Debleskro tsiro 22:2 - O Debleskro Lab 2024 (Sinte-Manouche)

² O pani nashell mashkral o baro drom. Ap haki rig o panyestar hi kol rouka tardo, kay denna o djipen. Ap lende venna deesh-te-douy kope an i bersh roukengro rhapen baro, hako čon yek kopo. Oun i patria kol roukendar krenn i menshen an i tsele themma sasto.

O Debleskro Drom 2021 (Sinte)

² O pani nashell mashkral o baro drom. Ap haki rig o panjestar hi kol ruka tardo, kai denna o djipen. Ap lende wenna deesh-te-dui kope an i bersh rukengro chapen baro, hako tchon jek kopo. Un i patria kol rukendar krenn i menshen an i tsele themma sasto.

Debleskro tsiro 22:2 ပူးပေါင်းရင်းမြစ်များ

1. Mose 2:9

Oun o baro Devel, maro ray, moukas boud rouka baro te vell dran i phoub. Kolla his shoukar. Oun lengre roukengre his lačo rhapaske. Mashkral i baar his ko rouk tardo, kay della djipen, ninna ko rouk, kay della gosvepen, hoy hi lačo oun hoy hi čilačo.

Debleskri gili 147:3

Kolen, kay lengro dji phagedo hi, krell lo pale sasto, oun kolenge, kay doukedo hi, čivell lo i pandepen pre.

Gosewe laba 3:18

Har i rouk, hoy o djipen dell, hi o gosvepen hakeneske, kay les an peste pre-lell. Barhtele hi lauter, kay o gosvepen an pengre djia rikrenn.

Jesaja 6:10

Rake lentsa, ninna te pandenn le pengre djia, oun krenn pengre kanda kashteno, oun pengre yaka pandlo. Te dikans le pengre yakentsa, oun shounans pengre kandentsa, oun hayvans pengre djiyentsa, moukans le pengro čilačo drom oun vans pash mande, oun me kroms len sasto.

Jeremia 17:14

Kre man sasto, baro Devel, Te kreh man sasto, palle hom sasto. Le man vin dran i bibarht! Palle nay krell man kek či. Tou hal kova, kones sharau.

Ezekiel 47:1

Oun ko morsh anas man palpale pash o voudar o Debleskro kherestar. Leskri glanstouni rig his koy rig, kay o kham pre djal. Kote dikom pani, hoy nashas tel o voudar vin. Kava pani nashas i kotar tele ap koy glanstouni rig o kherestar pash koy rig, kay o kham pralstounes tardo hi. Palle djas lo kote, kay koy rhačepaskri tardo hi, doureder ap koy rig, kay o kham pre djal.

Hosea 14:4

Mer poučah bouder gar kolendar dran o them Assour, te venn le menge ap i rig, oun djinah, mari zoor vell gar mare grayendar oun vourdya. Oun ap kova, hoy mer mare vastentsa kram, penah bouder gar: “T'mer han mare debla.” Tou kreh tiro dji pre kolenge, kolen kek dad bouder hi.

Zakarie 14:8

An ko tsiro nashenn djide panya dran o foro Yerusalem vin. Ko yek paash nashell an o baro pani, hoy kote hi, kay o kham pre djal. Ko vavar paash nashell an o baro pani, hoy kote hi, kay o kham tele djal. Ko pani nashell an i niyal har an o vend.

Louka 4:18

O Debleskro Dourho hi ap mande. Yob rodas man vin, te penap i čorvelenge o Debleskro lačo lab. Oun yob bičras man, te penap kolenge, hoy stilde hi, te venn le dran lengro stilepen vin, oun kolenge, kay korelo hi, te dikenn le pale, oun kolenge, kay pale-čiddo hi, te venn le pale erligo,

1. Petro 2:24

O čilačepen, hoy mer kram, las o Yezous Kristo ap peste, oun hidjras les ap o troushel. Har yob menge meras, hi kova yaake, har te meram mer leha. Kanna hi o čilačepen an mende moulo. Oun mer djivah nay i lačo oun čačo djipen. Kol douka, hoy o Yezous ap peste las, kran maro djipen sasto.

Debleskro tsiro 2:7

Shounenn halauter mishto, hoy o Debleskro Dourho penella ap i patslende! Kova, kay zoreles an o patsepen ačas, oun gar pre das, koles dau te rhal ko roukestar, hoy o djipen della, kova, hoy tardo hi an o Debleskri shoukar baar.”

Debleskro tsiro 21:21

Oun kol deesh-te-douy bare voudya hi deesh-te-douy mirklia hako baro voudar hi yek mirkli. Oun kol dromma an ko foro his dran o lačo sonakay, djoudjo har vali.

Debleskro tsiro 21:24

Oun i menshe an vavar themma dikenn koy momeli oun venna pash leste. Oun i bare raya ap i phoub anenn pengro bravlepen an ko foro.

Debleskro tsiro 22:1

Oun yob sikras man o baro lengsto pani, hoy djoudjo hi har i djoudji vali. Ko pani dell o djipen oun vell kotar, kay hi o beshepaskro o Deblestar oun o terno bakrestar.

Debleskro tsiro 22:14

Barhtele hi kolla, kay pengre ripya djoudjes thovenna. Yon nay rhan ko roukestar, hoy o djipen della, oun nay djan an kol bare voudya an ko foro dren.

Debleskro tsiro 22:19

Oun te lell yek čomone krik kal labendar, kay hi činlo an kava liil, palle lell o Devel leskro rhapen krik ko roukestar, hoy della o djipen. Ninna nay djal yob gar an o Debleskro foro dren, pral hoy činom an kava liil.