2. Rajengro liil 19:23 - O Debleskro Lab 2024 (Sinte-Manouche)

²³ Tire bičepangren bičral, te praasenn le man, oun penal: “Pral ap i berge mire vourdyentsa djom, oun dour dren an o Libanon vom. I bare oun shoukar rouka trouyel dom, oun an o divyo veesh lengro khatepen hatsom.

O Debleskro Drom 2021 (Sinte)

²³ Tire bitchepangren bitchral, te praassenn le man, un penal: “Pral ap i berge mire wurdjentsa djom, un dur dren an o Libanon wom. I bare un shukar ruka trujel dom, un an o diwjo weesh lengro khatepen hatsom.

2. Rajengro liil 19:23 ပူးပေါင်းရင်းမြစ်များ

2. Rajengro liil 18:17

Oun o baro ray pral o them Assour bičras peskre triin pralstoune morshen pash o Hiskiya: o Tartan, o Rabsaris oun o Rabshake. Kolla djan boud lourdentsa dran o foro Lakish pre an o foro Yerusalem. Oun har le koy van, ačan le pral tardo pash o panyeskro drom, kay nashell o pani an o foro Yerusalem. Kova hi pash koy platsa, kay i djouvya pengre koola thovenna.

2. Rajengro liil 18:23

Oun kanna krau touha vin an o lab miro rayestar, ko baro rayestar pral o them Assour: Me kamau touke 2.000 (douy zerya) graya te dell, te nay hatseh 2.000 morsha, kay klissenn len?

2. Rajengro liil 19:4

O baro ray pral o them Assour bičras peskro pralstounes, te praasell lo o djido Debles. Har kamoms, te shounell o baro Devel, tiro Devel, kol tsele laba, hoy ko morsh penas, oun dell les i phagi! Mange o Deblestar kol menshenge, kay pral ačan leskre menshendar, te rikrell lo peskro vast pral lende!”

2. Familjakro liil 26:10

Yob kras ninna turme an o moulo tato them oun hadas boud panyenge brounne vin; les his boud firhe an o pralstouno them oun an o telstouno them, ninna djobengre harhe oun molyengre harhe ap i berge oun ap i berga Karmel. Leske his i harhengri boudi ap o dji čiddo.

2. Familjakro liil 32:17

Ninna činas o Sanherib i liil, kay lo o baro Debles, ko Devel pral Israel, praasas, oun penas: Yaake har i debla an i vavar themma pengre menshen gar dran miro vast nay lan, yaake nay lell o Devel foun o Hiskiya peskre menshen vitar gar dran miro vast.

Debleskri gili 20:7

Kanna djinau, kay vell o baro Devel ap i rig kolestar, koles yob vin rodas, te vell lo baro ray. Dran o bolepen, kay yob khere hi, shounell lo ap leste, oun peskri bari zoryah vell lo ap leskri rig.

Debleskri gili 20:8

Vavar menshe patsenna ap i zoor pengre grayendar oun vourdya. Mer dah gole ap maro baro Debleste.

Jesaja 10:13

Kova penas: I zoryah mire vastendar krom kova lauter, oun miro gosvepah. Čačepah, man hi boud gosvepen. Me lom vavar themma dren, oun random lengro bravlepen, oun har i divyo gouroum stakrom kolen khetne, kay koy djivan.

Jesaja 10:14

Yaake har yek peskro vast ap i čirklengro kheer čivell oun i yare vin lell, yaake tapras miro vast o bravlepen an kol themma oun las les peha. Oun yaake har lell yek i čirklengre yare peha, hoy mouklo van, yaake lom me i tsele themma mange. Kote his kek, kay peskre moussyentsa pal mande dals, oun kek, kay peskro mouy pre krals, te vell i gole vin.

Jesaja 10:18

Oun i tsele shoukar vesha oun o tselo zenelo them merell tele, yaake har i nasselo, kay lokes merell oun bouder gar koy hi.

Daniel 8:11

Ava, ko shing kras pes bareder har ko ray pral i bolepangre lourdende, oun kras, te anenn o Debleskre rashaya leske bouder gar kol firhen, hoy leske hako dives anlo hounte vans. Oun ninna kras lo o Debleskro kheer pale-čiddo.