2. Korintarja 7:11 - O Debleskro Lab 2024 (Sinte-Manouche)

¹¹ T'menge his ropaske pral ko koova, hoy mank t'mende djas, oun o Devel dikas lačes ap t'mende. Kanna dikenn, havo lačo koova dran kova vas: T'mer kamenn lauter mishto te krell, oun kamenn te sikrell, te hi t'men kek doosh. T'mer van rhoyedo pral koleste, kay ko koova kras. Oun t'men his daar miri rholyatar. O tselo djiyestar kaman t'mer kova te krell, hoy mishto hi an mire yaka. Doleske dan t'mer koles i phagi, kay doosh ap leste his. Yaake sikran, kay his t'men kek doosh pral ko koova.

O Debleskro Drom 2021 (Sinte)

¹¹ Tumenge his ropaske pral ko koowa, hoi mank tumende djas, un o Dewel dikas latches ap tumende. Kanna dikenn, hawo latcho koowa dran kowa was: Tumer kamenn lauter mishto te krell, un kamenn te sikrell, te hi tumen kek doosh. Tumer wan chojedo pral koleste, kai ko koowa kras. Un tumen his daar miri choljatar. O tselo djijestar kaman tumer kowa te krell, hoi mishto hi an mire jaka. Doleske dan tumer koles i phagi, kai doosh ap leste his. Jaake sikran, kai his tumen kek doosh pral ko koowa.

2. Korintarja 7:11 ပူးပေါင်းရင်းမြစ်များ

Nehemia 13:25

Oun me čingrom kol morshentsa, praasom len, oun dom ninna morshen lendar, oun tserdom lengre balla vin. Oun krom, te denn le pen sovel pash o Debleste, te denn le kek pengre čendar kol vavarengre čavende, oun lenn kek kolengre čendar penge oun pengre čavenge.

Hiob 42:6

Doleske lau pale, hoy rakrom oun hom beshdo an i čik oun an i yagakri čik, te sikrap, kay khaytell man kova, hoy rakrom.

Debleskri gili 119:139

I rholi tapras man oun kamas man pre te rhačrell, har dikom, kay bistran kolla tire laba, kay mange o djipen phares krenna.

Debleskri gili 130:6

Miro dji dikell ap o Debleste, miro rayeste, te vell lo ap miri rig. Oun o tsiro vell mange rah, boudeder har kolenge, kay rati yak denn ap o foro oun kamenn, te vell sik o dives. Ava, boudeder har kolla!

Debleskri gili 145:19

Kolenge, kay o djiyestar ap leste shounenna, krell lo, hoy yon mangenna, oun shounell, har denn le gole, oun vell ap lengri rig.

Debleskri gili 2:11

Boudrenn o baro Debleske oun darenn lestar, perenn glan leste tele oun čoumrenn leskre pire!

Debleskri gili 35:13

Har yek lendar nasselo his, rivom ropaskre ripya ap mande, rhom či oun bokom leske, oun pale te pale mangom o Debles leske,

Debleskri gili 38:9

Kek zoor hi bouder an mande, oun me hom phagedo. Miro dji hi yaake dareno, kay dau gole i doukatar.

Debleskri gili 42:1

I gili yekestar, kay hi dran i familya Korah. Kay gili hi o rayeske pral i gipangre.

Debleskri gili 69:9

Vom har i gadjo mire phralenge. I čave miri datar prindjrenn man bouder gar.

Gosewe laba 14:16

O gosevo darella oun rikrell pes pale o čilačepastar. O dinelo vell sik rhoyedo oun patsell, te nay djal leske kek čilačepen.

Gosewe laba 28:14

Barhtelo hi kova, kay hako tsireske o Debleha djivell! Kova, kay moukell peskro dji har i bar te vell, perell an i bibarht.

Kamlepaskri gili 8:6

Čin miro lab ap tiro dji! Mouk man har i goustri ap tiro vast te vell! Te kamenn pen douy, hi lengro kamlepen zoreles har o merepen, oun rikrell len pandles har o moulengro them. Len hi i dji yek o vavareske, hoy rhačell zoreles har i yag o baro Deblestar.

Jesaja 26:8

Baro Devel, mer dikah ap toute, te peness tou o čačepen vin. Lauter an mende rodell tout, oun kamell, te vell tiro lab sharedo.

Jesaja 66:2

Me, o baro Devel, krom miro vasteha kova lauter, hoy koy hi. Oun me dikau kamles ap koleste, kay hi tele rikedo oun phagedo an peskro dji, oun kay darell glan miro lab.

Daniel 6:14

Koy penan le o baro rayeske: “O Daniel, yek kolendar, kay pandles dran o them Youda anlo van, hadell tout gar oun rikrell gar ko lab, hoy moukal tou vin gole te dell. Triin kope ap o dives, mangell yob peskro Debles an.”

Markus 3:5

Kova doukas les, kay lengro dji har i bar his. Oun yob dikas rhoyemen ap lende oun penas ap ko morsheste: “Sike tiro vast!” Oun yob sikras peskro vast. Oun ko vast vas sasto.

Johanni 2:17

Koy vas o Yezouseskre malenge an o shero, hoy an o Debleskro lab činlo hi: Miro kamlepen tiro khereske rhal man pre har i yag.

Bičepangre 17:16

Yaake rah kamas o Paulo an o foro Athen te ačell. Kote dikas lo boud barrengre morshen, djouvyen oun firhen, hoy kran i menshe pengre vastentsa, oun hoy yon an-mangenna. Oun kova doukas les an peskro dji.

Remarja 11:20

Kova hi čačo. I bibolde patsan gar o Debles. Yaake hi le har kol kashta, hoy van tele činlo. T'mer han har vavar kashta, hoy van dren čiddo ap ko roukeste kokres dran t'maro patsepen. Doleske ma krenn t'men bares! Denn yak!

Remarja 14:18

Koon yaake djivella, kova sharell o Yezous Kristes. Ap leste dikell o Devel lačes. Oun pash i menshende hi lo an-diklo.

Remarja 3:5

Kanna poučau t'mendar: Hi i menshen gar čačo, te penenn le: “Hi maro čilačepen baro, vell o Debleskro lačepen bareder. Doleske hi o Debles gar čačo, te dell lo men i phagi.”

1. Korintarja 12:25

Yob kamas gar, te čingrenn pen i kotya. Yob kamas, te vell ko yek o vavareske koy.

1. Korintarja 5:2

T'mer han pre-phourdo. T'mer hounte rovans pral ko koova, oun hounte čivans koles pale, kay kras ko koova.

2. Korintarja 13:7

Mer mangah o Deblestar, te krenn t'mer kek čilačo koova. Kova mangah lestar gar, te sikras, har mishto mari boudi kram. Na-a, mer kamah, te krenn t'mer o lačepen, ninna te vell mendar penlo, kay mari boudi či moldo hi.

2. Korintarja 2:6

T'mer dan les i phagi. Oun kova hi doha.

2. Korintarja 6:4

Mer kamah, te dikenn le hako tsiro ap mende, kay ham o Debleskre boudepangre. Doleske dah gar pre, ninna te vell boud pharo koova ap mende. Ninna te hi men gar doha djipaske, te vell i daar ap mende, rikrah vin.

2. Korintarja 7:1

Mire phrala, kol lače labentsa penas o Devel, hoy kamell lo menge te krell. Doleske moukas mer kol tselo djoungelo koova, oun kras mare djia djoudjo, te djivas lačes oun čačes glan o Debleste, yaake har yob mendar kamella.

2. Korintarja 7:7

Gar kokres, kay yob vas, kras men zorelo. Na-a, mer lam boudeder zoor, har shounam, have lače laba t'mer leske penan. Yob penas menge, te kamenn t'mer man o tselo djiyestar pale te dikell. Yob penas ninna, har t'mer rovan oun lauter krenn, te venn mange ap i rig. Har shounom kova lauter, vom gomme barhtleder.

2. Korintarja 7:9

Kanna hom barhtelo, gar pral kova, kay his t'menge ropaske. Na-a, hom barhtelo, te anas t'men koy douk pral o čilačo koova pale ap o čačo drom. Har his t'menge ropaske pral t'mari doosh, dikas o Devel lačes ap t'mende. Doleske his ko liil, hoy činom, t'menge mishto.

2. Korintarja 9:2

Me djinau, t'mer kamenn o tselo djiyestar kol patslenge an o foro Yerusalem love khetne te čivell. Dran kova sharom t'men pash kolende an o them Macedonia oun penom: “Glan yek bersh lan kol phrala an o them Akaya love khetne.” Har yon kova shounan, kaman boud lendar yaake te krell, har t'mer kran.

Efesarja 4:26

Te venn t'mer an i rholi, palle denn garda, te krenn kek čilačo koova! Moukenn o kham gar tele te djal pral t'mari rholi!

Efesarja 5:11

Ma djan ap o čilačo drom kolentsa, kay krenna, hoy či moldo oun čilačo hi! Sike lende, har čilačo kova hi!

Filiparja 2:12

Mire kamle phrala oun phenya, t'mer shounan hako tsiro ap kova, hoy me t'menge penom, har pash t'mende homs, ninna kanna, kay gar pash t'mende hom. Me penau t'menge: Krenn lauter, te ačenn ap o Debleskro drom, bis te han pash leste! Shounenn ap o Debleste, oun trashenn lestar!

1. Tessalonikarja 4:6

Kek hounte rhorhell peskro phrales. Koon kova krella, koles dell o Devel i phagi. Yaake penam t'menge, oun dam t'men trad.

1. Timoteo 5:20

Kolla, kay kran čilačo koova, kolen dess trad glan lauterende, te vell kol vavaren daar.

2. Timoteo 2:15

Kre lauter, te vess i lačo boudepaskro o Debleske, oun hounte ladjess tout gar koleske, hoy tou kreh! Pen o Debleskro lab yaake, har čačo hi!

Tito 3:8

Kava lab hi čačo. Doleske rake kova i patslenge an o dji, te rodenn le koy pal, har nay krenn le lačo koova. Kova hi mishto oun boud moldo hakeneske.

Hebrearja 4:1

Dran kova denn mishto garda, te dell kek t'mendar peskro patsepen pre! An o phouro tsiro penas o Devel peskre menshenge, te dell lo len i them, kay yon hako tsiro khere hi. Kava lab, hoy o Devel lenge penas, ačell menge ninna. An o phouro tsiro shounan le les, oun patsan les gar. Yaake van le gar an o Debleskro them.

Jakobo 3:17

Ko gosvepen, hoy o Deblestar vella, hi vavarčandes. I mensho, kay hi les kava gosvepen, kova djivell i djoudjo djipen. Yob kamell te djivell lo lačes i vavarentsa khetne. Yob hi kamlo oun lačo. Les hi i dji i vavarenge, oun krell boud lačo koova. Yob moukell pes gar ap yekeskri rig te tserdell. Les hi gar douy čipya.

1. Petro 1:17

O Devel hi o čačepaskro ray, kay rakrell o čačepen vin pral hakeneste pal kova, hoy yob kras. Oun o Devel dikell gar koy pre, koon ko mensho hi. Ap leste penenn t'mer: “Tata!” Doleske djivenn yaake, har yob kova kamella, yaake rah har t'mer kate ap i phoub djivenna.

1. Petro 2:2

Har i ternepen pal o thoud gole della, yaake hounte vell t'men bok pal o Debleskro lab. Palle venn t'mer zorelo an o patsepen oun djan mishto ap ko drom kay anell t'men pash o Debleste.

Judas 1:23

Vavar nashran pen. Kolen anenn ap o čačo drom! Kova hi yaake har te tserdans len dran i yag vin. Vavar djivenn i djoungelo djipen. Rakrenn ninna kolenge lačes an o dji! Oun denn garda, te krenn gar kova, hoy yon krenna. Lengro djipen hi har i čiklo ripen ap lende.

Debleskro tsiro 3:19

Lauteren, kay kamau o djiyestar, kolende sikrau lengri doosh, oun penau lenge daventsa, te shounenn le ap mande. Moukenn kanna t'maro čilačo drom, oun avenn pale ap miro drom!