1. Mose 34:20 - O Debleskro Lab 2024 (Sinte-Manouche)

^20-21 Oun o Hamor oun leskro čavo Sichem djan an o baro voudar lengro forestar, te rakrenn le i morshentsa an ko foro oun penan ap lende: “Kal morsha kamenn kek čingepen mentsa. Doleske mou ačenn le an kava them, te djan le trouyel parepaske. Hi doha platsa koy. Oun mer kamah lengre čen te romedinerell. Oun mer dah len mare čen.

O Debleskro Drom 2021 (Sinte)

^20-21 Un o Hamor un leskro tchawo Sichem djan an o baro wudar lengro forestar, te rakrenn le i murshentsa an ko foro un penan ap lende: “Kal mursha kamenn kek tchingepen mentsa. Doleske mu atchenn le an kau them, te djan le trujel parepaske. Hi doha platsa koi. Un mer kamah lengre tchen te romedinerell. Un mer dah len mare tchen.

1. Mose 34:20 ပူးပေါင်းရင်းမြစ်များ

1. Mose 23:10

O Hetari Efron his mank peskre menshende beshdo. Oun yob penas ap o Abrahameste glan kolende, kay pashel his, glan hakeneste, kay an o baro voudar o forestar his:

1. Mose 34:19

Oun ko terno morsh Sichem nashras kek tsiro, te krell lo kova. Yob kamas koy ča. Oun leskre tsele menshe an leskro dadeskro kheer shounan ap leste.

2. Samuel 15:2

Ninna djas o Absalom taysarlake ap o drom, oun vas pash o foreskro voudar. Oun te his yekes čingepen i vavareha oun doleske pash o baro rayeste djas, te rakrell yob o čačepen pral lende vin, palle das o Absalom les pash peste gole, oun poučas: “Dran havo foro hal tou?” Oun te penas kova: “Tiro boudepaskro hi kalla oun kolla menshendar dran Israel”,

Hiob 29:7

Har djom me pre an o foreskro baro voudar, oun beshom man pash i pralstunende,

Debleskri gili 127:5

Barhtelo hi kova, koles boud kolendar pash peste hi. Te vell i doosh ap leste anlo, venn le leske ap i rig, te lell lo peskro čačepen.

Gosewe laba 31:23

Lakro rom hi an-diklo an o foro, te rakrell lo pes tele i phourentsa.

Amos 5:10

Rhoyedo han t'mer ap koleste, kay t'menge o čačepen penell, oun t'mende sikrell, kay kova gar mishto hi, hoy kran.

Amos 5:12

Me djinau ko boud čilačo koova, hoy kran t'mer. Oun dikau, har baro t'mari doosh hi. T'mer rikrenn t'men gar pale, lače menshen palla te lell, oun moukenn t'men te ginell. Kek čačepen denn t'mer i čorvelen.

Amos 5:15

Dikenn čilačes ap kova, hoy čilačo hi, oun dikenn lačes ap kova, hoy lačo hi! Dikenn koy pre, te lell kova peskro čačepen, koon an o čačepen hi! Palle nay vell o baro Devel lačes kolenge, kay dran o kheer Yosef pral ačenn. Yob hi o ray pral o bolepen oun i phoub.

Zakarie 8:16

Kova hi, hoy hounte krenn t'mer: Rakrenn o čačepen yek o vavareha. Denn hakeneste peskro čačepen, te vell o čingepen krik lino.

5. Mose 17:5

palle lenn ko morshes oder koy djouvyat, oun anenn len vin glan t'maro foro, oun vitsrenn barra ap lende bis te hi le moulo.

Ruth 4:1

Oun o Boas djas pre pash o foreskro voudar, kay i morsha khetne venn, oun beshas pes koy. Kote vas ko vavar morsh, kay lake ninna koy hounte vals, kolestar o Boas rakras. Oun o Boas penas ap leste: “Ab kay pash mande, oun besh tout pash mande!” Oun yob vas oun beshas pes pash leste.