5. Mose 29:21 - O Debleskro Lab 2024 (Sinte-Manouche)

²¹ Oun t'maro them vell pherdi bibarht oun pherdo nasslepen, hoy o baro Devel ap leste čivell. Oun an ko tsiro, hoy vella, dikenn kova t'mare čave oun kolla, kay lendar venna, ninna kol vi-themarya, kay dran dour themma venna.

O Debleskro Drom 2021 (Sinte)

²¹ Un tumaro them well pherdi bibacht un pherdo nasslepen, hoi o baro Dewel ap leste tchiwell. Un an ko tsiro, hoi wella, dikenn kowa tumare tchawe un kolla, kai lendar wenna, ninna kol wi-themarja, kai dran dur themma wenna.

5. Mose 29:21 ပူးပေါင်းရင်းမြစ်များ

Jeremia 42:18

Doleske penell o baro Devel, ko ray pral o bolepen oun i phoub, kay o Israeleskro Devel hi: Te djan t'mer an o them Egiptia, vell miri zoreli rholi yaake pral t'mende har vas li pral i menshende an o foro Yerusalem. An o them Egiptia han har praasede menshe. Pral kolende denn le i vasta khetne pral o shero. Yon san pral t'mende. Oun te kamenn le yekes te praasell, penenn le: Mou djal touke har i Israelenge an o them Egiptia! Oun kava them, kay kanna han, dikenn t'mer bouder gar.

Ezekiel 13:9

Miro vast vell pral kol rakepangre, kay penenn glan-vi, hoy gar čačo hi, oun kay dourkrenn rhorhepen, te dap len i phagi. An o tsillo, kay mire menshe khetne venn, nay venn yon gar dren. Oun an o liil, kay i laba i menshendar dran Israel dren činlo hi, venn lengre laba gar dren činlo. Oun an o them Israel venn le gar palpale. Palle dikenn oun hayvenn t'mer, te hom me o baro Devel, t'maro ray.

Maleachi 3:18

Palle dikenn t'mer pale, kay djal gar emliges kolenge, kay an o čačepen tardo hi oun kolenge, kay krenn o čilačepen. Djal vavarčandes koleske, kay mangell o Debles an, har koleske, kay mangell les gar an.

Mateo 24:51

oun dell ko boudepaskres khetne, oun anell les kote, kay i rhorhene hi. Kote rovenn le, oun dandrenn i danda khetne i doukatar.

Mateo 25:32

Oun glan leste venn i tsele menshe dran hake themma khetne. Oun yob čivell len ap douy rigya, yaake har i bakrengro ray čivell i bakre ap yek rig oun i bouzya ap i vavar rig.

Mateo 25:41

Oun palle penell yob kolenge, kay ap leskri servi rig tardo hi: T'mer han tel o Debleskro praasepen tardo! Djan t'menge! Djan an koy yag, hoy rhačella hako tsiro, oun hoy hi o bengeske oun leskre kourepangre kerdo!

Mateo 25:46

Oun kol čilače len i phagi hako tsireske. I lače lenn o djipen, hoy gar pre-herella.

5. Mose 28:59

Te shounenn t'mer gar ap leste, dell o baro Devel t'men oun t'mare čaven, oun bičrell t'menge boud doukepen oun pharo nasslepen, ko yek gomme djoungleder har ko vavar. Oun kova ačell i rah tsiro ap t'mende.

5. Mose 28:61

Oun ninna ko tselo vavar nasslepen oun doukepen, hoy hi gar činlo an kava čačepaskro liil, moukell lo pral t'mende te vell, yaake rah bis te t'mer moulo han.

5. Mose 30:10

Shounenn ap leste, djivenn pal leskre laba, hoy an kava čačepaskro liil činlo hi, oun krenn, hoy yob t'mendar kamell! T'mer hounte venn pale pash leste t'maro tselo djiyestar oun t'mari tseli zoryah.

5. Mose 32:23

Pale te pale anau me bibarht pral lende; me dau mire tsele fayle karye an lende.