2. Rajengro liil 17:15 - O Debleskro Lab 2024 (Sinte-Manouche)

¹⁵ Oun yon rikran gar leskre laba. Oun ko lab, hoy das lo lengre phourende, kay lo penas, te hi lo lengro Devel oun yon leskre menshe, ko lab his lenge či moldo. Yon moukan pen gar lestar trad te dell, oun nashan kol deblen palla, hoy či molenna. Oun yaake djivan le čičeske. Yon kran savo koova har kol menshe an i themma troul lende, kolendar o baro Devel lenge penas, te krenn le gar har yon krenna.

O Debleskro Drom 2021 (Sinte)

¹⁵ Un jon rikran gar leskre laba. Un ko lab, hoi das lo lengre phurende, kai lo penas, te hi lo lengro Dewel un jon leskre menshe, ko lab his lenge tchi moldo. Jon mukan pen gar lestar trad te dell, un nashan kol deblen palla, hoi tchi molenna. Un jaake djiwan le tchitcheske. Jon kran sawo koowa har kol menshe an i themma trul lende, kolendar o baro Dewel lenge penas, te krenn le gar har jon krenna.

2. Rajengro liil 17:15 ပူးပေါင်းရင်းမြစ်များ

1. Rajengro liil 11:11

oun penas ap leste: “Tou rikral tout gar ap kova, hoy touha vin krom oun rikral tout gar ap mire laba, hoy touke penom. Doleske lau tiro them toutar krik, te ačess bouder gar ray. Oun dau kava them yekeste kol pralstunendar an o them.

1. Rajengro liil 16:13

Kova his koy phagi koleske, hoy kran o Baasha oun leskro čavo, o Ela, har anan yon i Israelitaryen o baro Debleskro dromestar tele, te mangan le i moule deblen an. Oun yaake rhoyran le o baro Debles, kay o Israeleskro Devel hi.

2. Rajengro liil 17:8

oun kran har pengre bare raya ninna kran, oun djivan pal i laba kol vavar menshendar, kolen o baro Devel glan lende vin tradas.

2. Familjakro liil 24:19

Oun o baro Devel bičras peskre rakepangren pash lende, te venn le pale pale pash o baro Debleste. Ninna te dan kolla len trad, shounan i menshe gar ap lende.

2. Familjakro liil 33:2

Oun yob kras, hoy his čilačo glan o baro Debleskre yaka: ko emligo djoungelo koova, har kol vavar menshe kran, kolen o baro Devel glan o Israel vin tradas dran o them.

2. Familjakro liil 33:9

Oun o Manasse anas i menshen an o them Youda oun an o foro Yerusalem ap i čilačo drom; oun yon djivan čilačeder har kol vavar menshe, kolen o baro Devel glan o Israel krik tradas.

Nehemia 9:26

Oun pale shounan le gar bouder ap toute, oun hadan pen pral toute, oun kaman bouder gar tiro drom te djal. Oun yon dan tire rakepangren moulo, kolla kay len trad dan, te anenn le len pale pale pash toute.

Debleskri gili 115:8

Kol menshe, kay save deblen kran, oun ap lende patsenn, mou venn le yaake har yon!

Debleskri gili 78:10

Yon rikran pen gar ap o Debleskre laba, hoy yob lentsa vin kras, oun kaman gar ap leskro drom te djal.

2. Mose 16:28

Kote rakras o baro Devel ap o Moseste: “Har rah krenn t'mer kova gar, hoy me t'menge penau, oun djivenn gar yaake, har me t'menge penom?

Jeremia 10:15

Yon molenn či, oun hi sapaske. An ko tsiro, kay rakrell o baro Devel o čačepen vin, hounte djan yon tele.

Jeremia 10:8

Lauter hi yon dinelo oun narvelo, kolla, kay mangenn o kasht an. Kol debla nay sikrenn lende či.

Jeremia 2:5

Kova penell o baro Devel: Havo djoungelo koova hatsan t'mare phoure ap mande, kay djan yon mandar krik, oun mangan figuren an, kay kek devel hi. Oun yaake djan le tele.

Jeremia 31:32

Kova hi gar har kova, hoy lengre phourentsa vin krom, har lom len pash o vast oun lom len dran o them Egiptia. Kol laba, hoy lende dom, te rikrenn le pen ap lende, phagan le, ninna te hom me lenge i lačo ray.

Jeremia 44:22

oun yob nay dikas bouder gar, har djan ap t'maro čilačo drom oun kran savo djoungelo koova! Doleske vas t'maro them i moulo them. I menshe, kay shounenn kolestar, denn i vasta pral o shero khetne. Oun te kamenn le yekes te praasell, penenn le: Mou djal touke har o themeske Youda! Kek mensho djivell bouder koy. Yaake hi kova kava dives!

Jeremia 44:23

T'mer rhačran soungepaskro koova i bolepaskri rayetsake, oun kran, hoy djoungeles hi glan o baro Debleskre yaka, oun shounan gar ap leste, oun djivan gar pal leskre laba oun pal leskro čačepen, oun kran gar, hoy yob t'mendar kamas. Doleske vas savi bibarht pral t'mende, yaake har kava dives hi.

Jeremia 44:4

Oun me bičrom lenge pale te pale mire rakepangre, kay mange boudran, oun moukom lenge te penell: “Ma krenn sau djoungelo koova, kay man zoryah rhoyrenna!”

Jeremia 44:8

T'mer rhoyrenn man koleha, hoy krenn kote an o them Egiptia, kay djan, te djivenn koy. T'mer rhačrenn soungepaskro koova vavar deblenge. Kamenn t'mer halauter te merell? Kamenn, te praasenn t'men i menshe dran i tsele vavar themma oun san pral t'mende?

Jeremia 7:26

T'mer shounan gar ap mande, oun dan kek garda ap mire laba. T'mer djan pal t'maro shero, oun kran boudeder čilačepen har t'mare phoure.

Jeremia 8:9

Kol goseve vitsran o Debleskro lab pal pende. Havo gosvepen ačell lenge? O dives vell, kay vell ladj oun daar pral lende. Yon venn tapedo oun pandles krik anlo.

Ezekiel 12:2

Tou, mensho, djiveh mank save menshende, kay moukenn pen či te penell. Kolen hi yaka, te dikenn le, oun kamenn či te dikell. Oun len hi kanda, te shounenn le, oun kamenn gar te shounell. Yon moukenn pen či te penell.

Ezekiel 2:3

Tou, mensho, me bičrau tout pash i Israelitarya. Kolla hadan pen oun peran mandar tele. Ninna lengre phoure hadan pen pale te pale pral mande. Oun kolla, kay kava dives djivenn, hi gar vavarčandes.

3. Mose 26:15

oun krenn gar, hoy t'mendar kamau, oun djivenn gar pal miro čačepen, oun rikrenn yaake gar dren, hoy t'mentsa vin krom,

Jona 2:8

Har kamas miro djipen an mande tele te merell, val tou baro Devel mange an o shero, pash toute vas miro mangepen, an tiro kheer, kay tou khere hal.

Johanni 2:8

Oun yob penas pale ap lende: “Lenn dran kol khore oun anenn kova o rayeske pral o pipen!” Oun yon anan les pash leste.

1. Korintarja 8:4

Nay rhah mer kanna ko mass, hoy anan le glan i figura, hoy mangenn le an, har te vals li i devel? Mer djinah halauter, kay hi i figura kek čačo devel. Dell yek Devel oun kek vavar.

5. Mose 18:10

Kek mank t'mende hounte rhačrell peskro morsh čaves oder peskri čat an i yag o Debleske. Kek mank t'mende hounte vell i dourkepaskro, kek i dravepaskro, kek, kay krell vavar bengeskri koova,

5. Mose 29:24

Oun lenge vell penlo: Doleske, kay phagan le koy sovel, hoy o baro Devel, ko Devel lengre phourendar, lentsa dren djas, oun rikran pen bouder gar ap kova, hoy yob lentsa vin kras, har yob len dran o them Egiptia vin anas.

5. Mose 32:21

Yon doukan oun rhoyran man, har mangan le kolen an, kay kek debla hi. Yaake kamau me les ninna lentsa te krell, oun lau mange vavar menshen, te zilverenn le oun rhoyrenn pen pral menshende, kay prindjran man gar.

5. Mose 32:31

Kolengre debla hi gar har maro Devel. Kova djinenn oun penenn ninna kolla, kay kouran pen mentsa.

1. Samuel 12:21

Ma nashenn kol rhorhene deblenge palla, hoy či molenna, oun hoy t'men gar vin nay lenna dran o merepen. Yon hi či.