Ezekiel 16:52 - O Debleskro Lab 2024 (Sinte-Manouche)

⁵² Kanna hounte hidjress tiri ladj! Tiri doosh hi yaake boud bareder har tire phenyengri doosh. Oun yon dikenn langs toute vin, har te vals len kek doosh. Yaake dau toute i bareder phagi har lende dom. Doleske ladjess tou tout. Hidje tiri ladj!

O Debleskro Drom 2021 (Sinte)

⁵² Kanna hunte hidjress tiri ladj! Tiri doosh hi jaake bud bareder har tire phenjengri doosh. Un jon dikenn langs tute win, har te wals len kek doosh. Jaake dau tute i bareder phagi har lende dom. Doleske ladjess tu tut. Hidje tiri ladj!

Ezekiel 16:52 ပူးပေါင်းရင်းမြစ်များ

1. Mose 38:26

Oun o Youda prindjras kova oun penas: “Yoy hi feteder an o čačepen tardo har me. Me dom lat gar miro čaveste Shela. Doleske kras yoy kova.” O Youda vas bouder gar khetne lah.

Jeremia 23:40

Oun me anau ladj oun praasepen ap t'mende, hoy ačell hako tsiro ap t'mende, oun vell gar bistedo.

Jeremia 3:11

Oun o baro Devel penas ap mande: I Israel, kay djas mandar krik, hi feteder har i rhorheni Youda.

Jeremia 31:19

Har dikom miri doosh dren, moukom miro čilačo drom, oun har khaytas man, hoy krom, dom mire vasta pral o shero khetne. Ko vi-ladjedo koova, hoy krom, har terno homs, koleske ladjom oun vom lolo i ladjatar.”

Jeremia 51:51

T'mer penenn: I ladj vas pral mende. Menshe dran vavar themma praasan men oun san pral mende. Vi-themarya peran an o kheer o baro Deblestar dren.

Ezekiel 16:47

Touke his gar doha, te djas ap lengre čilače dromma, oun te kress ko djoungelo koova, hoy yon kran! Na-a, tou val gomme čilačeder har yon, oun kral gomme djoungleder koova har yon kran.

Ezekiel 16:48

Doleske dau man sovel pash miro djipen, me o baro Devel, t'maro ray: I Sodom, tiri pheen, oun lakre ča kran gar savo vi-ladjedo koova, har kral tou oun tire ča!

Ezekiel 16:53

O dives vell, kay krau, te vell lauter pale lačes i foryenge Sodom oun Samaria oun kol gabenge troul lende. Oun ninna touke vell lauter pale mishto.

Ezekiel 16:54

Kova krau, te hidjress tiri ladj oun ladjess pral halauter, hoy kral, yaake te dikenn i forya Sodom oun Samaria, te anan le gar yaake boud doosh ap pende har tou ap toute anal. Palle lenn lengre djia nevi zoor.

Ezekiel 16:56

An ko tsiro, kay yaake pre-phourdo hals, rakral pal tiri phenyate Sodom.

Ezekiel 16:63

Me lau tiri tseli doosh toutar krik, hoy ap toute anal. Te vell touke palle tiro phouro djipen an o shero, ladjeh tou, oun nay kreh tiro mouy bouder gar pre i ladjatar. Kava penau me, o baro Devel, tiro ray.

Ezekiel 32:24

Kote hi o Elam peskre tsele menshentsa. Troul leste trouyel hi le paskedo. Yon halauter van maredo o rhareha, oun djan tele an o moulengro them, kolla, kay gar činlo van ap pengro mass. Har le djido his, his i vavaren bari daar lendar. Kanna hounte hidjrenn le pengri ladj khetne kol vavarentsa an o moulengro them.

Ezekiel 36:15

Me krau, te shouness bouder gar o praasepen kolendar dran vavar themma, oun hounte ladjess tout bouder gar glan lende. Tou kreh bouder gar, te hi t'mare menshen bouder kek čave. Kava penell o baro Devel, maro ray.

Ezekiel 39:26

An ko tsiro, kay djivenn le pale kek daryah an pengro them, oun kek len traash krell, bistrenn le ko tsiro, kay vas bari ladj ap lende har moukan le man.

Ezekiel 44:13

Yon nay ačenn bouder gar mire rashaya oun venn bouder gar pash kol tsele koola, hoy mange hi, oun hounte rikrenn pen pale foun ko rhapen, hoy mange dino vas, oun kokres i rashaya nay rhan. Yon hounte ladjenn pen pral ko djoungelo koova, hoy le kran.

Hosea 10:6

Ava, ko terno gouroum vell an o them Assour anlo, oun kote vell lo o baro rayeste, o Yareb, dino. Havi ladj o Efrayimeske! Havi ladj vell ap i Israelitarya, kay patsan, te hi le yaake gosevo!

Louka 6:37

Ma sikrenn ap o vavareskri doosh! Oun o Devel dikell gar ap t'mari doosh. Ma penenn: Kova hounte lell i phagi! Oun o Devel dell t'men kek phagi. Bistrenn ko čilačepen, hoy i vavar menshe ap t'mende kran. Oun o Devel bistrell ko čilačepen, hoy t'mer kran.

Remarja 1:32

Yon djinenna, o Devel dell kolen i phagi, kay yaake djivenna. Oun koy phagi hi o merepen. Ninna te djinenn le kova, krenn le ko čilačo koova, oun sharenn kolen, kay kova ninna krenna.

Remarja 2:10

Raylepen, čačepen oun barht dell o Devel kolen, kay kran o lačepen, – gar kokres i bibolden, na-a, ninna kolen, kay kek bibolde hi.

Remarja 6:21

Kova, hoy kran, his či moldo. T'mer kran savo koova, koleske kay dives ladjenn t'men. Savo koova anell an o merepen dren.

1. Samuel 24:17

Har o David kol laba ap o Sauleste rakras, penas o Saul: “Shounau me gar tout, miro čaves David, kate?” Oun o Saul rovas zoreles.