5. Mose 28:20 - O Debleskro Lab 2024 (Sinte-Manouche)

²⁰ Te moukenn t'mer o baro Debles oun djan ap t'maro čilačo drom, bičrell lo mank t'mende bibarht oun daar an halauter, hoy t'mer krenna, yaake te djinenn bouder gar, hoy te krenn. Yaake merenn t'mer oun djan sik tele.

O Debleskro Drom 2021 (Sinte)

²⁰ Te mukenn tumer o baro Debles un djan ap tumaro tchilatcho drom, bitchrell lo mank tumende bibacht un daar an halauter, hoi tumer krenna, jaake te djinenn buder gar, hoi te krenn. Jaake merenn tumer un djan sik tele.

5. Mose 28:20 ပူးပေါင်းရင်းမြစ်များ

Hiob 24:18

O čilačo vell sik krik hidjedo har i patri ap o pani. Ap leskro kotar phoub hi i praasepen čiddo. Pash peskre drakengre rouka djal lo bouder gar.

Debleskri gili 7:11

O Devel rikrell peskro vast pral mande. Yob lell kolen dran i bibarht vin, kay shounenn ap leste pengro tselo djiyeha.

Jesaja 28:19

Hako kopo, kay venn le, taprenn le t'mendar oun anenn t'men krik, nay vell ap o dives oun ninna an i rat. Te hayvans t'mer, hoy shounenn, palle ačals t'menge o rakepen krik i trashatar.

Jesaja 30:17

I zero morsha t'mendar nashenn penge glan yekeste, kay peskro mouy pre krell oun penell Kanna lenn t'mare dava. Ava, glan panč savendar nashenn t'mer lauter krik. T'mare tsele lourdendar ačell či pral har koy plarhta ap i kasht, hoy pre tardo čivan pral ap i berga, te dikenn le lat foun doural.

Jesaja 51:20

Tire čave peran khetne, oun his čiddo ap hake dromma. Yon hi har i tserfo, hoy an i netsa djas. Yaake tapras len koy rholi o baro Deblestar, oun leskro čingepen.

Jesaja 66:15

Dik, o baro Devel vell an i yag, oun leskre vourdya hi har i zorelo phourdepen. Yob dell len lengro čilačepen pale i bari rholyah, oun leskro čingepen hi har yag, kay rhačrell.

Jeremia 1:16

Oun me dau i menshen an Youda i phagi lengro čilačepaske, hoy yon kran. Yon djan krik mandar oun anan firhen vavar deblenge oun mangan kol figuren an, hoy le pengre vastentsa kran.

Jeremia 19:4

Mire menshe moukan man oun kran kava kotar them pale-čiddo, har rhačran le soungepaskro koova vavar deblenge, kolen prindjrenn yon gar oun vitar gar lengre phoure. Ninna kol bare raya pral o them Youda prindjran len gar. An kava foro maran le menshen, kay kek čilačepen kran.

3. Mose 26:38

An kol themma kol vavar menshendar merenn t'mer. Ko them, kay venn pandles anlo, rhal t'men pre.

Johanni 3:36

Koon ap o čaveste patsella, koles hi ko djipen, hoy gar pre-herella. Koon ap o čaveste gar patsella, koles vell ko čačo djipen gar. O Debleskri rholi ačell pral leste.”

5. Mose 28:8

T'maro baro Devel bičrell t'menge peskri barht ap t'maro djob, te vell t'men boud kolestar an t'mare djobengre khera, oun ap halauter, hoy t'mer krenna. Oun yob dell t'men peskri barht an ko them, hoy lo t'mende dell.

5. Mose 4:26

Kava dives dau man sovel glan o bolepen oun i phoub, te krenn t'mer savo koova, djivenn gar rah an o them, hoy t'mer dren lenna vergel o pani Yordan. Kokres i tikno tsiro ačenn t'mer koy. Palle venn t'mer lauter krik tradedo.

1. Tessalonikarja 2:16

Yon moukenn men gar, te penas mer o lačo lab i vavarenge, kay kek bibolde hi, te nay venn kolla ninna ap o Debleskro drom. Yaake vas i biboldengri doosh yaake baro, bareder djal gar. Oun o Debleskri rholi vas zoreles pral lende.

Čačepangre 2:15

Oun kay le ninna djan, te kourenn le pen, his o baro Devel gar lentsa oun das len kek barht. Yaake vas kova, hoy o baro Devel lenge penas oun leskro vast pre das. Oun yon van an phare tsirya.

1. Samuel 14:20

Oun o Saul oun i tsele lourde, kay pash leste hi, van khetne, oun djan ap i kourepaskri platsa. Oun har le koy van, dikan le, te maran pen i Filistarya kokres. Yek djas ap o vavareste. Lauter his har dineles.