2. Timoteo 4:5 - O Debleskro Lab 2024 (Sinte-Manouche)

⁵ Tou, Timoteo, de yak har tou djiveh! Rike vin, ninna te krenn le touke o djipen phares! Pen i menshenge o lačo lab o Yezous Kristestar! Koy boudi das tout o Devel. Kre koy boudi mishto!

O Debleskro Drom 2021 (Sinte)

⁵ Tu, Timoteo, de jak har tu djiweh! Rike win, ninna te krenn le tuke o djipen phares! Pen i menshenge o latcho lab o Jesus Kristestar! Koi budi das tut o Dewel. Kre koi budi mishto!

2. Timoteo 4:5 ပူးပေါင်းရင်းမြစ်များ

Jesaja 62:6

Yerusalem, me čivom morshen ap tire massourya, te denn le yak ap toute. O tselo dives oun i tseli rat denn le bares gole, oun moukenn gar tele, te bistrell tout o baro Devel gar.

Jeremia 6:17

Ninna dom t'men menshen, kay denn yak ap t'mende. Denn garda koy pre, te phourdenn le i phourdepaskri, hoy sikrella: Bibarht vella … Yon penan: Mer kamah len gar te shounell.

Ezekiel 3:17

Tou, mensho, vess kova, kay dikell i bibarht te vell oun penell kova i Israelenge doureder, yaake har yek ap i foro yak dell, oun i menshenge penell, te venn lourde. Te penau me touke i lab, hounte peness kova lenge, te djinenn le, hoy kamau ap lende te anell.

Ezekiel 33:2

Tou, mensho, rake ap i menshende dran tiro them, oun pen lenge: Te anau me o rharo pral i them, oun i menshe an ko them rodenn i morshes lendar vin, te dell yob yak,

Ezekiel 33:7

Tou, mensho, tout rodom vin, te dess yak ap o kheer Israel. Te shouneh i lab dran miro mouy, hounte peness kova lenge, te djinenn le, hoy kamau me pral lende te anell.

Mateo 25:16

Oun ko morsh, kay kol panč gone pherdo roup las, kova djas sik pash i bikepangre, ginas oun bikras boud koova, oun anas panč vavar gone pherdo roup khetne pashel.

Markus 13:34

Kova hi yaake har pash i morsheste, kay djas ap o them. Yob moukas peskro kheer oun das peskre boudepangren lauter an o vast, hakeneste das lo leskri boudi. Oun penas ap koleste, kay pash o voudar beshdo hi: De garda ap miro kheer! Ma sob!

Markus 13:37

Kova, hoy me t'menge penaua, ko penau lauterenge: Denn yak oun sovenn gar!

Louka 12:37

Barhtele hi kol boudepangre, kay sovenn gar, te vell lengro ray pale. Me penau t'menge: O ray penell lenge, te beshenn le pen tele, te rhan le. Oun yob pandell peske i damdira trouyel, oun hi lenge koy.

Bičepangre 21:8

O vavar dives djam mer doureder, oun vam an o foro Cesarea. Kote djam an o kheer, kay o Filipo djivell, oun ačam pash leste. Kova his i morsh, kay penell i menshenge o lačo lab o Yezous Kristestar. Yob his yek kol eftendar, kay his vi-rodedo an o foro Yerusalem, te denn le i čorvele patslende rhapaske.

Remarja 15:19

Oun yob sikras peskri zoor, har kras o Debleskro Dourho baro koova, hoy kek vavar nay krella. Yaake penom o lačo lab o Yezous Kristestar an o tselo them troul o foro Yerusalem bis an o them Illirikum.

Efesarja 4:11

Yob hi kova, kay das i patslen pengri boudi. Koy hi kolla, kolen yob bičras, te penenn le i menshenge lestar. Vavar rakrenna, hoy yob lenge an o dji čivas, hoy kek vavar djinella. Vavar anenn kol menshen, kay gar patslo hi, pash o Yezous Kristeste. Pale vavar rikrenn i patslen khetne, oun sikrenn lende o Debleskro drom.

Efesarja 4:12

Lauter kolla krenn pengri boudi, te venn i tsele patsle zoreles an o patsepen, oun te hayvenn le o Debleskri boudi mishto te krell.

Kolossarja 1:25

Lengro boudepaskro vom me. O Devel das man koy boudi, te penap t'menge o tselo Debleskro lab.

Kolossarja 4:17

Penenn ap o Arkippo: Kre koy boudi, hoy o ray Yezous tout das! Mouk gar tele!

1. Tessalonikarja 5:6

Doleske, te sovas mer gar har i vavar, te rikras mare yaka pre, oun te das yak har djivah!

1. Timoteo 4:12

Ninna te hal tou terno, ma mouk tout ap i rig te čivell! Tou djivess yaake, te dikenn i vavar patsle, har hounte djivenn yon. Kova dikenn le ap tire laba, tiro djipen, tiro kamlepen i vavarenge, tiro patsepen ap o Yezouseste, oun tiro djoudjo dji.

1. Timoteo 4:15

Kre kova lauter tiro tselo djiyeha oun tiri tseli zoryah, te dikell hakeno, kay tiro patsepen bareder vella!

2. Timoteo 1:8

Ma ladj tout, te rakress tou maro rayestar, o Yezousestar! Ma ladj tout mange, ninna te hom me kanna leske an o stilepen! Na-a, rake maro rayestar, ninna te venn douka ap toute, yaake har me lau douka ap mande, te vell o lačo lab o Yezousestar penlo. O Devel dell tout i zoor.

2. Timoteo 2:10

Me lau kova lauter ap mande kol menshenge, kolen o Devel vin rodas, te lenn yon o djipen oun o raylepen, hoy gar pre-herella. Kova dell len o Yezous Kristo.

2. Timoteo 2:3

Yaake har i lačo kourepaskro douka ap peste lella, yaake le ninna douka o Yezous Kristeske ap toute!

2. Timoteo 4:17

O ray Yezous his ap miri rig, oun das man i zoor, te nay penap kote o tselo lačo lab lestar, yaake te shounan les ninna kolla, kay hi kek bibolde. Oun yob las man yaake dran lengre vasta vin, har te voms dran i leveskro mouy vin lino.

Hebrearja 13:17

Shounenn ap kolende, kay sikrenn t'men, har te djan ap o Debleskro drom! Krenn kova, hoy yon t'menge penenna! Lengri boudi hi, te denn le yak ap t'mende. Oun yon hounte penenn o Debleske, har yon kran pengri boudi. Djivenn yaake, te krenn le pengri boudi i barhtelo djiyeha! Te rovenn yon pral t'mende, palle vals kova t'menge gar mishto.

1. Petro 1:13

Doleske avenn gar khino an t'mare djia, oun denn garda, te ačenn ap o Debleskro drom! Dikenn ap ko baro lačepen, hoy o Devel dell t'men ap ko dives, kay vell o Yezous Kristo pale.

Debleskro tsiro 3:2

Stenn pre o sopastar! Mashkral t'mende hi gomme menshe, kay patsenn ap mande. Kolla hi gar boud. Oun lengro patsepen hi tikno. Krenn lengro patsepen pale zoreles! Glan miro Debleste hi kova gar mishto doha, hoy t'mer mange krenn.