savo koova hi, hoy kran le an miro kheer!

Ezekiel 24:21

Kava penell o baro Devel, maro ray: Djinau, t'menge hi miro kheer o kamleder koova. Oun t'maro dji nashell pal leste. T'mer han pre-phourdo oun patsenn, kolenge, kay kote hi, nay djal kek čilačepen. Čačepah, me dau miro kheer kolenge an o vast, kay krenn les pale-čiddo. Oun t'mare morsh čave oun ča, kolen t'mer kote an Yerusalem pale moukan, kolla venn o rhareha moulo dino.

Ezekiel 5:11

T'mer kran miro kheer pale-čiddo kol rhorhene deblentsa oun djoungelo koveha, hoy kote kran, penau me, o baro Devel, t'maro ray. Doleske dau man sovel, me o djido Devel, te dap t'men paash. T'mer khaytenn man bouder gar oun me krau miro dji bouder gar t'menge pre.

Ezekiel 7:22

Oun me rissrau miro shero krik mire menshendar. Oun vavar menshe krenna, te vell kova pale-čiddo, hoy mange yaake kouč hi. Ava, randepangre phagenn dren oun krenn, te nay djivau me bouder gar koy.

Ezekiel 9:7

Oun o baro Devel penas ap lende: Anenn kolen, kay moulo dino van, ap i platse glan o Debleskro kheer! Krenn yaake o kheer pale-čiddo! Palle djan vin an o foro! Oun yon djan vin, oun dan i menshen an o foro moulo.

Haggai 2:3

Koon t'mendar hi gomme koy, kay dikas kava kheer, har lo an peskro shoukester tsiro vin dikas? Oun har dikenn les t'mer kanna? Hi či leskro shoukapen pral!

Čačepangre 8:24

Oun o Gideon penas pale ap lende: “Yek kamau t'mendar te mangell: Denn man kol kanengre, hoy lan kolendar, kay kouran t'men lentsa!” Kolla his Ismaelarya oun doleske his len sonakangre kanengre.

Čačepangre 8:27

Oun o Gideon kras dran ko sonakay yek devel. Oun čivas les pre an peskro foro, hoy kharella Ofra. Oun o tselo Israel vas koy, te mangenn le les an. Oun doleske peras o Gideon oun leskro tselo kheer o čačo dromestar tele.