5. Mose 12:2 - O Debleskro Lab 2024 (Sinte-Manouche)

² Te vas ko tsiro, kay lan t'mer ko them dren oun tradan kol vavar menshen vin, palle denn kol tsele platse paash, kay yon pengre deblen an-mangan, ap i bare oun tikne berge, ninna tel bare zenele rouka.

O Debleskro Drom 2021 (Sinte)

² Te was ko tsiro, kai lan tumer ko them dren un tradan kol wawar menshen win, palle denn kol tsele platse paash, kai jon pengre deblen an-mangan, ap i bare un tikne berge, ninna tel bare senele ruka.

5. Mose 12:2 ပူးပေါင်းရင်းမြစ်များ

1. Rajengro liil 14:23

Ap i tsele berge oun tel hako baro rouk kran le penge moulne platse, čivan bare barra pre lengre rhorhene deblenge, ninna figure, hoy i debletsa Ashera sikrenn.

1. Rajengro liil 3:2

An ko tsiro his o baro Debleske gomme kek kheer kerdo. Doleske anan i menshe firhen oun vavar koova i rhorhene deblenge an ko them.

2. Rajengro liil 11:18

Palle djan i tsele menshe dran o them Youda an o kheer ko deblestar Baal, oun kran kol tsele figure paash, hoy les sikran. Oun kol rhačepangre, kay firhen oun vavar koova leske rhačedo van, phagan le tele. Oun glan kol rhačepangre maran le leskro rashayes, o Mattan. Oun o rashay Yoyada bičras klisten, te denn le yak ap o baro Debleskro kheer.

2. Rajengro liil 16:4

Oun yob rhačras firhen oun soungepaskro koova i rhorhene deblenge ap kol moulne platse oun tel hako zenelo rouk.

2. Rajengro liil 23:13

Ninna kras lo kol moulne platse pale-čiddo, hoy kras o Salomo, ko baro ray pral Israel. Kolla his tardo ap koy rig o forestar Yerusalem, kay o kham pre-djal, ap i čači rig o djeteskri bergatar. O Salomo kras len, te venn kote kol djoungele moule debla an-mangedo: i Astarte, koy debletsa dran Sidon; oun o Kemosh, ko devel dran o them Moab; oun o Milkom, ko devel dran o them Ammon.

Debleskri gili 78:58

Yon mangan i vavarengre deblen an. Oun rhoyran o Debles, har kran le penge rhorhene deblen.

2. Mose 23:24

Ma mangenn lengre deblen an! Ma anenn firhen, te rhačrenn len lenge! Ma krenn yaake har kolla, kay an ko them djivenna! Denn lengre tsele deblen paash, oun phagenn kol bare barra, hoy yon lenge pre-čivan!

Jesaja 36:7

Kamenn t'mer mange te penell: Maro baro Devel vell menge ap i rig! Bistran t'mer, kay yob kova hi, koleskre mangepaskre platse o Hiskiya krik las, ninna leskre rhačepangre? Oun o Hiskiya moukas i menshenge an o them Youda oun an o foro Yerusalem te penell: Kokres glan koy rhačepaskri, kay an o foro Yerusalem tardo hi, hounte vitsrenn t'men tele.

Jeremia 17:2

Ninna lengre čave vitsrenn pen tele glan kol rhačepangren oun glan kol figuren, hoy sikrenn i debletsa Ashera, oun hoy le pre čivan tel kol zenele rouka, oun ap i tikne oun bare berge oun ap o them. Me dau t'maro tselo bravlepen oun kouč koova vavarende, te čorenn le kova t'mendar. Koya hi koy phagi ko čilačepaske, hoy t'mer an kava tselo them kran.

Jeremia 2:20

O baro Devel penell: Hako tsiro hadal tout pral mande, oun kamal mange gar palla te djal. Tou penal: Me kamau kek ray pral mande. Oun čival tout koy har i loubni ap i berga tel hako zenelo rouk.

Jeremia 3:13

Tou hounte kress či, har te dikess dren, kay anal doosh ap toute, har hadal tout pre pral o baro Debleste, kay tiro Devel hi. Tou nashal kay te koy trouyel, te mangess vavar deblen an tel hake zenele rouka, oun shounal gar ap mire laba, penell o baro Devel.

Jeremia 3:2

Ap havi berga hals tou gomme gar i morsheha čiddo? Ap o drom hal tou beshdo, oun loureh ap lende, har i Arabari an o moulo tato them. Oun tou kreh ko them pale-čiddo tiro vi-ladjedo oun djoungelo koveha.

Jeremia 3:6

An ko tsiro, kay o Yosia o baro ray his, penas o baro Devel ap mande: Dikal tou, hoy i Israelitarya kran? Yon hi har i djouvel, kay moukas peskro romes, oun djas ap kol tsele berge oun tel hake zenele rouka oun das pes trouyel vavar morshentsa.

Hosea 4:13

Pral ap i berge marenn le firhen pengre rhorhene deblenge, oun ap i tikne berge rhačrenn le lenge soungepaskro koova, tel i bare oun bourhle rouka, kay gar yaake tato hi oun shoukar te beshell. Doleske venn lengre ča loubya, oun lengre čavengre romya rhorhenn pengre romen.

4. Mose 22:41

Oun taysarlakro las o Balak o Bileames peha, oun anas les pral ap i berga Bamot-Baal, te dikell yob kotar ap kol tsele menshende Israel.

5. Mose 7:5

Doleske krenn kava lentsa: Vitsrenn kol pre-čidde barra trouyel, kay marenn le oun rhačrenn le firhen lengro debleske. Phagenn kol bare barra paash, hoy le leske pre-čivan! Oun denn kol kashta tele, hoy sikrenn i debletsa Ashera. Oun rhačrenn lengre figuren pre.

Čačepangre 2:2

Oun t'mendar kamom, te venn kek mala kol menshenge, kay an kava them djivenn, oun te phagenn t'mer lengre pre-čidde barra tele, kay rhačrenn le firhen lengro debleste. Oun hoy kran t'mer? T'mer shounan gar ap kova, hoy penom!