4. Mose 31:23 - O Debleskro Lab 2024 (Sinte-Manouche)

²³ oun halauter, hoy i yag gar pre rhačrell, kova hounte rikrenn an i yag, te vell kova djoudjo. Oun pal kova vitsrenn pani koy pre. Oun kova halauter, hoy rhačrals pre an i yag, čivenn an o pani.

O Debleskro Drom 2021 (Sinte)

²³ un halauter, hoi i jag gar pre chatchrell, kowa hunte rikrenn an i jag, te well kowa djudjo. Un pal kowa witsrenn pani koi pre. Un kowa halauter, hoi chatchrals pre an i jag, tchiwenn an o pani.

4. Mose 31:23 ပူးပေါင်းရင်းမြစ်များ

2. Mose 19:10

Oun o baro Devel penas ap o Mose: “Dja pash lende oun pen lenge, te krenn le pen djoudjo mange kava dives oun taysar, te thovenn le pengre koola.

2. Mose 19:14

Koy djas o Mose i berga tele oun penas i menshenge, te krenn le pen djoudjo o Debleske. Oun hakeno thovas peskre koola.

Jesaja 43:2

Te djah tou an o pani, me hom pash toute, te tassenn tout kol zorele panya gar. Oun te djah tou an i yag, palle rhačell li tout gar, oun nay krell touke či.

3. Mose 11:32

Halauter, ap kova sau moulo firho perell, vell pale-čiddo: hako kashteno koova, ninna ripya, fella oun gone, ninna hako kova, koleha yek i boudi krell. Kova lauter hounte vell an o pani čiddo, oun ačell pale-čiddo, bis te vell rati. Pal kova hi ko koova bouder gar pale-čiddo.

3. Mose 15:17

Leskro tselo an-ripen oun haki ledertikro kotar, ap koleste kova vas, hounte vell tele thodo oun vell pale-čiddo bis te vell rati.

Zakarie 13:9

Oun kolenge, kay pral ačenn, venn phare tsirya, kay hounte djan le dren, te venn le djoudjo kerdo, yaake har roup oun sonakay djoudjo kerdo vell an i yag. Palle denn le ap mande gole, oun me shounau len. Me penau: Yon hi mire menshe. Oun yon penenn: Tou baro Devel, hal maro Devel.”

4. Mose 19:17

Koleske, kay pale-čiddo hi, hounte lenn t'mer yagakri čik kol groumyatar, hoy pre rhačedo vas, čivenn kova an i piri, oun čorenn djoudjo pani pre.

4. Mose 19:9

Oun i morsh, kay gar pale-čiddo hi, hounte lell koy yagakri čik koy groumyatar, oun čivell lat vin glan i plarhtene khera ap i djoudji platsa, te ačell kay yagakri čik kote o tselo khereske Israel, te nay krenn le latar i pani thopaske, hoy lell i pale-čiddo koova i menshendar krik.

4. Mose 31:22

Ko koova dran sonakay, roup, lolo saster, saster, cinno oun blayo,

4. Mose 31:24

Oun t'mer hounte thovenn t'mare ripaskre koola ap o eftato dives. Palle venn t'mer djoudjo. Pal kova nay venn pale ap i platsa, kay i plarhtene khera tardo hi.”

4. Mose 8:7

Yaake hounte kress tou lentsa, te kreh tou len erligo: Tou čivess pani ap lende, te vell lengri doosh krik lino. Oun yon hounte činenn halauter pengre balla tele, oun thovenn pengre koola, oun krenn pen yaake djoudjo oun erligo.

Mateo 3:11

Me čivau t'men an o pani. Kova sikrella, kay t'mer moukan t'maro čilačo drom, oun djan kanna ap o Debleskro drom. Pal mande vell yek, kova hi zorleder har me. Oun me hom gar moldo, te hidjrap leskre kirrha leske. Kova čivell o Debleskro Dourho ap t'mende. Kova hi har i yag.

1. Korintarja 3:13

Vell ko dives, kay dikenn le, hoy hakeno pre čivas. Ap ko dives vell lauter an i yag. Oun koy yag sikrella, hoy haki boudi moldo hi.

Efesarja 5:26

te venn le erligo oun djoudjo glan leste. Yob thovas lengri doosh lendar tele, har patsan le leskro lab, oun van leske an o pani thodo.

1. Petro 1:7

Kova vella pral t'mende, te vell t'maro patsepen zorelo. Yaake har o sonakay an i yag djoudjo oun kouč kerdo vella, yaake hounte vell t'maro patsepen ninna djoudjo oun kouč kerdo. T'maro patsepen hi boudeder moldo har o sonakay, hoy ačell gar. Te ačell t'maro patsepen zorelo, palle sharell t'men o Devel oun krell t'men bares oun rayles ap ko dives, kay vell o Yezous Kristo pale.

1. Petro 3:21

Yaake har van kol orhta menshe vin lino dran o merepen, yaake djas t'menge kanna ninna, har van t'mer taufedo. Kote vas gar koy čik t'mendar tele thodo. Na-a! Koon moukell pes te taufrell, kova mangell o Debles, te dell lo les i djoudjo dji. Kova nay dell o Devel leste doleske, kay stas o Yezous Kristo i moulendar pre oun djas an o bolepen. Kanna hi lo beshdo ap i čači rig o Deblestar, oun hi o ray pral i tsele bolepangre, oun pral i tsele pralstoune oun zorele an o bolepen.

1. Petro 4:12

Kamle mala, t'maro dji vell gar dareno, te venn t'mer zoreles palla lino. Savo koova djal kolenge, kay patsle hi. Kote vell diklo, har t'maro patsepen hi.

Debleskro tsiro 3:18

Doleske penau t'menge: Ginenn mandar sonakay, savo sonakay, hoy an i yag thodo vas, yaake te venn t'mer čačepah bravelo. Ginenn mandar ninna parne ripya, oun rivenn kolla ap t'mende, te han bouder gar nango, oun hounte ladjenn t'men bouder gar. Oun ginenn kouč djet, oun makenn t'mare yaka, te nay dikenn pale!