2. Timoteo 4:8 - O Debleskro Lab 2024 (Sinte-Manouche)

⁸ Kova, hoy kanna glan mande hi, hi ko shoukar koova, hoy kolla lenna, kay kran, hoy o Devel kamella. Oun kova dell man maro ray Yezous. Yob hi ko čačepaskro ray, kay djal pal o čačepen. Ko shoukar koova dell lo man ap ko dives, kay yob o čačepen vi-rakrell pral i tsele menshende. Ko shoukar koova dell yob gar mande kokres. Yob dell kova lauterende, kay dikenn o tselo djiyestar ap ko dives, kay vell lo pale.

O Debleskro Drom 2021 (Sinte)

⁸ Kowa, hoi kanna glan mande hi, hi ko shukar koowa, hoi kolla lenna, kai kran, hoi o Dewel kamella. Un kowa dell man maro rai Jesus. Job hi ko tchatchepaskro rai, kai djal pal o tchatchepen. Ko shukar koowa dell lo man ap ko diwes, kai job o tchatchepen wi-rakrell pral i tsele menshende. Ko shukar koowa dell job gar mande kokres. Job dell kowa lauterende, kai dikenn o tselo djijestar ap ko diwes, kai well lo pale.

2. Timoteo 4:8 ပူးပေါင်းရင်းမြစ်များ

1. Mose 18:25

Ko nashte kreh tou gar, te dess kolen temerl, kay kek čilačepen kran – khetne kolentsa, kay čilačo hi. Yaake te djal koleske, kay an o čačepen tardo hi, har koleske, kay čilačo hi. Tou hal o čačepaskro ray pral i tseli phoub. Kameh tou čomone te krell, hoy gar mishto oun čačo hi?”

Debleskri gili 31:19

kolla rhorhene, kay hi pre-phourde oun praasenn kolen, kay an o čačepen tardo hi.

Debleskri gili 7:11

O Devel rikrell peskro vast pral mande. Yob lell kolen dran i bibarht vin, kay shounenn ap leste pengro tselo djiyeha.

Gosewe laba 4:9

Har i rayeskri stadi ap tiro shero hi o gosvepen touke. Ava, har i rayeskri stadi krell lo tout shoukar.

Maleachi 3:17

Oun pral lende penell o baro Devel, ko ray pral o bolepen oun i phoub: Ap ko dives, kay me vau, sikrell pes, kay hi le mire. Oun me krau miro dji lenge yaake pre, har i morsh peskro dji pre krell peskro čaveske, kay leske koy hi.

Mateo 24:36

Kek djinell ko tsiro, kaana kova lauter vella. I bolepangre an o bolepen djinenn les gar, vitar gar o Debleskro čavo. Miro dad an o bolepen kokres djinell les.

Mateo 7:22

Vell ko dives, kay o Devel o čačepen pral i tsele menshende vi-rakrella. Ap ko dives penenna boud ap mande: Ray, ray, an tiri zoor penam mer i menshenge, hoy o Devel menge penas. An tiri zoor tradam i bengen vin, oun kram boud baro zorelo koova.

Louka 10:12

Me penau t'menge: Ap ko dives, kay o Devel o čačepen pral i tsele menshende ap i phoub vi-rakrella, lenna kol menshe, kay lan t'men gar pre, i bareder phagi har kol menshe an o foro Sodom.”

Remarja 2:5

Oun tou kameh gar pash leste te vell. Tiro dji hi har bar. Doleske vell o Debleskri rholi baro oun bareder, hoy ap toute vella ap ko dives, kay hi o Devel o čačepaskro ray oun rakrell o čačepen vin pral i tsele menshende.

Remarja 8:23

Oun gar kolla kokres, na-a, men ninna hi douka oun dikah o tselo djiyeha ap ko tsiro, kay vah čačepah Debleskre čave oun merah bouder gar. Ninna te hi men kanna o Debleskro Dourho an mende, dikah ap ko tsiro, kay merah bouder gar.

1. Korintarja 2:9

An o Debleskro lab hi činlo: Ko lačo koova, hoy kek yak dikas, oun hoy kek kand shounas, oun hoy an kek mensheskro dji dren vas, kova lauter dell o Devel kolen, kay les o djiyestar kamenna.

1. Korintarja 3:13

Vell ko dives, kay dikenn le, hoy hakeno pre čivas. Ap ko dives vell lauter an i yag. Oun koy yag sikrella, hoy haki boudi moldo hi.

1. Korintarja 9:25

Kol naashepangre rikrenn pen lauterestar pale, hoy len khino krella. Ko shoukar koova, hoy kolla lenna, kova ačell gar hako tsiro. Hoy mer patsle lah, kova ačella hako tsireske.

2. Korintarja 5:2

Kate ap kay phoub hi menge ropaske, oun mer kamah o tselo djiyestar, te las ko nevo bolepaskro troupo ap mende.

Filiparja 3:11

te krell o Devel man ninna i moulendar djido.

Kolossarja 1:5

T'maro patsepen oun kamlepen vell dran kova, kay dikenn t'mer ap ko dives, kay djivenn t'mer o Debleha khetne an o bolepen. Kova shounan t'mer ap ko tsiro, har t'menge o lačo lab o Yezous Kristestar penlo vas. Oun ko lab hi čačo.

1. Tessalonikarja 1:10

T'mer dikenn ap ko dives, kay vell o Debleskro čavo dran o bolepen pale. Kova hi o Yezous, koles kras o Devel i moulendar djido. Yob lell men dran o Debleskri rholi vin, hoy pral i menshende vella.

1. Tessalonikarja 5:4

T'mer, kamle phrala, ma djivenn yaake har an i kali rat har kolla, kay prindjrenn o Debles gar! Palle vell ko dives gar pral t'mende har i čorepaskro an i rat.

2. Tessalonikarja 2:8

palle sikrell pes ko čilačo mensho, har yob čačepah hi. Koles marell maro ray Yezous ap ko dives, kay vell lo pale. Yob phourdell ap leste, oun kova merella.

1. Timoteo 6:19

Yon te krenn lačo koova i vavarenge, hi kova lengro bravlepen an o bolepen, hoy ačella. Yaake djivenn le o djipen, hoy o Devel kamella.

2. Timoteo 1:10

Kanna vas o Yezous Kristo, te sikrell lo men o Debleskro lačepen. O Yezous Kristo las men dran o čilačepen vin, oun kras, te vell o merepen bouder kek zoor pral mende. Yob anas menge ko djipen, hoy ačella, har peskro lačo lab penella.

2. Timoteo 1:12

Doleske hounte lap kava lauter ap mande kate an o stilepen, oun me ladjau gar. Me djinau, ap koneste patsaua. Oun me djinau, kay o Yezous Kristo rikrell peskre vasta pral kova, hoy yob an miro vast das, bis te yob pale vella.

2. Timoteo 1:18

Me mangau o Debles, te vell lo leske lačes ap ko dives, kay yob glan leste tardo hi. Tou djineh ninna, har boud yob i patslenge an o foro Efesus boudras.

2. Timoteo 2:5

Yek, kay kourell pes, oun kourell pes gar yaake, har leske penlo vas, kova vell gar o lačeder.

2. Timoteo 4:1

Kova, hoy kanna penau touke, penau glan o Debleste oun glan o Yezous Kristeste, kay krell o čačepen vin pral i djidende oun i moulende. Yob, kay vell pale, te vell lo baro ray pral i tsele menshende, kova shounell, hoy touke penau:

Tito 2:13

Oun mer dikah ap ko barhtelo dives, kay vell o Yezous Kristo pale an o shoukar raylepen. Yob hi maro baro Devel, kay las men dran o čilačepen vin.

Hebrearja 12:11

Ap ko tsiro, kay lah i phagi, kamah kova gar. Na-a, kova doukell men. Pal ko tsiro hayvah, kova his menge mishto. Oun mare djia venna pale barhtelo, oun mer djivah boudeder an o čačepen glan o Debleste, har glan ko tsiro.

Hebrearja 9:28

yaake hounte meras o Yezous Kristo yek kopo i menshenge, te lell lo i doosh boud lendar ap peste. Ap ko tsiro, kay vell lo i douyto kopo, vell lo gar, te lell lo i doosh i menshendar krik. Na-a. Palle vell lo kolenge, kay čivan pengro dji ap leste, te lell lo len pash peste, oun te dell lo len lauter kova, hoy hi lenge an o bolepen.

Jakobo 1:12

Barhtelo hi kova, koon moukell gar peskro patsepen, ninna te vell i pharo koova ap leste. Yob hi moldo, te lell lo ko djipen, hoy gar pre-herella. Kava djipen dell o Devel kolen, kay les kamenna.

1. Petro 1:4

yaake lah mer ninna ko djipen, hoy bouder gar pre-herella. Ko shoukar koova, hoy lah an o bolepen, ačell hako tsiro. Kova vell gar čiklo oun phouro. Kava bravlepen hi t'menge,

1. Petro 5:4

Oun ap ko dives, kay vell o pralstouno bakrengro, lenn t'mer leskro raylepen, hoy ačella hako tsireske.

Debleskro tsiro 1:7

Dikenn, yob vella dran o bolepen, oun hakeno dikell les, ninna kolla, kay les ap o troushel dan. Oun an hake themma rovenn le pral leste, oun penenn le: “Patsams mer ap leste!” Ava, yaake hounte vell kova. Amen.

Debleskro tsiro 19:11

Oun me dikom, har o bolepen pre hi. Oun kote his i parno gray. Oun kova, kay pre beshdo hi, kharella: Morsh labestar, kay rakrell o čačepen. Yob te dell i menshen i phagi oun kourell pes kolentsa, kay čilače hi, djal yob pal o čačepen.

Debleskro tsiro 2:10

Ma darenn kol douka, hoy ap t'mende venna! O beng moukell menshen t'mendar an o stilepen te vitsrell, te vell diklo, har zorelo t'maro patsepen ap mande hi. Oun t'mer venn deesh divessa palla lino. Ačenn zoreles an t'maro patsepen ap mande, ninna te marenn le t'men! Palle dau t'men o djipen, hoy ačella. Yaake baro hi t'maro playsepen!

Debleskro tsiro 22:20

Kova, kay kava penas, penella: “Ava, me vau sik.” Amen. Ab ray Yezous!

Debleskro tsiro 4:10

Hako kopo, kay krenn le kova, vitsrenn pen kol biish-te-star čačepangre phoure glan koleste tele, kay ap o rayeskro beshepaskro beshdo hi, oun sharenn koles, koleskro djipen gar pre-herella. Oun yon čivenn pengro sherengro sonakay glan o rayeskro beshepaskro tele, oun penenna:

Debleskro tsiro 4:4

Oun troul o rayeskro beshepaskro his biish-te-star vavar rayengre beshepangre tardo. Oun ap kolende his biish-te-star čačepangre phoure beshdo. Kolen his parne ripya ap lende, oun i shereskro sonakay ap lengre shere.