Debleskro tsiro 3:21 - O Debleskro Lab 2024 (Sinte-Manouche)

²¹ Kova, kay zoreles an o patsepen ačas, oun gar pre das, kova nay beshell pes mantsa ap miro rayeskro beshepaskro, yaake har me ninna zoreles tardo homs, oun me beshom man miro dadeha ap leskro rayeskro beshepaskro.

O Debleskro Drom 2021 (Sinte)

²¹ Kowa, kai soreles an o patsepen atchas, un gar pre das, kowa nai beshell pes mantsa ap miro rajeskro beshepaskro, jaake har me ninna soreles tardo homs, un me beshom man miro dadeha ap leskro rajeskro beshepaskro.

Debleskro tsiro 3:21 ပူးပေါင်းရင်းမြစ်များ

Mateo 19:28

Penas o Yezous ap lende: “Čačepah, me penau t'menge: Ko tsiro vella, kay o Devel lauter neves krella. Ap ko tsiro hi o Mensheskro Čavo o ray pral lauterende, oun yob hi beshdo ap peskro rayeskro beshepaskro. Oun t'mer, kay mantsa djana, t'mer venn ninna raya, oun han beshdo ap deesh-te-douy rayeskre beshepangre, oun rakrenn o čačepen vin pral i tsele menshende, kay venna i deesh-te-douy Israeleskre čavendar.

Mateo 25:21

Penas o ray ap leste: Kova kral tou mishto. Tou hal i lačo boudepaskro. Me dom tout i tikni boudi, oun tou kral kay boudi mishto. Doleske dau me kanna boud koova an tire vasta. Ab an miro kheer dren, te vess tou mantsa barhteles!

Mateo 28:18

Oun o Yezous djas pash lende oun penas ap lende: “O baro Devel das man i zoor pral o bolepen oun pral i phoub.

Louka 22:30

Oun t'mer rhana oun piyenna mantsa kote, kay me o baro ray hom, oun han beshdo ap rayeskre beshepangre, oun penenn o čačepen vin pral i tsele menshende, kay venna o deesh-te-douy Israeleskre čavendar.”

Johanni 13:32

Te vas o Debleskro raylepen oun leskri zoor ap leste diklo, dell o Devel leste peskro raylepen. Oun ko tsiro hi kanna kay.

Johanni 16:33

Kova lauter penom t'menge, te vell t'men i bari barht an o dji pral kova, kay han mire. Kate ap kay phoub hi t'men daar. Ma darenn! Me hom zorleder har halauter ap kay phoub.”

2. Timoteo 2:12

Te rikrah vin an o patsepen, vah mer raya leha an o bolepen. Te dah mer les bourhoste, dell yob men ninna bourhoste.

Debleskro tsiro 1:6

Yob kras men raya oun rashaya o Debleske, peskro dadeske. Leske hi o raylepen oun i zoor kanna oun hako tsireske! Amen.

Debleskro tsiro 12:11

Mare phrala his zorleder har ko phoukepaskro. O terno bakro, hoy maredo vas, kova thovas lengri doosh peskro rateha tele. Mare phrala sikran i menshende o čačo drom pash o Debleste, ninna te van le doleske maredo.

Debleskro tsiro 17:14

Oun yon kourenn pen ko terno bakreha. Oun o terno bakro hi zorleder har yon. Yob hi o ray pral i tsele rayende, oun o pralstouno pral i tsele pralstunende. Oun pash leste hi kolla, kolen yob gole das oun vin rodas, kolla, kay ap leste patsenna.”

Debleskro tsiro 2:7

Shounenn halauter mishto, hoy o Debleskro Dourho penella ap i patslende! Kova, kay zoreles an o patsepen ačas, oun gar pre das, koles dau te rhal ko roukestar, hoy o djipen della, kova, hoy tardo hi an o Debleskri shoukar baar.”

Debleskro tsiro 20:4

Oun me dikom kolen, kolenge o shero tele dino vas doleske, kay rikran le zoreles ap o Debleskro lab oun sikran i menshende o Yezouseskro drom. Yon mangan gar ko firhes an, vitar gar ko firhes, hoy i menshendar kerdo vas. Oun yon lan gar o firheskro lab ap pengre shere, vitar gar ap pengre vasta. Kalla lauter van kanna djido. Yon hi beshdo ap i rayengre beshepangre, oun lenn i zoor, te rakrenn le o čačepen vin pral i menshende. Khetne o Yezous Kristeha hi le raya yek zero bersh.

Debleskro tsiro 20:6

Barhtele hi kolla, kay hi mank kolende, kay venn glanstounes i moulendar djido. Yon hi o Debleskre menshe, oun merenn gar o douyto kopo. Yon hi i rashaya o baro Deblestar oun o Yezous Kristestar. Oun khetne leha hi le raya pral lauter yek zero bersh.

Debleskro tsiro 5:10

Oun tou kreh lendar raya oun rashaya maro Debleske. Oun yon venn raya pral i tseli phoub.

Debleskro tsiro 6:2

Oun me dikom i parno grayes. Oun kova, kay pre beshdo hi, koles hi i bogo an o vast. Oun les vas i shereskro sonakay dino, hoy sikrella, te hi yob zorleder har boud vavar bare raya. Oun yob djas vin an o kourepen, oun vas zorleder har yon halauter.

Debleskro tsiro 7:17

O terno bakro, hoy mashkral o Debleskro beshepaskro hi, kova dell yak ap lende, har i bakrengro ray ap peskre bakre yak della, oun anell len pash o pani, hoy o djipen della. Oun o Devel khossell hake sva ap lengre yaka tele.