Čačepangre 16:20 - O Debleskro Lab 2024 (Sinte-Manouche)

²⁰ Oun yoy penas ap leste: “Filistarya hi pral toute Simson!” Kote stas lo dran peskro sopen pre. Oun penas peske: “Me vau krik har hako vavar kopo ninna. Me nay tserdau kol dorya mandar krik.” Yob djinas gar, te djas peske o baro Devel lestar.

O Debleskro Drom 2021 (Sinte)

²⁰ Un joi penas ap leste: “Filistarja hi pral tute Simson!” Kote stas lo dran peskro sopen pre. Un penas peske: “Me wau krik har hako wawar kopo ninna. Me nai tserdau kol dorja mandar krik.” Job djinas gar, te djas peske o baro Dewel lestar.

Čačepangre 16:20 ပူးပေါင်းရင်းမြစ်များ

2. Familjakro liil 15:2

Oun yob djas vin, te rakrell lo o baro rayeha, o Asa, oun penas leske: “Shounenn man, Asa oun t'mer menshe dran o tselo them Youda oun Benyamin! O baro Devel hi t'mentsa, yaake rah har t'mer t'men ap leste rikrenn. Te rodenn t'mer les, moukell yob pes te hatsell t'mendar. Te moukenn les, moukell yob t'men.

Jesaja 42:24

Koon his kova, kay moukas o Yakobes vin te randell, oun das o Israeles i čorepangren an i vasta? His kova gar o baro Devel? Yob hi, koleske o doumo sikram oun leskro drom gar djam, oun ap leskre laba gar shounam.

Hosea 7:9

I vavar menshe rhan leskri zoor, oun yob hayvell kova gar. O Efrayim hi har i phouro morsh, koleskre balla parno van. Oun yob hayvell gar, kay leskro tsiro sik trouyel hi.

4. Mose 14:9

Ma perenn o baro Deblestar tele, oun trashenn gar kol menshendar an ko them! Mer kamah len pre te rhal har maro. Lengro devel, kay das yak ap lende, moukas len. O baro Devel hi mentsa. Ma trashenn lendar!”

Mateo 17:16

Me anom les pash tire malende, te krenn le les sasto. Oun yon nashte kran kova gar.”

Mateo 17:20

Penas lo ap lende: “T'maro patsepen hi tikno. Čačepah, me penau t'menge: Te vals t'maro patsepen ninna tikno har i senftikro djob, nay penans t'mer ap kay berga: Čip tout ap koy vavar rig! Oun koy berga čivals pes ap i vavar rig. Oun či nashte vals, hoy t'mer nashte gar krans.”

2. Korintarja 3:5

Dran mari zoor nay krams mer mari boudi gar mishto. Kay boudi krah mer dran o Debleskri zoor. Oun kova, hoy hayvah, vell o Deblestar.

5. Mose 32:30

Har nay las yek lourdo i zero (1.000) Israelitaryen palla? Har nay tradan douy lourde deesh-zerya (10.000) Israelitaryen yaake, te nashan le penge i daryatar? Kova vas, har o baro Devel, lengro rikepaskro, len an kolengre vasta das.

Josua 7:12

Doleske nay venn i Israelitarya bouder gar zorele pral kolende, kay kourenn pen lentsa. Oun yon hounte nashenn lendar. Kanna hi yon kolla, kay hounte darenn lengro djipaske. Me hom bouder gar t'mentsa yaake rah, har anenn t'mer gar ko koova dran t'mende krik, hoy mandar čoran.

Čačepangre 16:14

Oun har sovas lo, pandas yoy leskre balla khetne i thabentsa ap lakro thabengro banko, oun las i kangli oun tserdas lauter zoreles khetne, oun penas: “Filistarya hi pral toute, Simson!” Kote stas lo dran peskro sopen pre, oun tserdas peskre balla khetne i thabentsa vin dran o thabengro banko. Ninna ko kasht, hoy lauter pandlo rikras, tserdas lo vin.

Čačepangre 16:19

Oun yoy moukas o Simsones an lakri gali dren te sovell, oun das pal yekeste gole, kay leske i efta tsopfe tele činas. Oun yaake kras li les tiknes. Oun leskri zoor djas peske lestar.

Čačepangre 16:21

Oun i Filistarya tapran les, oun dan leske i yaka vin čourye. Oun yon anan les tele an o foro Gaza oun pandan les sasterne shellentsa. Oun an o stilepen hounte kras lo o djob tiknes an i djobeskri.

Čačepangre 16:3

Oun o Simson his koy čiddo bis mashkral an i rat. Oun palle stas lo pre. Oun yob tapras kol douy voudya, hoy khetne o foreskro voudar hi, oun hadas len vin, khetne i rigyentsa oun i pandepangre. Oun čivas len ap peskri phik, oun hidjras len pre pral ap i berga, hoy glan o foro Hebron hi.

Čačepangre 16:9

Pash late an o kheer his morsha khatedo. Kolla louran leske pre. Oun yoy penas ap o Simson: “Filistarya hi pral toute, Simson!” Kote phagas lo kol shelle paash yaake har dorya, te vell yag ap lende. Oun yaake hatsan le gar vin, kay leskri zoor vella.

1. Samuel 16:14

Oun o baro Debleskro dourho djas peske o Saulestar. Oun o baro Devel bičras leske i čilačo dourho, hoy kras leske daar.

1. Samuel 18:10

O vavar dives moukas o Devel o čilačo dourhes pral o Sauleste te vell. Oun yob vas divyes an peskro kheer. I harfa an o vast bashras o David o Sauleske, yaake har yob hako dives kras. Oun o Saules his i vitsepaskro čouri an o vast.

1. Samuel 18:12

O baro Devel his o Davideha oun bouder gar o Sauleha. Doleske daras o Saul o Davidestar.