2. Rajengro liil 4:1 - O Debleskro Lab 2024 (Sinte-Manouche)

¹ Kote his i djouvel, kolakro rom his i Debleskro rakepaskro. Koya das pal o Elisa gole oun penas: “Tiro boudepaskro, miro rom, meras. Oun tou djineh, kay lo ap o baro Debleskro drom djas. Oun kanna vell ko morsh, kay miro romes siyaan hi pash leste, oun kamell mire douy čaven te lell, te venn le leskre ginle boudepangre.”

O Debleskro Drom 2021 (Sinte)

¹ Kote his i djuwel, kolakro rom his i Debleskro rakepaskro. Koja das pal o Elisa gole un penas: “Tiro budepaskro, miro rom, meras. Un tu djineh, kai lo ap o baro Debleskro drom djas. Un kanna well ko mursh, kai miro romes sijaan hi pash leste, un kamell mire dui tchawen te lell, te wenn le leskre ginle budepangre.”

2. Rajengro liil 4:1 ပူးပေါင်းရင်းမြစ်များ

1. Mose 22:12

Penas o bolepaskro: “Tape kol čaves gar an! Oun kre les či! Kanna djinau me, kay shouneh o tselo djiyeha ap o Debleste oun kreh, hoy yob penell. Tou rikral tiro yek čaves mandar gar pale.”

1. Rajengro liil 18:3

Oun o Ahab moukas o Obadya te kharell, – kova his o pralstouno pral leskro kheer. O Obadya shounas peskro tselo djiyeha ap o baro Debleste.

1. Rajengro liil 20:35

Koy his Debleskre rakepangre, kay ap yek platsa khetne djivan. Oun yek lendar penas ap i vavareste: “O baro Devel penas mange, te dess tou man.” Ko vavar kamas kova gar te krell.

2. Rajengro liil 2:15

Oun har dikan kova kol Debleskre rakepangre, kay ap i vavar rig pash Yericho his, penan yon: “Koy zoor o Eliyestar hi ap o Elisa čiddo.” Oun yon djan pash leste oun peran glan leste tele ap i phoub.

2. Rajengro liil 2:3

djan o Debleskre rakepangre, kay kote djivan, vin pash o Elisa, oun penan ap leste: “Djineh tou ninna, kay o baro Devel kava dives tiro rayes toutar krik lella?” Koy penas yob: “Kova djinau me. Ačenn!”

2. Rajengro liil 2:5

van kol Debleskre rakepangre, kay kote djivan, vin pash o Elisa, oun penan ap leste: “Djineh tou ninna, kay o baro Devel kava dives tiro rayes toutar krik lella?” Koy penas yob: “Kova djinau me. Ačenn!”

2. Rajengro liil 2:7

Har his le pash o Yordan tardo, van paash-sheel Debleskre rakepangre koy oun ačenn i kotar dour krik tardo.

2. Rajengro liil 4:38

Har o Elisa pale an Gilgal vas, his i menshen či te rhal an ko them. Oun har kol Debleskre rakepangre glan leste beshdo his, penas yob ap peskro boudepaskro: “Le i bari piri oun kere lenge i soummi rhapaske.”

2. Rajengro liil 6:9

Koy bičras ko Debleskro morsh, o Elisa, yekes pash o baro rayeste pral Israel oun moukas leske te penell: “De garda oun ma dja kava drom! Kol Syrarya lourenn koy.”

Nehemia 10:31

Mer kamah mare čen gar i morshentsa i vavar menshendar an kava them te romedinerell, oun ninna lengre čen gar mare čavenge te lell.

Nehemia 7:2

Oun me čivom douy pralstunen pral o foro Yerusalem, miro phrales, o Hanani, oun o Hananya, kay o pralstouno lourdo pral o lourdengro kheer his. Yob his i morsh o labestar, oun djivas yaake o Debleha har gar boud vavar.

Debleskri gili 103:11

Yaake dour har o bolepen pral i phoub hi, yaake baro hi leskro lačepen kolenge, kay djivenn leha.

Debleskri gili 103:17

O lačepen o baro Deblestar hi gar yaake. Kova ačella hako tsireske. An kek tsiro lell lo les krik kolendar, kay djivenn leha. Ninna lengre čavenge oun kolengre čavenge rikrell yob peskro lab,

Debleskri gili 115:13

Yob čivell peskri barht ap hakeneste, kay djivell leha, ava, ap i tiknen oun ap i baren.

Debleskri gili 147:11

O baro Debleske hi kolla shoukar, kay leha djivenna oun ap leste dikenna, te vell lo lenge lačes.

Gosewe laba 22:7

O bravelo hi o ray pral o čorveleste. Oun kova, kay patsell peske love, hounte boudrell koleske, pash koleste yob siyaan hi.

Sikepaskro 12:13

Kova lauter, hoy kate penlo vas, hi khetne lino kova: Shoun ap o Debleste oun rike leskre laba! Kova molell i tsele menshenge.

Sikepaskro 8:12

Ninna te djivell kova i lengsto djipen, kay krell sheel kope foullo koova, djinau me, te djal kolenge kokres mishto, kay djivenn o Debleha oun moukenn les lengro ray te vell.

Jesaja 50:1

Kava penell o baro Devel: Kay hi ko liil, hoy me hounte činoms, kay dren tardo hi, te moukom me t'mari dat? Koon hi kova, pash koleste man siyaan vals oun t'men leske bikroms. Dran t'mari doosh han bikedo. T'mer peran miro dromestar tele. Doleske hi t'mari day mouklo.

Jeremia 34:14

te moukell hakeno peskro ginlo boudepaskres te djal, kova, kay i vavar Israelitari hi, oun kay bikras pes leske, oun boudras leske shob bersha. An o eftato bersh hounte moukas lo les te djal. T'mare phoure shounan gar ap mande, oun rikran pen gar ap mire laba.

3. Mose 25:48

palle hounte vell yaake, te nay ginell les yek pale. Leskro phraal,

Maleachi 3:16

Koy rakran kolla mank pende, kay djivenn o baro Debleha. Oun o baro Devel das yak ap lengre laba oun shounas, hoy le penenn, oun moukas len an i liil dren te činell, te venn le gar bistedo. An kava liil hi kolla dren tardo, kay djivan leha, oun hadan leskro lab.

Mateo 18:25

Kova nashte playsras kova gar pale. Koy penas o ray: Bikrenn les peskri romyah, oun peskre čaventsa, oun lauterentsa, hoy les hi! Oun denn man kol love, hoy t'mer lenge dren lenna!

Mateo 18:30

Ko vavar morsh kamas či te shounell, oun vitsras les an o stilepen, te ačell yob kote yaake rah, har yob gar koy siyaan pale playsras.

Mateo 18:35

Oun o Yezous penas doureder: Te bistrenn t'mer gar o tselo djiyestar o čilačo koova, hoy i vavar phraal ap t'mende kras, yaake krell miro dad an o bolepen emligo t'mentsa.

Bičepangre 13:26

Mire phrala, t'mer, kay han o Abrahameskre menshe, oun t'mer vavar, kay mangenn o Debles an, t'menge penau: O Devel bičras t'menge peskro lačo lab, hoy dell t'men o djipen, hoy gar pre-herella.

Jakobo 2:13

Ma bistrenn! Vell yek dives, kay rakrell o Devel o čačepen vin pral t'mende. Te hi yekes kek dji i vavareske, koleske hi o Debles vitar kek dji. Kones hi i dji i vavarenge, koles hounte vell kek daar ap ko dives, kay rakrell o Devel o čačepen pral i menshende vin.

Debleskro tsiro 15:4

Toutar darella hakeno, tiro labestar penenn le: Har baro oun shoukar hi lo! Maro ray, o baro Devel hal tou. Kek vavar hi yaake har tou. I raya venna dran hake themma; glan toute vitsrenn le pen tele, te sharenn le tout. Lauter dikan, har pal o čačepen tou djal, har tou i menshende lengri phagi dal.

Debleskro tsiro 19:5

Oun i rakepen vas kotar, kay o Debleskro beshepaskro hi, oun kova penas: “Sharenn maro Debles, t'mer lauter, hoy leske boudrenna, oun lestar darenna, tikne har bare!”

Ruth 1:3

Kote meras o Elimelek. Oun leskri romni Naomi ačas kokres pale peskre douy čaventsa.

1. Samuel 22:2

Oun ninna van pash leste khetne boud vavar morsha. Mank lende his save, kay his palla-lino. Vavaren his siyaan, hoy nay playsran le gar. Vavaren his i pharo dji. Oun yob vas lengro pralstouno. Kolla lauter his yaake 400 (star-sheel) morsha.