1. Timoteo 6:12 - O Debleskro Lab 2024 (Sinte-Manouche)

¹² Yaake har i kourepaskro kourell pes mishto oun dell gar pre, yaake dess tou gar tiro patsepen pre, te tapress ko djipen, hoy gar pre-herella. O Devel das tout gole, te tapress les. Oun tou penal glan boud menshende, kay patseh ap o Yezous Kristeste.

O Debleskro Drom 2021 (Sinte)

¹² Jaake har i kurepaskro kurell pes mishto un dell gar pre, jaake dess tu gar tiro patsepen pre, te tapress ko djipen, hoi gar pre-herella. O Dewel das tut gole, te tapress les. Un tu penal glan bud menshende, kai patseh ap o Jesus Kristeste.

1. Timoteo 6:12 ပူးပေါင်းရင်းမြစ်များ

Debleskri gili 63:8

Tou val ap miri rig, Tou rikreh tiro vast pral mande, har i čirklo rikrell peskre moussya pral peskre ternende. Kote givau touke i barhtyatar i gili.

Gosewe laba 3:18

Har i rouk, hoy o djipen dell, hi o gosvepen hakeneske, kay les an peste pre-lell. Barhtele hi lauter, kay o gosvepen an pengre djia rikrenn.

Kamlepaskri gili 3:4

Har me lendar i tikno kotar doureder djom, hatsom les, koles miro dji kamell. Me taprom leskro vast, oun moukom les bouder gar mandar te djal, lom les khere pash mande, an miri dakri isema, kay boldo vom.

Jesaja 44:5

Yek pal o vavar penell: O baro Devel hi miro ray. Boud kamenn tire menshe te vell. Yon činenn ap pengro vast: Me hom o baro Debleske, oun kharenn pen Debleskre menshe.

Zakarie 10:5

I menshe an o them Youda venn zoreles har bare kourepangre, kay stakrenn kolen tele an i čik ap o drom, kay kourenn pen lentsa. O baro Devel hi lentsa an o kourepen. Ninna i klissepangre hounte tserdenn pen pale glan lende.

2. Korintarja 6:7

Mer penah i menshenge o Debleskro čačepen oun rakrah dran leskri zoor. Kova, hoy krah oun rakrah, hi čačo. Yaake hi maro djipen oun maro rakepen har i rharo, koleha i kourepaskro kourell pes peskro rayeske.

2. Korintarja 9:13

Koleske, hoy t'mer lenge lačes kran, sharenn le o Debles. Yon dikenn, kay shounenn t'mer ap o lačo lab o Yezous Kristestar, oun kay hi yon, ninna i tsele vavar patsle, t'menge phrala oun phenya.

5. Mose 26:3

Oun tou djas pash o rashayeste, kay an kol divessa koy hi, oun peness ap leste: “Me moukau kava dives tiro baro Debles te djinell, te vom an ko them, kolestar o baro Devel pes sovel das glan mare phourende, te dell lo les mende.”

Filiparja 1:30

Kol douka, hoy ap t'mende venna, his man ninna, har homs pash t'mende. Oun ninna kanna ap kava tsiro shounenn t'mer mandar, kay hounte lap douka ap mande.

Kolossarja 3:15

O Yezous Kristo das t'men pash peste gole, te djivenn lauter leha khetne. Djivenn kanna yaake, te han t'mer yek dji oun yek djipen! Oun parkrenn t'men pash o Debleste!

2. Tessalonikarja 2:14

Har penam t'menge o lačo lab o Yezous Kristestar, das o Devel t'men gole, te lenn t'mer o raylepen, hoy hi ninna maro rayes, o Yezous Kristes.

1. Timoteo 1:18

Miro čavo Timoteo, kova penau touke, te rikress tou kova an tiro dji. Ma biste kol laba, hoy glan i tsiro pral toute glan-vi penlo van! Kolla laba denn tout i zoor, te moukess gar tele te krell o Debleskri boudi, yaake har i lačo kourepaskro gar pre dell an o kourepen.

1. Timoteo 1:19

Rike ap o patsepen ap o Yezous Kristeste! Kre, hoy tiro dji touke penella! Hi menshe, kay shounan gar ap pengro dji, oun kran gar, hoy mishto hi. Oun yon peran o Debleskro dromestar tele.

1. Timoteo 4:14

Ma biste koy boudi, hoy o Debleskro Dourho tout das, har kol phoureder phrala touke i vasta pre čivan, oun hoy yon pral toute glan-vi penan!

1. Timoteo 6:13

Me penau touke glan o Debleste, kay krell lauter djido, oun glan o Yezous Kristo, kay penas o čačepen glan o Pontio Pilato:

1. Timoteo 6:19

Yon te krenn lačo koova i vavarenge, hi kova lengro bravlepen an o bolepen, hoy ačella. Yaake djivenn le o djipen, hoy o Devel kamella.

2. Timoteo 1:9

Yob las men dran o čilačepen vin, oun das men gole, te djivas leha khetne. His gar dran maro lačo koova, te das lo men gole. Na-a. Kova his an leskro dji, te vas lo menge lačes. Har o bolepen oun i phoub gomme gar koy his, his an leskro dji, te bičrell lo o Yezous Kristes menge ap i phoub.

2. Timoteo 2:2

Tou hals pashel, har penom boud menshen o Debleskro lab. Kova, hoy shounal mandar, sike kanna vavar patslen, kay krenn, hoy tou lenge peneh, oun kolendar tou djineh, te hayvenn le mishto o Debleskro lab te penell!

2. Timoteo 4:7

Me boudrom phares o Yezouseske oun dom miro patsepen gar pre. Me nashom yaake ap o Yezouseskro drom, har te voms i naashepaskro, kay nashell i rah drom. Kanna nashom o tselo drom.

Hebrearja 13:23

Djinenn, maro phraal Timoteo vas dran o stilepen vin. Te vell lo sik pash mande, vau leha pash t'mende.

Hebrearja 3:14

Te rikrah zoreles ap maro patsepen ap o Yezous Kristeste yaake rah, har djivah, palle ham čačepah leskre.

Hebrearja 6:18

Ko lab, hoy das o Devel oun das peskro vast pre, nay vell an kek tsiro krik lino. O Devel rhorhella gar. Oun mer, kay vam pash leste, te lell lo men dran o čilačepen vin, men hi kanna leskro zorelo lab, te dell lo men o djipen, hoy gar pre-herella, yaake har yob penas.

1. Petro 3:9

Krenn kekeske čilačepen, kay kras ap t'mende čilačepen! Yek te čingrell ap t'mende, ma čingrenn pale! Rakrenn lače laba leha! O Devel das t'men gole, te lenn t'mer leskro lačepen.

1. Petro 5:10

I tikno tsiro vell pharo koova ap t'mende. An kava tsiro lenn t'mer i zoor, te ačenn ap o Debleskro drom. O Devel, kolestar vell o tselo lačepen, yob das t'men gole, te djivenn hako tsiro khetne o Yezous Kristeha oun lenn leskro raylepen. Yob dell t'men ninna i zoor, te ačenn zoreles an o patsepen oun an o djipen.

1. Johanni 2:25

Oun t'mer lenn ko djipen, hoy gar pre-herella. Kova penas o Yezous Kristo menge.

Judas 1:3

Mire phrala oun phenya, his i tsiro, kay kamoms t'menge an i liil te činell, har lačo o Devel ap mende hi, te las lo men dran o čilačepen vin. Pral kova kamau me kanna bouder gar te činell. Kanna dikau, hi feteder, te činap t'menge, te ačenn zoreles an o patsepen. Ma moukenn t'men o Debleskro dromestar tele te anell! Leskro lab, hoy t'menge penlo vas, ačell čačo hako tsiro.

Debleskro tsiro 3:3

Ma bistrenn, hoy t'menge penlo vas oun hoy shounan! Oun rikrenn ap kal laba! Oun avenn pale ap o čačo drom! Te krenn kova gar, oun stenn gar pre o sopastar, palle vau pral t'mende har i čorepaskro. Oun t'mer djinenn gar, havo tsireske pale vau.