2. Rajengro liil 14:14 - O Debleskro Lab 2024 (Sinte-Manouche)

¹⁴ Oun yob las o tselo sonakay oun roup oun ko tselo kouč koova, hoy hatslo van an o baro Debleskro kheer oun o tselo bravlepen an o baro rayeskro kheer, koy pashel kol pandle menshen, oun djas pale an Samaria.

O Debleskro Drom 2021 (Sinte)

¹⁴ Un job las o tselo sonakai un rup un ko tselo kutch koowa, hoi hatslo wan an o baro Debleskro kheer un o tselo brawlepen an o baro rajeskro kheer, koi pashel kol pandle menshen, un djas pale an Samaria.

2. Rajengro liil 14:14 ပူးပေါင်းရင်းမြစ်များ

1. Rajengro liil 14:26

Oun yob las ko tselo bravlepen dran o baro Debleskro kheer oun dran o baro rayeskro kheer, halauter las lo peha, ninna las lo kol sonakangre shilte, kolla, kay moukas o Salomo te krell.

1. Rajengro liil 15:18

Kote las o Asa ko tselo roup oun sonakay, hoy pral ačas o bravlepastar an o baro Debleskro kheer oun an o baro rayeskro kheer, oun bičras bičepangre koleha an o foro Damaskus, pash o Ben-Hadad, koleskro dad o Tabrimmon his, koleskro dad o Hesyon his. O Ben-Hadad his o baro ray pral o them Syria. Oun o Asa moukas leske te penell:

1. Rajengro liil 7:51

Har o tselo Debleskro kheer kerdo vas oun kova, hoy dren his, hoy moukas o ray Salomo te krell, moukas lo ko koova te anell, hoy peskro dad, o David, o baro Debleske das. Ko roup oun sonakay oun ko tselo koova čivas lo an o baro Debleskro kheer, an koy isema, kay o bravlepen his.

2. Rajengro liil 12:18

An ko tsiro djas o baro ray pral o them Syria, – leskro lab his Hasael – pash o foro Gat oun las les peske dren. Oun har lo doureder djas, te kourell lo pes o foreha Yerusalem,

2. Rajengro liil 18:23

Oun kanna krau touha vin an o lab miro rayestar, ko baro rayestar pral o them Assour: Me kamau touke 2.000 (douy zerya) graya te dell, te nay hatseh 2.000 morsha, kay klissenn len?

2. Rajengro liil 24:13

Oun yob las peske o tselo bravlepen, hoy his an o baro Debleskro kheer oun an o rayeskro kheer. Oun kol tsele sonakangre koola, hoy moukas o Israeleskro ray, o Salomo, te krell o baro Debleskro khereske, kova moukas o Neboukadnezar khetne te dell. Lauter vas yaake, har o baro Devel les penas.

2. Rajengro liil 25:15

Ninna kol yagakre čare oun kol bare čare, kay o rat dren nashell, halauter, hoy dran sonakay oun roup kerdo vas, las ko pralstouno, o Nebousaradan, krik.