2. Tessalonikarja 2:8 - O Debleskro Lab 2024 (Sinte-Manouche)

⁸ palle sikrell pes ko čilačo mensho, har yob čačepah hi. Koles marell maro ray Yezous ap ko dives, kay vell lo pale. Yob phourdell ap leste, oun kova merella.

O Debleskro Drom 2021 (Sinte)

⁸ palle sikrell pes ko tchilatcho mensho, har job tchatchepah hi. Koles marell maro rai Jesus ap ko diwes, kai well lo pale. Job phurdell ap leste, un kowa merella.

2. Tessalonikarja 2:8 ပူးပေါင်းရင်းမြစ်များ

2. Samuel 23:7

Te kameh len te taprell, hounte vell tout saster oun i lengsto kasht an o vast, oun hounte rhačess len pre, kote kay yon hi.

Hiob 4:9

O Devel phourdell ap lende, oun yon merenn. Leskri rholyakro dourho marell len.

Debleskri gili 18:15

Oun yob das yag karye dran o bolepen kate te kote, oun tradas i volke krik.

Jesaja 11:4

Na-a, yob dell i čorvelende pengro čačepen, oun vell kolenge ap i rig, kay gar an-dikle hi, te lenn yon pengro čačepen. Penell lo i zorelo lab, palle lenn i marepangre pengri phagi. Les hi i zoor, te penell ap o čilačeste: “Tou hounte meress!”

Jesaja 30:28

Oun leskro dourho hi yaake zorelo har i pani, hoy zoryah nashell, oun hoy i mensheske bis pash i meen djala. Yob lell i natsyone oun vitsrell len trouyel, oun trissell len, bis te gar boud lendar pral ačenn. Oun yob čivell saster an lengre mouya, har te vans le graya, oun tradell len koleha kate te kote.

Daniel 11:36

Oun ko baro ray krell, hoy yob kamell. Yob hadell pes oun patsell, te hi lo bareder har hako devel. Ninna pral o pralstouno Debleste rakrell lo savo koova, hoy nay rakrell kek vin. Oun kova krell lo yek tsireske, oun djal leske mishto, bis te vell o Debleskri rholi pral leste. Palle krell o Devel, hoy las lo pes glan.

Daniel 7:25

Oun yob praasell o pralstouno Debles oun čivell pharo koova ap o Debleskre menshende. Oun krell lauter, te venn o Debleskre divessa oun laba vavarčandes rikedo. Oun o Debleskre menshe venn an leskro vast dino yek tsireske oun douy tsirenge oun i paash tsireske.

Daniel 7:26

Pal kova vell o bolepaskro tsillo, oun o čačepen vell vi-rakedo. Oun ko rayestar vell peskri zoor krik lino, te hi lo bouder kek ray. Oun lestar ačell či bouder pral.

Daniel 8:25

Peskro gosvepah rhorhell lo boud menshen. Oun yob phourdell pes pre oun djal ap boudende oun marell kolen, kay patsenn, te krell lo lenge či. Oun ninna hadell lo pes pral o pralstouno rayeste. Oun palle vell yob phagedo kek mensheskro vasteha.

Hosea 6:5

Doleske bičrom t'menge mire rakepangre. Oun lengro rakepah dau me t'men khetne, oun marau t'men mire labentsa, hoy venn dran miro mouy. Miro čačepen vell glan har o kham.

Mateo 13:19

Ko djob, hoy peras ap o drom, sikrell t'mende yekes, kay shounas ko lab, te dell les o Devel pash peste gole. Oun yob hayvas ko lab gar. Oun o beng vas, oun las ko lab dran leskro dji vin.

Mateo 13:38

Oun ko kotar them, kolla hi i tsele menshe ap i phoub. Oun o lačo djob, kolla hi kol menshe, kay moukenn o Debles pengro ray te vell. Oun ko djoungelo zenlepen, kolla hi i čilače, pral kolende o beng o ray hi.

Mateo 16:27

Me hom o Mensheskro Čavo. Oun me vau pale ap i phoub an o raylepen, hoy das man miro dad an o bolepen. Oun mantsa venna mire bolepangre. Oun palle dikau ap hakeneste, hoy yob kras. Oun me dau lačo koova kolen, kay lačo koova kran. Oun me dau i phagi kolen, kay čilačo koova kran.

Mateo 16:28

Čačepah, me penau t'menge: Mashkral t'mende hi save menshe, kay merenn gar, bis te dikenn le o Menshengro Čaves, har yob o baro ray hi.

1. Korintarja 1:28

O Devel rodas kolen vin, kay an i menshengre yaka či molenna, oun kay gar mishto an-diklo hi, te sikrell lo, kova, hoy pash i menshende boud molella, hi pash leste či moldo.

2. Tessalonikarja 2:3

Kova lauter hi rhorhepen. Ma patsenn kekeske, kay kova penella! Ko dives vella gar yaake rah, har peran gar boud menshe o čačo dromestar tele. Ap ko tsiro vell ko čilačo mensho diklo, kay rikrell pes ap kek čačepen. Leske hi glan-diklo, te djal lo nashedo.

1. Timoteo 6:14

Rike o tselo djiyeha ap kol laba, hoy touke penlo van, te hatsell kek i doosh ap toute. Ač koy pashel yaake rah har maro ray, o Yezous Kristo, gomme gar pale vas.

2. Timoteo 1:10

Kanna vas o Yezous Kristo, te sikrell lo men o Debleskro lačepen. O Yezous Kristo las men dran o čilačepen vin, oun kras, te vell o merepen bouder kek zoor pral mende. Yob anas menge ko djipen, hoy ačella, har peskro lačo lab penella.

2. Timoteo 4:1

Kova, hoy kanna penau touke, penau glan o Debleste oun glan o Yezous Kristeste, kay krell o čačepen vin pral i djidende oun i moulende. Yob, kay vell pale, te vell lo baro ray pral i tsele menshende, kova shounell, hoy touke penau:

2. Timoteo 4:8

Kova, hoy kanna glan mande hi, hi ko shoukar koova, hoy kolla lenna, kay kran, hoy o Devel kamella. Oun kova dell man maro ray Yezous. Yob hi ko čačepaskro ray, kay djal pal o čačepen. Ko shoukar koova dell lo man ap ko dives, kay yob o čačepen vi-rakrell pral i tsele menshende. Ko shoukar koova dell yob gar mande kokres. Yob dell kova lauterende, kay dikenn o tselo djiyestar ap ko dives, kay vell lo pale.

Tito 2:13

Oun mer dikah ap ko barhtelo dives, kay vell o Yezous Kristo pale an o shoukar raylepen. Yob hi maro baro Devel, kay las men dran o čilačepen vin.

Hebrearja 10:27

Na-a, yob hounte trashell ko dives, kay vell o Debleskri rholi pral i phoub oun i zoreli yag pral kolende, kay kaman lestar či te djinell.

1. Johanni 2:13

Phoure morshale, t'menge činau kava lab, te bistrenn gar o Yezouses, kay hako tsiro koy hi. Terne morshale, t'menge činau kava lab: T'mer hans zorleder har o beng oun kran gar, hoy yob t'mendar kamas.

1. Johanni 3:12

Mer hounte vas gar har o Kayn. Kova his o bengestar oun maras peskro phrales. Hoske maras lo les? Leskro phraal kras, hoy lačo his. Oun o Kayn kras, hoy čilačo his. Doleske maras o Kayn peskro phrales.

1. Johanni 5:18

Mer djinah, o Debleskre čave ačenn gar ap i čilačo drom. O Debleskro čavo dell garda ap lende. Oun o beng nay krell len či.

Debleskro tsiro 1:16

Oun an leskro čačo vast his les efta bolepangre momlia. Oun dran leskro mouy vas i rharo, hoy ap douy rigya nay činella. Oun leskro mouy his har o kham.

Debleskro tsiro 13:5

Oun o firho rakras oun phourdas pes pre oun praasas o Debles. Star-deesh-te-douy (42) čonna nay kras o firho kova.

Debleskro tsiro 19:15

Oun dran leskro mouy vell i rharo vin, hoy lačes činella. Koleha kourell lo pes i menshentsa an i tsele themma, oun vell zorleder har yon. Yob anell len i sasterno vasteha. Yaake har yek i drake paash stakrella, te vell i mool vin, yaake stakrell lo kolen paash, kay gar ap leste shounenna, oun anell i rholi o zorelo Deblestar ap lende.

Debleskro tsiro 2:16

Krenn kanna ko čilačo koova bouder gar! Te moukenn t'mer kova gar, palle vau an i tikno tsiro, oun čingrau ap kolende, kay shounan gar ap mande. Oun miro rakepen činella har i rharo.

Debleskro tsiro 20:10

Oun o beng, kay anas len ap peskro drom, vell an i bari yag vitsedo, hoy zoreles rhačella oun khandella. Kote hi ninna o firho, oun ko rhorheno rakepaskro. Kote vell len hako tsiro bare douka.