4. Mose 29:39 - O Debleskro Lab 2024 (Sinte-Manouche)
39 Kova halauter hounte anenn t'mer o baro Debleske ap kol bare divessa, kay venn khetne glan leste. Koy pashel vell kova, hoy denn leste hakeno pestar, ninna kova, hoy dan t'men sovel, te denn les kova: firhe, hoy venn leske tseles rhačedo, djob oun mool, ninna firhe, hoy rhan t'mer khetne glan leste.
39 Kowa halauter hunte anenn tumer o baro Debleske ap kol bare diwessa, kai wenn khetne glan leste. Koi pashel well kowa, hoi denn leste hakeno pestar, ninna kowa, hoi dan tumen sowel, te denn les kowa: vieche, hoi wenn leske tseles chatchedo, djob un mool, ninna vieche, hoi chan tumer khetne glan leste.
Ninna hounte venn le glan o baro Debleste tardo, an kol divessa, kay marenn i rashaya o baro Debleske firhen, hoy leske tseles rhačedo venn. Kova his ap o Debleskro dives, oun ap ko dives, kay o nevo čon diklo vell, oun ap i tsele vavar bare divessa. Hako dives hounte venn yaake boud Levitarya glan o baro Debleste, har glan činlo hi.
Oun yek Levitari, o Kore, koleskro dad o Yimna his, yob das yak ap o voudar ap koy rig, kay o kham pre djala, oun vas kanna dren čiddo te dell lo garda ap ko koova, hoy i menshe pendar o baro Debleske dan. Oun yob hounte das kova ap i rashayende oun i Levitaryen vin, hoy lengro kotar hi, ninna kol kotya mass, hoy kokres i rashayenge his.
Oun o baro ray das peskre firhendar, te venn le rhačedo o Debleske, yaake har činlo hi an i lila o baro Deblestar: haki taysarla oun haki rati, ninna ap o Debleskro dives, oun ap o dives, kay vell o nevo čon diklo, oun ap kol bare divessa.
Oun yon rikran kol bare divessa, kay djivenn i Israelitarya an patyengre khera, yaake har tele činlo vas, oun rhačran yaake boud firhen o Debleske kol tsele efta divessa, har hako diveske glan činlo his.
Pal ko tsiro anan le hako dives kol firhen, kay van taysarlake oun ratsyake rhačedo o baro Debleske. Oun ninna ap hako nevo čon oun ap i vavar bare divessa anan le firhen o baro Debleske. Oun dan ninna kova, hoy yek pestar kamas te dell o baro Debleste.
Kol bare divessa, kay t'mer rikrenn, te vell i nevo čon, oun ninna i vavar bare divessa nay dikau gar bouder. Yon van mange phares te hidjrap len, oun me vom khino tel lende.
Ninna te rhačrenn t'mer mange firhen oun rhapen, hom gar barhtelo pral kova. Kol thoulle firhen, hoy mange marenn oun glan mande rhan, nay dikau bouder gar glan i yaka.
Pen ap i Israelitarya: T'mer hounte denn yak, te anenn an o čačo tsiro ko koova, hoy denn o Debleste, – ko rhapen, hoy vell leske rhačedo oun koleskro soungepen leske shoukar soungella.
Koy pashel hounte anenn i morsh bouzni o baro Debleske, te vell t'mari doosh krik lino. Kova halauter vell pash kol firhe oun ko yarro oun koy mool, hoy vell hako dives o Debleske anlo.
Yaake hounte krell ko mensho, kay his i tsireske o Debleske koy, oun dell kava koova o baro Debleste, ninna ko vavar koova, hoy yob pes sovel das. Yaake har yob pes sovel das, yaake hounte krell yob ninna.