Debleskro tsiro 17:17 - O Debleskro Lab 2024 (Sinte-Manouche)

¹⁷ Kova das len o Devel an lengre djia, te krenn yon, hoy yob kamella. Doleske rikrenn le lauter khetne, oun denn pengri zoor ko firheste. Kova djala lauter yaake rah, bis te vas lauter yaake, har o Devel penas.

O Debleskro Drom 2021 (Sinte)

¹⁷ Kowa das len o Dewel an lengre djia, te krenn jon, hoi job kamella. Doleske rikrenn le lauter khetne, un denn pengri soor ko viecheste. Kowa djala lauter jaake rah, bis te was lauter jaake, har o Dewel penas.

Debleskro tsiro 17:17 ပူးပေါင်းရင်းမြစ်များ

Esra 7:27

Sharedo vell o baro Devel, ko Devel mare phourendar! Yob hi kova, kay čivas sau koova an o rayeskro dji, te nay vell o baro Debleskro kheer an o foro Yerusalem yaake raylo oun shoukar!

Debleskri gili 105:25

Kolenge das lo an o dji, te dikenn le čilače yakentsa ap o Debleskre menshende, oun kran lenge midjak koova.

Gosewe laba 19:21

Boud koova hi, hoy i morsh peske glan lell an peskro dji; kokres kova vella, hoy o baro Debles glan hi yekeha.

Gosewe laba 21:1

O baro rayeskro dji hi har i lengsto pani an o baro Debleskro vast, hoy moukell lo kote te nashell, kay yob kamell.

Jesaja 45:17

O Israel vell vin lino o baro Deblestar dran o čilačepen hako tsireske. Kek ladj oun kek praasepen vell ap leste – an kek tsiro.

Jeremia 32:40

Oun me krau lentsa vin, te moukap gar tele, te krap lenge lačepen, oun te dap len i dji, hoy ap mande shounell, oun moukell man gar. Kava lab, hoy lentsa vin krau, ačell hako tsireske.

Daniel 12:7

Oun me shounom ko morshes, kay an layntikre koola rido his, oun pral ko lengsto pani tardo his. Oun kova hadas peskro čačo oun peskro servo vast pre ap o bolepen, oun das pes sovel pash koleste, koleskro djipen gar pre herella, oun penas: “Yek tsiro oun douy tsirya oun i paash tsiro. Oun ap ko tsiro, kay o Debleskre menshe pale khetne djivenna, oun bouder gar kate te kote tradedo hi, palle hi kova lauter kerdo.”

Louka 22:22

Me, o Mensheskro Čavo, hounte merap. Ninna te hi mange glan diklo, te djap kava drom, havi bibarht vell ap koleste, kay ap mande phoukrella!”

Louka 22:3

Koy djas o beng an o Youdas Iskariot dren. Kova his yek kol deesh-te-douyendar.

Louka 22:37

Me penau t'menge: Hi činlo pral mande an o Debleskro lab: Yon penenn lestar, te hi lo yek lendar, kay čilačo hi. Čačepah, lauter, hoy pral mande činlo vas, vella čačo.”

Johanni 10:35

Kolentsa, kay o Devel rakras, ap kolende penas yob debla. Oun kova, hoy an o Debleskro lab činlo hi, nay vell gar krik lino.

Johanni 13:18

Kova penau me gar t'mendar halauterendar. Me djinau, kones me vin rodom. Kova hounte vell yaake, har an o Debleskro lab tardo hi: Kova, kay rhal kanna o maro mantsa, dell i ladini ap mande.

Johanni 13:2

Ap koy rati, har yon rhan, das o beng o Youdases an o dji, te phoukrell lo ap leste. O Youdaseskro dad his o Simon Iskariot.

Johanni 19:24

Koy penan yon yek ap o vavareste: “Mer moukah ko ripen yaake, har kova hi. Mer khelah, koon les lella.” Yaake vas kova čačo, hoy an o Debleskro lab činlo hi: Hakeno las i kotar mire ripyendar. Oun koon miro telstouno ripen lella, khelan yon vin. Yaake kran i lourde.

Johanni 19:28

Pal kova, har o Yezous djinas, kay yob halauter kras, penas lo: “Man hi troush!” Kova penas yob, te vell kova čačo, hoy an o Debleskro lab glan-vi penlo vas.

2. Korintarja 8:16

Me parkrau man pash o Debleste, te das yob maro phrales, o Tites, i baro dji t'menge.

Debleskro tsiro 10:7

An kol divessa, kay o eftato bolepaskro rakrella, oun an peskri phourdepaskri phourdella, hi lauter kerdo, hoy o Debles an o dji his, te kras lo les yaake har yob ap peskre boudepangre penas, te vell kova.

Debleskro tsiro 15:1

Oun me dikom i vavar baro koova an o bolepen. Kova his baro oun dareno. Kote his efta bolepangre, kay anenn efta kope i bari phagi pral i phoub. Pal koy eftati phagi vell bouder kek phagi. Palle hi o Devel bouder gar rhoyedo.

Debleskro tsiro 17:13

Kolla rikrenn khetne, te denn le pengri zoor ko firhes, te vell koles boud penepaske.

Debleskro tsiro 19:9

Oun o bolepaskro penas ap mande: “Čin an ko liil: Barhtele hi kolla, kay kharedo van, te venn le ap o terno bakreskro biyab. Kal laba hi čačepah o Debleskre laba,” penas lo ap mande.

Debleskro tsiro 6:11

Oun hakenes lendar las i parno ripen. Oun yek penas ap lende: “Moukenn tele i tikno tsiro! T'mare phrala, kay boudrenn o Debleske har t'mer boudran, kolendar venna ninna maredo, yaake boud har o Devel moukell, te venn le maredo.”