1. Rajengro liil 18:39 - O Debleskro Lab 2024 (Sinte-Manouche)

³⁹ Har i tsele menshe kova dikan, peran le ap pengre mouya oun dan gole: “O baro Devel, yob hi o Devel! O baro Devel, yob hi o Devel!”

O Debleskro Drom 2021 (Sinte)

³⁹ Har i tsele menshe kowa dikan, peran le ap pengre muja un dan gole: “O baro Dewel, job hi o Dewel! O baro Dewel, job hi o Dewel!”

1. Rajengro liil 18:39 ပူးပေါင်းရင်းမြစ်များ

1. Rajengro liil 18:21

Har yon lauter khetne his, djas o Eliya glan i tsele Israelitaryen oun penas: “Har dour kamenn t'mer gomme ap douy rigya te djan? Hi o baro Devel o čačo Devel, palle nashenn leske pal, te hi o Baal, palle nashenn leske pal!” I menshe penan leske kek lab pale pale.

1. Rajengro liil 18:24

Palle mou kharenn yon o lab lengro deblestar, oun me kharau o lab o baro Deblestar. Oun yaake hi: Ko devel, kay moukell i yag te vell, kova hi o Devel.” Kote penan i tsele menshe: “Kova hi mishto.”

1. Rajengro liil 20:13

Koy vas i Debleskro rakepaskro pash o Ahab, ko baro rayeste pral Israel, oun penas ap leste: “Kava penell o baro Devel: Dikeh tou kol boud boud lourden? Čačepah, me kamau len kava dives an tiro vast te dell, te hayvess tou, me hom o baro Devel!”

1. Rajengro liil 8:60

Palle nay dikenn i menshe an i tsele vavar themma ap kay phoub, kay o baro Devel o čačo Devel hi, yob oun kek vavar.

1. Familjakro liil 21:16

Oun o David dikas pral oun dikas ko bolepaskres o baro Deblestar tardo mashkral i phoub oun o bolepen. An leskro vast his i rharo, koleha sikras lo pral o foro Yerusalem. Kote peras o David oun i phoureder ap pengro mouy. Halauter his le an gone an-rido.

2. Familjakro liil 33:13

Oun har lo yaake mangas, moukas pes o baro Devel te mangell, oun shounas leskro mangepen, oun anas les pale an o foro Yerusalem an leskro them, kay yob baro ray hi. Koy hayvas o Manasse, kay o baro Devel o čačo Devel hi.

2. Familjakro liil 7:3

Oun i tsele Israelitarya dikan, har i yag dran o bolepen peras oun o baro Debleskro raylepen ap o kheer his. Oun yon djan ap pengre čanga pengro mouyeha ap i barra ap i phoub, oun mangan les an, oun sharan o baro Debles kal labentsa: “Yob hi kamlo, oun leskro lačepen hi hako tsiro menge koy.”

Esra 1:3

Koon kanna mank t'mende leskre menshendar hi, koleha te vell peskro Devel! Oun yob nay djal pral an o foro Yerusalem an o them Youda, oun nay čivell o baro Debleskro kheer pre! Kova hi o Israeleskro Devel. Oun yob rodas peske o foro Yerusalem vin, te vell lo kote an-mangedo.

Debleskri gili 100:3

Ma bistrenn: O baro Devel kokres hi o Devel! Yob kras men, oun leskre ham mer. Leskre menshe ham, oun yob hi menge har i bakrengro, kay djal glan leskre bakre oun anell len kote, kay len doha rhapaske hi.

Debleskri gili 118:27

O baro Devel hi kokres o Devel. Kamles dikell lo ap mende. Avenn, lenn palmtikre patria an o vast, oun djan khelepah glan o Debleskri rhačepaskri!

Debleskri gili 50:7

“Mire menshe, shounenn! Me kamau rakrell. Israel, shoun, har me, tiro Devel penau touke, kay kova, hoy kral, gar mishto hi.

Debleskri gili 94:16

Koon vell ap miri rig, te kouras men i čilačentsa? Koon vell pash mande, te djas mer khetne ap kolende, kay krenn midjak koova?

2. Mose 20:2

Me, o baro Devel, hom tiro Devel, koon tout vin las dran o them Egiptia, kay tou i pandlo boudepaskro hals.

Ezekiel 20:5

Pen lenge: Kava penell o baro Devel, maro ray: Me rodom i Israelitarya vin, te venn le mire menshe. Har yon gomme an o them Egiptia his, penom lenge, koon me hom. Ava, me hadom miro vast pre, te dap man sovel, oun penom kolenge dran o kheer Yakob: Me, o baro Devel, hom t'maro Devel.

3. Mose 9:24

I yag djas vin o baro Deblestar, oun rhačras ko mass pre kol firhendar, koleskro tselo mass rhačedo vell, ninna kol thoulle kotya, hoy ap o Debleskri rhačepaskri čiddo his. Har kova i tsele menshe dikan, dan le i barhtyatar gole, oun čivan pen tele glan o baro Debleste ap i phoub.

Johanni 5:35

O Yohanni his i momeli, kay rhačas. Oun i tikno tsiro hans t'mer barhtelo pral kova, hoy yob penas oun kras.

Bičepangre 2:37

Har kol menshe kova shounan, djas lenge kova an lengro dji. Oun yon poučan o Petrestar oun kol vavar Yezouseskre bičepangrendar: “Morshale, mire phrala, hoy kras mer?”

Bičepangre 4:16

“Hoy kras mer kal menshentsa? Hakeno an o foro Yerusalem djinell kanna, kay kran kolla i baro koova, hoy kek vavar nay krella. Mer nay dah kova gar bourhoste.

Čačepangre 13:20

Oun har i yag ap o bar pre djas an o bolepen, koy djas o baro Debleskro bolepaskro ninna pre an koy yag. Oun o Manoa oun leskri romni dikan kova, oun vitsran pen ap i phoub ap pengro mouy.