Debleskro tsiro 19:10 - O Debleskro Lab 2024 (Sinte-Manouche)

¹⁰ Oun me vitsrom man glan leste tele, te sharap les. Oun yob penas ap mande: “Ma kre kova! Share o Debles! Me hom o Debleskro boudepaskro har tou oun tire phrala, kay sikrenn i vavar menshende o Yezouseskro drom. Kolen das o Yezous o Debleskro Dourho. Kova sikrell len, te hi le leskre menshe.”

O Debleskro Drom 2021 (Sinte)

¹⁰ Un me witsrom man glan leste tele, te sharap les. Un job penas ap mande: “Ma kre kowa! Share o Debles! Me hom o Debleskro budepaskro har tu un tire phrala, kai sikrenn i wawar menshende o Jesuseskro drom. Kolen das o Jesus o Debleskro Ducho. Kowa sikrell len, te hi le leskre menshe.”

Debleskro tsiro 19:10 ပူးပေါင်းရင်းမြစ်များ

2. Rajengro liil 17:36

Man kokres mangenn an! Glan mande čivenn t'men tele oun anenn mange firhen oun soungepaskro koova. Me hom o baro Devel, kay anom t'men dran o them Egiptia vin miro zorelo vasteha oun bari zoryah.

Debleskri gili 45:11

Shoun miri čay! Dik oun shoun mishto: Biste tire menshen oun tiri tseli familya!

2. Mose 34:14

Mangenn kek vavar Debles an! Me, o baro Devel, kamau, te kamenn man kokres. Me kamau kokres te vap t'maro Devel.

Daniel 2:46

Kote moukas pes o baro ray Neboukadnezar ap i phoub te perell, glan o Daniel, oun penas, te rhačrenn le leske rhapen oun soungepaskro koova.

Daniel 7:10

Oun i lengsti yag das lestar karye vin. Oun leske boudran zerya kope zerya. Oun deesh-zerya kope deesh-zerya his glan leste tardo. Oun i čačepangre raya beshan pen, oun i lila van pre kerdo.

Mateo 4:10

Koy penas o Yezous ap leste: “Dja touke mandar, tou beng! An o Debleskro lab hi činlo: Tou mangess o Debles an, – yob hi tiro ray, – oun vess leske kokres koy!”

Markus 5:22

koy vas i pralstouno pral i biboldengri kangri. Leskro lab his Yayro. Har dikas lo o Yezouses, peras lo glan leste tele,

Markus 7:25

I djouvel shounas lestar. Kaya his kek biboldetsa. Yoy his dran o them Siro-Fenicia. Kolakri čat his i beng an late. Oun koy djouvel vas pash leste, oun vitsras pes glan leste ap i phoub, oun mangas lestar, te tradell lo ko beng dran lakri čate vin.

Louka 1:19

O bolepaskro penas ap leste: “Me hom o Gabriel, oun me hom glan o Debleste tardo. O Devel bičras man pash toute, te penap touke kova.

Louka 24:44

Oun yob penas: “Har me pash t'mende homs, penom me ap t'mende: Halauter hounte vell čačo, hoy o Mose činas, oun hoy o Debleskre rakepangre pral mande penan, oun hoy an o Debleskre gilya činlo hi.”

Johanni 5:39

T'mer rodenn o djipen an o Debleskro lab oun patsenn, kay hatsenn kote ko djipen, hoy gar pre-herella. Oun čačepah, o Debleskro lab rakrell mandar.

Bičepangre 10:43

Kolestar rakrenn i tsele Debleskre rakepangre an pengre lila. Yon penenn, kay lell o Devel i doosh hakenestar krik, koon ap o Yezous Kristeste patsella.”

Bičepangre 13:27

Kolla, kay djivenn an o foro Yerusalem, oun lengre pralstoune hayvan gar, koon o Yezous hi. Yon hayvan vitar gar kol laba, hoy o Debleskre rakepangre pral leste penan, ninna te venn kal laba hako Debleskro dives an i biboldengre kangria dravedo. Har yon o Yezouses ap o troushel dan, kran yon kova, hoy o Debleskre rakepangre glan i rah tsiro penan.

2. Korintarja 8:7

T'mer han bravelo an hako koova: t'maro patsepen hi baro; t'mer hayvenn har te penenn o Debleskro lab oun djinenn boud pral o Debleste; t'mer krenn i bari boudi o Debleske. Oun o kamlepen, hoy ap mende dikan, vas ninna bares an t'mende. Doleske kamah, te sikrenn t'maro baro dji ninna an kava koova oun čivenn yaake boud love khetne har djala i vavar patslenge.

Efesarja 5:15

Denn yak koy pre, har t'mer t'maro djipen djivenna! Ma djivenn har dinele menshe! Djivenn har kolla, kay djinenna, hoy mishto hi!

Efesarja 5:33

Ninna te hayvau me kava lab yaake, penell kava lab t'menge: Hakeno hounte vell yaake kamlo ap peskri romyate, har yob kamlo ap peste hi! Oun i romni hounte vell lačo ap peskro romeste!

Filiparja 3:3

Mer, kay ap o Yezous Kristeste patsah, ham čačepah o Debleskre menshe. Ap mende hi o Debleskro Dourho. Yaake nay krah o Debleskri boudi. Mer ham barhtelo pral kova, hoy o Yezous Kristo menge kras oun hounte rikras kek koova, hoy vella i menshendar. Mer djinah, savo koova nay anell men gar pash o Debleste.

1. Tessalonikarja 5:15

Ma avenn čilačo ap kolende, kay čilačo ap t'mende van! Moukenn gar tele, te venn lačes ap hakeneste mashkral t'mende, ninna ap i tsele vavar menshende!

Hebrearja 1:14

I tsele bolepangre hi leskre boudepangre. Kolen bičras o Devel ap i rig kolendar, kay djan ap o Debleskro drom, te lenn le o Debleskro djipen, hoy gar pre-herella.

Hebrearja 12:25

Denn yak, te shounenn ap o Debleste, kay ap t'mende rakrella! Har yob ap i phoub ap i phoure Israelitarya rakras, kaman le gar ap leste te shounell, oun leskri rholi vas pral lende. Kitse boudeder vell o Debleskri rholi pral mende, te shounah gar ap leste, kay dran o bolepen rakrella.

1. Johanni 5:10

Koon ap o Debleskro čaveste patsella, kova djinella an peskro dji, kay hi kova čačo, hoy o Devel pral o Yezous Kristeste penas. Koon o Debles gar patsella oun leskre laba gar patsella, hoy o Devel pral peskro čaveste penas, kova penella, te rhorhras o Devel.

1. Johanni 5:21

Doleske, mire čave, denn yak, te mangenn o čačo Debles kokres an oun kek vavares!

Debleskro tsiro 1:1

An kava liil hi kova činlo, hoy o Devel moukas o Yezous Kristes te dikell, te sikrell yob peskre boudepangren, hoy an i tikno tsiro hounte vella. Oun o Yezous Kristo bičras peskro bolepaskres pash mande, te sikrell lo mande kava lauter. Me, o Yohanni, hom leskro boudepaskro

Debleskro tsiro 1:9

Me, o Yohanni, hom t'maro phraal an o patsepen ap o Yezouseste. Yob hi miro baro ray, har yob t'maro baro ray hi. Yaake har t'mer venn leske palla lino, vom me ninna leske palla lino, oun dom miro patsepen gar pre. Me penom i menshenge o Debleskro lab, oun sikrom lende o Yezouseskro drom. Doleske vom stildo oun anlo ap ko them Patmos, kay an o baro pani čiddo hi.

Debleskro tsiro 12:11

Mare phrala his zorleder har ko phoukepaskro. O terno bakro, hoy maredo vas, kova thovas lengri doosh peskro rateha tele. Mare phrala sikran i menshende o čačo drom pash o Debleste, ninna te van le doleske maredo.

Debleskro tsiro 12:17

Oun ko baro lolo sap vas rhoyedo ap koy djouvyate, oun djas koy, te marell lo lakre čaven. Kolla hi kol menshe, kay shounenn ap o Debleskro lab, oun djan ap o Yezouseskro drom.

Debleskro tsiro 14:7

Oun yob das bari gole: “Darenn o Deblestar oun sharenn les! Ko tsiro hi kanna kay, kay yob o čačepen pral i tsele menshende vi-rakrella. Vitsrenn t'men tele glan koleste, kay kras o bolepen oun i phoub, oun o baro pani, oun mangenn les an!”

Debleskro tsiro 15:4

Toutar darella hakeno, tiro labestar penenn le: Har baro oun shoukar hi lo! Maro ray, o baro Devel hal tou. Kek vavar hi yaake har tou. I raya venna dran hake themma; glan toute vitsrenn le pen tele, te sharenn le tout. Lauter dikan, har pal o čačepen tou djal, har tou i menshende lengri phagi dal.

Debleskro tsiro 19:9

Oun o bolepaskro penas ap mande: “Čin an ko liil: Barhtele hi kolla, kay kharedo van, te venn le ap o terno bakreskro biyab. Kal laba hi čačepah o Debleskre laba,” penas lo ap mande.

Debleskro tsiro 4:10

Hako kopo, kay krenn le kova, vitsrenn pen kol biish-te-star čačepangre phoure glan koleste tele, kay ap o rayeskro beshepaskro beshdo hi, oun sharenn koles, koleskro djipen gar pre-herella. Oun yon čivenn pengro sherengro sonakay glan o rayeskro beshepaskro tele, oun penenna: