Ezekiel 13:9 - O Debleskro Lab 2024 (Sinte-Manouche)

⁹ Miro vast vell pral kol rakepangre, kay penenn glan-vi, hoy gar čačo hi, oun kay dourkrenn rhorhepen, te dap len i phagi. An o tsillo, kay mire menshe khetne venn, nay venn yon gar dren. Oun an o liil, kay i laba i menshendar dran Israel dren činlo hi, venn lengre laba gar dren činlo. Oun an o them Israel venn le gar palpale. Palle dikenn oun hayvenn t'mer, te hom me o baro Devel, t'maro ray.

O Debleskro Drom 2021 (Sinte)

⁹ Miro wast well pral kol rakepangre, kai penenn glan-wi, hoi gar tchatcho hi, un kai durkrenn chochepen, te dap len i phagi. An o tsillo, kai mire menshe khetne wenn, nai wenn jon gar dren. Un an o liil, kai i laba i menshendar dran Israel dren tchinlo hi, wenn lengre laba gar dren tchinlo. Un an o them Israel wenn le gar palpale. Palle dikenn un haiwenn tumer, te hom me o baro Dewel, tumaro rai.

Ezekiel 13:9 ပူးပေါင်းရင်းမြစ်များ

1. Rajengro liil 13:18

Kote penas o phouro ap leste: “Me hom ninna i Debleskro rakepaskro har tou, oun i bolepaskro o baro Deblestar penas mange: An les khere pash toute, te nay rhal lo maro oun te nay piyell lo pani!” Rhorhepen his kova, hoy ko phouro penas.

Esra 2:59

Oun koy his ninna menshe, kay khetne i Israelitarya pre van dran Tel-Mela, oun dran Tel-Harsha, oun dran Keroub-Addon, oun dran Immer. Yon nay penan gar, dran havo dadengro kheer yon hi, oun te hi lengre menshe dran o Israel.

Nehemia 7:62

Kolla his i familye Delaya, Tobiya, oun Nekoda. Khetne his le 642 (shob-sheel-te-star-deesh-te-douy) morsha.

Debleskri gili 101:7

Kolla, kay rakrenn douy čipyentsa, nay ačenna gar an miro kheer, oun i rhorhene hounte djan mange dran i yaka.

Debleskri gili 69:28

Čin haki doosh lendar an i liil; yaake te moukess len tou gar an tiro čačepen te vell.

Debleskri gili 69:5

Boudeder har mire balla ap miro shero hi kolla, kay hi rhoyedo ap mande, ninna te krom me len či. Oun kolen, kay kamenn mange čilačepen, hi bari zoor, oun kamenn man te marell. Me krom len či, oun hounte dap kova pale, hoy me gar čorom.

Debleskri gili 87:6

An o liil, kay i menshe dran hake themma dren činlo venn, činell o baro Devel pal hako lab: Kava hi kate khere.

Debleskri gili 95:11

Doleske dom man sovel an miri rholi: “Yon te djan gar dren an miro them, kay nay vans le khere!”

Jesaja 4:3

Oun kolla, kay djides ačan an Yerusalem, oun pral ačan ap i berga Sion, kolla venn kharedo Debleskre menshe. Lengre laba hi činlo an o liil, kay kolla o djipaske an o foro Yerusalem dren činlo hi.

Jeremia 14:15

Kova hi, hoy me, o baro Devel, krau ap kol rakepangre, kay penenn, te rakrenn le an miro lab, ninna te bičrom len gar. Yon penenn ninna, te vell kek kourepen oun kek bok an kava them. Save rakepangre hounte merenn an o kourepen oun i bokatar.

Jeremia 17:13

Tou, baro Devel, hal kova, ap koleste i Israelitarya dikenn. Pral halauterende, kay moukan tout, vell ladj. Oun kolla, kay djan toutar krik, kolengre laba venn bistedo har te vans le činlo an i čik. Yon moukan tout, o baro Debles, kova, kay hi har i kvella, dran kolate djido pani vell.

Jeremia 23:20

O baro Debleskri rholi moukell gar tele, bis te kras lo, hoy les glan his. I tsiro vell, kay hayvenn t'mer kova.

Jeremia 4:9

O baro Devel penell: Ko dives vella, kay trashenn o baro ray oun i pralstoune pral Israel. O Debleskre rakepangre oun leskre rashaya djinenn gar bouder, hoy te penenn le.

Ezekiel 11:10

T'mer venn o rhareha moulo dino. Kate an o them Israel dau t'men t'mari phagi. Oun t'mer dikenn oun hayvenn, te hom me o baro Devel.

Ezekiel 12:20

An kol forya djivell bouder kek. Oun o harhetikro them vell i moulo them. Palle dikenn oun hayvenn t'mer, te hom me o baro Devel.

Ezekiel 13:14

Yaake phagau koy massouri tele, hoy t'mer parnes makan. Me moukau lat trouyel te vitsrell, te venn lakre telstoune barra diklo. Te perell li khetne, perenn i barra ap t'mende, oun t'mer merenn. Oun t'mer dikenn oun hayvenn, te hom me o baro Devel.

Ezekiel 13:23

Doleske krau, te penenn nay bouder gar rhorhepen glan-vi, vitar gar nay dourkrenna! Na-a, me kamau mire menshen dran t'mare vasta vin te lell. Oun t'mer dikenn oun hayvenn palle, te hom me o baro Devel!

Ezekiel 20:38

Kolen, kay mantsa phagan oun mandar tele peran, čivau ap i rig. Ninna te lau len vin dran kol themma, kay le vi-themarya his, vell kek lendar an o them Israel. Palle dikenn oun hayvenn t'mer, te hom me o baro Devel.

Daniel 12:1

Oun an ko tsiro stell o bolepaskro Mikael pre, kova, kay ap i rig tire menshendar hi. Ko tsiro hi yaake pharo, har das kek vavar glan kova, yaake rah har menshe koy hi. Oun an ko tsiro venn tire menshe vi-lino dran i bari bibarht, lauter kolla, kay an o Debleskro liil dren činlo hi.

Hosea 4:5

Doleske perenn t'mer rashaya ap o dives, oun o Debleskro rakepaskro, kay pash t'mende hi, perell ratsyake. Oun o kheer Israel, t'mari day, krau paash.

Hosea 9:3

T'mer ačenn gar an o them, hoy o baro Devel t'men das. I menshe dran o them Efrayim hounte djan pale an o them Egiptia, ninna an o them Assour. Kote hounte rhan le savo koova, hoy pale-čiddo hi.

Micha 3:5

Kava penell o baro Devel ap i rakepangre, kay penenn, te vell len i lab o baro Deblestar, oun kova hi gar yaake. Yon rhorhenn i menshen oun penenn kolenge, kay denn len rhapaske: Halauter vell mishto t'mentsa! Kolenge, kay denn len či te rhal, penenn le: I čilačo tsiro vell pral t'mende.

Micha 3:6

Doleske vell pral t'mende kali rati. T'mer dikenn bouder kek dikepen. Kek lab o Deblestar vell t'men. O kham djal tele t'menge, oun o dives hi t'menge har i rati.

Louka 10:20

Avenn gar barhtelo, te shounenn i benga ap t'mende! Avenn barhtelo, kay t'maro lab an o bolepen dren činlo hi!”

Filiparja 4:3

Me mangau ninna tout, miro lačo males, ab lenge ap i rig! Har sikrom i menshenge o Yezouseskro drom, boudran le khetne mantsa oun o phraleha, o Klemens, oun kol vavarentsa, kolengre laba hi činlo an o Debleskro liil, kay halauter dren činlo hi, kay lenn o Debleskro djipen.

Hebrearja 12:23

Kote venna o Debleskre čave khetne. Lengre laba hi an o bolepen pre činlo. Kote hi o Devel, kay rakrell o čačepen vin pral i tsele menshende. Kote hi ninna kol tsele patsle, kay meran oun kolen o Devel pash peste las.

Debleskro tsiro 13:8

Lauter, hoy ap i phoub djivenna, sharenn ko firhes, – lauter kolla, kolengre laba gar činlo hi an o djipaskro liil. Kolla, kay lengre laba dren činlo hi an kava liil, hi yaake rah dren činlo, har i phoub koy hi. Kava liil hi o terno bakres, hoy maredo vas.

Debleskro tsiro 19:20

Oun ko firho vas tapedo, ninna leskro rhorheno rakepaskro. Ko rakepaskro kras boud baro koova, oun anas kolen ap o bengeskro drom, kay o firheskro lab ap pende lan, oun ko firhes an-mangan, hoy i menshendar kerdo vas. Oun djides van kol douy an i bari yag vitsedo, hoy zoreles rhačella oun khandella.

Debleskro tsiro 20:12

Oun me dikom i moulen: i bare har i tikne. Yon his tardo glan o Debleskro beshepaskro. Oun lila van pre kerdo, kay činlo hi, hoy i menshe kran. Pale vas ko djipaskro liil pre kerdo, kay kolla dren činlo hi, kay djivenna hako tsiro. Oun o čačepen vas vi-rakedo pral kol tsele moulende yaake, har an i lila dren činlo hi.