1. Rajengro liil 17:12 - O Debleskro Lab 2024 (Sinte-Manouche)

¹² Kote penas li: “Pash o baro Debleste, tiro djido Debleste, man hi kek peklo rhapen. Či har i vast pherdo yarro an i piri oun i roy pherdo djet an o khoro hi man. Ake, yek, douy kotya kasht, hoy hadom pre. Kanna djau khere oun krau mange oun miro čaveske i rhapen, te rhas. Oun palle hounte meras.”

O Debleskro Drom 2021 (Sinte)

¹² Kote penas li: “Pash o baro Debleste, tiro djido Debleste, man hi kek peklo chapen. Tchi har i wast pherdo jarro an i piri un i roi pherdo djet an o khoro hi man. Ake, jek, dui kotja kasht, hoi hadom pre. Kanna djau khere un krau mange un miro tchaweske i chapen, te chas. Un palle hunte meras.”

1. Rajengro liil 17:12 ပူးပေါင်းရင်းမြစ်များ

1. Mose 21:15

Har len kek pani bouder his, čivras yoy kol čaves tel i bourra.

1. Mose 21:16

Oun beshas pes i tselo kotar lestar. Yoy penas peske: “Me nashte dikau kova gar, har miro čavo merella.” Har yoy kote beshdo his, rovas yoy zoreles.

2. Samuel 15:21

O Itay penas ap o baro rayeste: “Me dau man sovel pash o djido Debleste: Yaake har čačo hi, kay tou, miro baro ray, djiveh, me, tiro boudepaskro, djau touha, kay tou ninna djah. Hi mange yek, te merau oder te ačau djido.”

1. Rajengro liil 17:1

O Eliya dran o gab Tishbe an o them Gilead penas ap o Ahab: “Me penau touke an o lab o baro Deblestar, kay o Israeleskro djido Devel hi, glan koleste hom me tardo: An kol bersha, hoy kanna venna, dell kek brishin, vitar gar djal i sapeno dourho pre dran i phoub, bis te penau me kova.”

1. Rajengro liil 17:11

Har djas li peske, te anell li kova, das lo pal late gole oun penas: “An mange i kotar maro touha!”

1. Rajengro liil 17:13

Kote penas o Eliya lake: “Ma traash! Dja koy oun kre, har tou penal! De yak, te kress mange i tikno maro, oun an les mange vin. Oun palle kre o maro touke oun tiro čaveske!

Jeremia 14:18

Djau me vin ap o them, dikau me menshen, kay peran an o kourepen. Vau me an o foro, hi koy menshe čiddo, kay meran i bokatar. Ninna Debleskre rakepangre oun rashaya nashenn trouyel an o them, oun djinenn gar, hoy te krenn.

Jeremia 4:2

Te denn t'men sovel oun penenn: Me dau man sovel pash o djido Debleste … oun t'mer rhorhenn gar koy pashel, oun rikrenn t'maro lab, palle poučenn mandar i menshe an i vavar themma, te čivap miri barht ap lende, oun yon sharenn pen, kay prindjrenn yon man.

Jeremia 5:2

Ninna te denn yon pen sovel pash o djido Debleste, hi kova rhorhepen.

Ropaskre gilja 4:9

Kolenge, kay o rhareha maredo van, djas feteder har kolenge, kay meran i bokatar. Har kek djob bouder bares vas, phagan le khetne i bokatar, bis te meran le.

Mateo 26:7

Oun har o Yezous kote rhas, vas i djouvel pash leste. Kolat his i toushni an o vast. Kote his kouč djet dren. Ko djet čoras yoy ap leskro shero vin, te makell li les dren.

1. Samuel 14:39

Ninna te vals kova miro čavo Yonatan, hounte merals lo. Kova dau me man sovel pash o djido Debleste, kay ap o Israeleskri rig hi.” Oun kek i tsele lourdendar penas čomone.

1. Samuel 14:45

I Israeleskre morsha penan ap o Saul: “Hounte merell o Yonatan, kay ko baro koova kras oun las o Israel vin? Kova krah mer gar! Pash o djido Debleste dah men sovel: Kek bal te perell tele leskro sherestar! O Devel his ap leskri rig, doleske nay kras yob kava dives sau baro kova.” Yaake lan i morsha o Yonatanes vin dran o merepen. Oun yob vas gar maredo.

1. Samuel 20:21

Oun bičrau i čaves koy, te rodell lo len. Te dau ap leste gole: Yon hi gar dour toutar. Dja oun an len! Palle am! Lauter hi mishto troul toute tardo. Oun tout hounte vell kek daar. Kova dau me man sovel pash o djido Debleste.

1. Samuel 20:3

O David penas: “Tiro dad hayvas, te hom tiro maal. Doleske penas lo peske: O Yonatan hounte djinell kova gar, te doukrell kova les gar.” Oun o David penas doureder: “Me dau man sovel glan o djido Debleste oun glan toute: Mashkral mande oun o merepen hi gar boudeder har yek heryakro stakepen!”

1. Samuel 25:26

Oun kanna, miro ray, me dau man sovel glan o djido Debleste oun glan toute: O baro Devel rikras tout pale, te aness tou rat ap toute oun dess tiro vasteha pale, hoy o Nabal ap toute kras. Kamau, te djal lauterenge, kay kamenn tout čilačepen, yaake har o Nabaleske!

1. Samuel 26:10

Palle penas lo: “Me dau man sovel pash o djido Debleste: Yob kokres marell les, nay vell ap leskro tsiro, kay hounte merell lo, nay vell an o marepen.