Ezekiel 40:7 - O Debleskro Lab 2024 (Sinte-Manouche)

⁷ Dren an o voudareskro kheer his ap hake douy rigya triin iseme. Haki isema his yaake lengsto har bourhlo, – triin metarya lengsto oun triin metarya bourhlo. Oun i massurya, hoy mank lende hi, his 2,5 (douy-te-paash) metarya pesso. Palla an o voudareskro kheer his pale i voudar, hoy djas triin metarya dren. Koy pal his koy voudareskri halla vergel o Debleskro kheer.

O Debleskro Drom 2021 (Sinte)

⁷ Dren an o wudareskro kheer his ap hake dui rigja triin iseme. Haki isema his jaake lengsto har buchlo, – triin metarja lengsto un triin metarja buchlo. Un i massurja, hoi mank lende hi, his 2,5 (dui-te-paash) metarja pesso. Palla an o wudareskro kheer his pale i wudar, hoi djas triin metarja dren. Koi pal his koi wudareskri halla wergel o Debleskro kheer.

Ezekiel 40:7 ပူးပေါင်းရင်းမြစ်များ

1. Familjakro liil 23:28

Yon te venn o Aroneskre čavende pash o vast, pash i boudi an o baro Debleskro kheer, ap kol glanstoune platse, oun an i iseme. Yon hounte krenn ko tselo koova djoudjo, hoy o Debleske hi, oun ninna vavar boudi an o Debleskro kheer.

2. Familjakro liil 3:9

Oun i paash kilogrammi sonakay lan le, te krenn le nagle. Ninna i pralstoune iseme van pral-maklo o sonakayeha.

2. Familjakro liil 31:11

Kote penas o baro ray, o Hiskiya, te venn bare iseme kerdo an o baro Debleskro kheer. Oun yon kran les yaake.

Esra 8:29

Denn mishto yak koy pre, bis te van an Yerusalem an o baro Debleskro kheer. Kote čivenn t'mer kova lauter ap i vaga, oun denn les an i vasta i pralstoune rashayendar oun i Levitarendar oun i pralstunendar i familyendar an Israel.”

Jeremia 35:4

oun anom len an o baro Debleskro kheer, an koy bari isema i čavendar o Debleskro morshestar, o Hanan, koleskro dad o Yigdalya his. Koy bari isema hi langs koy isema o pralstunendar oun pral koy isema o Maasseyestar, koleskro dad o Shalloum hi. O Maasseya his kova, kay das garda ap o voudar.

Ezekiel 40:10

Oun kol tikne iseme, hoy his ap kol douy rigya dren an o baro voudar, his triin ap haki rig, hakeni yaake bourhlo har koy vavar. Oun i massurya mank lende his ninna emligo bourhlo.

Ezekiel 40:21

An kava voudareskro kheer his ninna tikne iseme, triin ap haki rig. Oun leskre massurya oun koy voudareskri halla his yaake baro har pash ko vavar baro voudar, kote kay o kham pre djal. Khetne his kava voudar 25 (biish-te-panč) metarya lengsto oun 12,5 (deesh-te-douy-te-paash) metarya bourhlo.

Ezekiel 40:29

Oun leskre tikne iseme oun leskre massurya oun koy voudareskri halla, yon his yaake baro, har kolla an i vavar bare voudya. Koy his ninna vorhya an o voudareskro kheer oun an i glanstouni halla. Khetne his kava voudar 25 (biish-te-panč) metarya lengsto oun 12,5 (deesh-te-douy-te-paash) metarya bourhlo.

Ezekiel 40:33

Oun leskre tikne iseme oun leskre massurya oun i voudareskri halla, yon his yaake baro har kolla an i vavar voudya. Koy his ninna vorhya an o voudar oun an i voudareskri halla. Khetne his kava voudar 25 (biish-te-panč) metarya lengsto oun 12,5 (deesh-te-douy-te-paash) metarya bourhlo.

Ezekiel 40:36

Les his tikne iseme, massurya, i voudareskri halla oun vorhya troul leste. Khetne his kava voudar 25 (biish-te-panč) metarya lengsto oun 12,5 (deesh-te-douy-te-paash) metarya bourhlo.

Ezekiel 40:8

Oun yob dikas pal, har baro koy voudareskri halla hi.

Ezekiel 42:5

Oun kol iseme, hoy pralstounes his, his tikneder har kolla koy tel. Oun kol mashkralstoune iseme his tikneder har kolla, hoy telstounes his. Yon his kerdo har i bari treppa,