1. Petro 4:2 - O Debleskro Lab 2024 (Sinte-Manouche)

² Yaake rah, har kava mensho ap kay phoub hi, krell lo kova, hoy o Devel kamella, oun djivell bouder gar pal peskro shero.

O Debleskro Drom 2021 (Sinte)

² Jaake rah, har kau mensho ap kai phub hi, krell lo kowa, hoi o Dewel kamella, un djiwell buder gar pal peskro shero.

1. Petro 4:2 ပူးပေါင်းရင်းမြစ်များ

Debleskri gili 143:10

Sike mange, hoy touke shoukar hi, te krap me, tou hal miro Devel. Tiro lačo dourho mou sikrell man o čačo drom.

Hosea 6:7

Yaake sik har van le an o them dren pash o foro Adam, rikran le pen bouder gar ap kova, hoy me, o baro Devel lentsa vin krom, oun moukan man.

Mateo 12:50

Kova, kay krella, hoy miro dad an o bolepen kamella, kova hi miro phraal, oun miri pheen, oun miri day.”

Mateo 20:4

Ap kolende penas lo: Djan ap miro kotar them, oun boudrenn mange! Me dau t'men yaake boud love, har t'mari boudi moldo hi. Oun yon djan kote.

Mateo 21:31

Koon kol douyendar kras kova, hoy o dad kamas?” Penan le ap leste: “O phoureder.” Penas o Yezous: “Čačepah, me penau t'menge: Kol bibolde, kay i love i Remaryenge dren lenna oun hi t'menge pale-čiddo, oun i loubya venna sikeder ap o Debleskro drom har t'mer.

Mateo 7:21

Kolen, kay penenn ap mande Ray, ray lell o Devel gar lauter pash peste an o bolepen. Na-a! Kolla kokres, kay krenna, hoy miro dad an o bolepen kamella, kolen lell lo an o bolepen.

Markus 3:35

Kova, kay krell, hoy o Devel kamella, kova hi miro phraal, miri pheen, oun miri day.”

Markus 7:21

Dran o menshengro dji vell o čilačo koova, hoy an leskro shero trouyel djal. Dran o dji vell, te krell lo djoungelo bipandlo koova, te čorell lo, te dell lo i vavares moulo.

Johanni 1:13

Kova van le gar, har yon boldo van. O nevo djipen vas gar dran o menshengro kamlepen. Na-a, o nevo djipen lan le kokres o Deblestar.

Johanni 7:17

Koon kova krella, hoy o Devel kamella, kova hayvella, kay mire laba o Deblestar venna, oun gar mandar.

Remarja 12:2

I menshe ap kay phoub djivenn pal pengro shero. Ma djivenn yaake har yon! Moukenn t'men o Deblestar neves te krell, te hayvenn t'mer, hoy yob kamella: kova, hoy hi lačo oun mishto oun čačo.

Remarja 14:7

Kek mendar djivell peske kokres, oun kek mendar merell peske kokres.

Remarja 6:11

Doleske dikenn yaake ap t'mende, har te vans moulo, oun te nay krans bouder gar o čilačepen. Djivenn o Yezous Kristeha khetne o Debleske!

Remarja 6:2

Kova kras mer gar! Mer ham har moulo. Oun o čilačepen hi bouder gar o ray pral mende.

Remarja 7:4

Yaake hi kova ninna t'mentsa, mire phrala. Har o Yezous Kristo meras, meran t'mer leha. O Moseskre laba hi bouder gar o ray pral t'mende. Kol labenge han moulo. Kanna hi t'men i vavar ray. Kova hi o Yezous Kristo, koles o Devel i moulendar djido kras. Kanna nay djivah yaake, te vell o Devel sharedo!

2. Korintarja 5:15

O Yezous meras halauterenge. Oun kanna hounte djivenn kolla, kay lan leskro djipen, bouder gar penge kokres. Na-a, yon hounte djivenn koleske, kay meras lenge, oun vas o Deblestar djido kerdo.

Efesarja 2:3

His i tsiro, kay djivam mer halauter har yon, oun kram o čilačepen, hoy an mende hi. Mer kram, hoy mer kamam, oun hoy menge an o shero vas. Oun o Debleskri rholi his ninna pral mende har pral kol vavar menshende.

Efesarja 4:17

Me penau t'menge zoreles, hoy mange o ray Yezous penas: Ma djivenn bouder har kol menshe, kay prindjrenn o Debles gar! Kova, hoy an lengro shero trouyel djala, hi či moldo.

Efesarja 5:17

Doleske krenn t'maro dji pre, te hayvenn, hoy o ray Yezous t'mendar kamella!

Efesarja 6:6

Ma krenn koy boudi yaake, te sharenn t'men i menshe! Na-a, krenn koy boudi o Yezous Kristeske, te sharell yob t'men! Yaake han leskre boudepangre, kay o djiyestar krenna, hoy o Devel kamella.

Kolossarja 1:9

Oun har mer kova shounam, mangam o Debles t'menge, oun moukam gar tele, te mangas lestar, te dell lo an t'mende o gosvepen, hoy dell o Debleskro Dourho, te hayvenn t'mer, hoy o Devel kamella.

Kolossarja 3:3

T'mer meran. Oun t'maro nevo djipen hi kanna o Yezous Kristeha pash o Debleste an o bolepen, ninna te dikenn kova kanna gomme gar.

Kolossarja 4:12

Ninna o Epafras penell t'menge: “Ačenn o Debleha!” Kova hi yek t'mendar, oun boudrell o Yezous Kristeske. Yob mangell o Debles hako tsiro t'menge, te venn t'mer zoreles an o patsepen, te djinenn lauter, hoy o Devel t'mendar kamella oun te krenn kova ninna.

1. Tessalonikarja 5:18

Parkrenn t'men pash leste pral halauter! Kova kamell o Devel lauterendar, kay djan ap o Yezouseskro drom.

Hebrearja 13:21

Mangau o Deblestar, te dell lo t'men i zoor, te krenn lauter kova, hoy lačo hi, yaake har yob kamella. Mou dell lo men i zoor, te djivas yaake, har mishto hi glan leskre yaka. O Yezous Kristo nay krell kova. Sharas o Yezous Kristes kanna oun hako tsiro! Amen.

Jakobo 1:18

Yob kamas, te vam mer leskre čave. Kolla vam, har menge leskro čačo lab penlo vas. Yaake vam mer o feteder mank lauter, hoy o Devel kras.

1. Petro 1:14

T'mer han o Debleskre čave. Doleske shounenn ap leste, oun djivenn bouder gar yaake har an ko tsiro, kay prindjran t'mer o Debles gar oun kran o čilačepen, hoy an t'mende his.

1. Petro 2:1

Doleske moukenn hako čilačo koova! Ma rhorhenn! Ma rakrenn douy čipyentsa! Ma zilverenn! Rakrenn kek djoungelo koova pral kekeste!

1. Johanni 2:17

Kay phoub ačella gar, vitar gar kova, hoy i menshe ap kay phoub kamenna. Koon krella, hoy o Devel kamella, kova ačella hako tsiro.