1. Korintarja 3:5 - O Debleskro Lab 2024 (Sinte-Manouche)

⁵ Dikenn, koon hi o Apollo, oun koon hom me, o Paulo! O Debleskre boudepangre ham mer oun kram, kay van t'mer patslo. Hakeno mendar kras koy boudi, har o Devel leste das.

O Debleskro Drom 2021 (Sinte)

⁵ Dikenn, koon hi o Apollo, un koon hom me, o Paulo! O Debleskre budepangre ham mer un kram, kai wan tumer patslo. Hakeno mendar kras koi budi, har o Dewel leste das.

1. Korintarja 3:5 ပူးပေါင်းရင်းမြစ်များ

Mateo 25:15

Hakeneste das lo yaake boud love, har kova hayvas, te ginell oun te bikrell kolla loventsa. Ko yekeste das lo panč gone pherdo roup, oun ko vavareste das lo douy gone, oun pale i vavareste yek gono. Oun palle djas lo an o vavar them.

Louka 1:2

Yon činan pre, hoy kolla penan, kay kote pashel his oun kova lauter dikan.

Johanni 3:27

Koy penas o Yohanni ap lende: “Kek nay lell čomone, te das les o Devel kova gar.

Bičepangre 18:24

Koy vas i biboldo an o foro Efesus. Leskro lab his Apollo. Kova vas dran o foro Alexandria. O Apollo djinas o Debleskro lab mishto, oun his i lačo rakepaskro.

Bičepangre 19:1

Har o Apollo an o foro Korint his, djas o Paulo an i themma Galatia oun Frigia, oun palle vas lo an o foro Efesus. Koy hatsas yob ninna patslen.

Remarja 15:16

Yob bičras man, te boudrap o Yezous Kristeske oun te djap pash kolende, kay kek bibolde hi, te sikrap len o Debleskro drom. Yaake hom har i rashay, kay anell kol menshen, kay kek bibolde hi, pash o Debleste. Oun o Devel dell len peskro Dourho, te venn le leskro. Oun yob dikell lačes ap lende.

1. Korintarja 12:28

Kote, kay i patsle khetne venna, das o Devel hakenes i boudi. Peskre bičepangren das lo koy boudi, te penenn le i menshenge peskro lab. Oun vavar hi o Debleskre rakepangre, kay penenna, hoy o Devel len sikras. Koy hi ninna sikepangre, kay sikrenn i menshende o Debleskro drom, oun kolla, kay krenn baro koova an o Debleskri zoor, kay kek kokres pestar nay krella. Vavaren das yob i zoor, te krenn le i nasselen sasto. Hi patsle, kay hi o vavarenge koy, oun ninna vavar, kay rikrenn i patslen khetne, oun pale vavar, kay rakrenn nay an i vavar rakepen, hoy o Debleskro Dourho len das.

1. Korintarja 16:12

Boud kope penom me ap maro phraleste Apollo, te vell yob kol vavar phralentsa pash t'mende. Yob kamell kova kanna gar. Te vell i mishto tsiro, vell lo pash t'mende.

1. Korintarja 3:10

O Devel his lačes ap mande oun das man i boudi, te boudrap ap ko kheer. Yaake čivom me i telstoune barra. Me krom kova, har i gosevo boudepaskro, koon hayvella khera te krell. Ap kol telstoune barra čivell i vavar boudepaskro vavar koova pre. Hakeno hounte dell garda, hoy yob pre čivella.

1. Korintarja 3:22

o Paulo, o Apollo, o Kefas. Oun t'maro hi ninna: kay phoub, o djipen, o merepen, kova, hoy kanna hi, oun kova, hoy vella. Lauter hi t'maro.

1. Korintarja 3:7

Kova, kay o djob an i phoub vitsrella, hi gar bareder har kova, kay o pani pre čorella. O Devel hi bareder, kay moukell o djob bares te vell.

1. Korintarja 9:17

Te kroms me kova mandar, palle nay loms me kova playsedo. Me krau kova gar mandar. O Devel das man koy boudi.

2. Korintarja 11:23

Yon penenn, te hi le o Yezous Kristeskre boudepangre. Kanna rakrau har i dinelo: Me hom boudeder har yon leskro boudepaskro. Me boudrom boudeder. Me vom boudeder stildo. Me lom boudeder dava. Man his boudeder o merepen glan i yaka har yon.

2. Korintarja 3:3

Dran mari boudi van t'mer pash o Yezous Kristeste. Oun kanna han har i liil, hoy vella o Yezous Kristestar. Kava liil činas o Dourho o djido Deblestar, oun kek mensho. Kava liil vas gar činlo ap i barra. Na-a. Kava liil vas činlo an i menshengre djia, an t'mare djia.

2. Korintarja 3:6

Yob kras dran mende peskre boudepangre, te sikras mer i menshende o nevo drom, kay o Devel oun i menshe mala venna. Ap o phouro drom hounte rikrenn le pen ap i činle laba. Kol phoure činle laba anenn i menshen an o merepen. Ap o nevo drom lenn le o Debleskro Dourho, hoy dell len o djipen.

2. Korintarja 4:1

O Debles hi i baro dji menge, oun das men kay boudi, te sikras i menshende leskro drom. Doleske vah gar khino, te kras kova.

2. Korintarja 4:5

Lestar rakrah mer, oun gar mendar. Mer penah i menshenge, o Yezous Kristo hi o ray. Oun mer ham leskre boudepangre oun boudrah t'menge.

2. Korintarja 4:7

O lačo lab o Yezous Kristestar hi i baro bravlepen, hoy mer hidjrah an mende. Mer kokres ham har čare, hoy či moldo hi, yaake te dikell hakeno, koy bari zoor vell o Deblestar, oun gar mendar.

2. Korintarja 5:18

Kova lauter vell o Deblestar. Yob bičras o Yezous Kristes menge an o merepen, te lell lo kova krik, hoy his tardo mank mende oun o Debleste, te nay vas mer kanna pash leste. Oun mende das lo koy boudi, te penas i menshenge, te nay venn le pash leste.

2. Korintarja 6:1

Mer ham o Debleskre boudepangre. Doleske penah t'menge: Ma vitsrenn gar o Debleskro lačepen an i čik!

2. Korintarja 6:4

Mer kamah, te dikenn le hako tsiro ap mende, kay ham o Debleskre boudepangre. Doleske dah gar pre, ninna te vell boud pharo koova ap mende. Ninna te hi men gar doha djipaske, te vell i daar ap mende, rikrah vin.

Efesarja 3:7

Kava lačo lab penau i menshenge. O Devel his mange lačo, te das lo man kay boudi. Ninna das lo man i zoor, te krap kova.

Kolossarja 1:23

Yek koova hounte krenn t'mer: Ačenn ap o Yezouseskro drom! Patsenn zoreles ap leste! Moukenn gar tele, te dikenn ap kova, hoy t'men hi pash o Debleste! Rikrenn zoreles ap leskro lačo lab, hoy t'menge penlo vas! Ko lab vas penlo ap i tseli phoub. Ninna me, o Paulo, hounte penap ko lab i menshenge. Kova hi miri boudi.

Kolossarja 1:25

Lengro boudepaskro vom me. O Devel das man koy boudi, te penap t'menge o tselo Debleskro lab.

1. Timoteo 1:12

Me parkrau man pash maro rayeste, o Yezous Kristeste, kay das man i zoor, te boudrap leske. Yob patsas ap mande, oun čivas man an koy boudi, te vap leske koy.

1. Petro 4:10

Hakeno t'mendar las i boudi o Deblestar, te nay krell lo i vavarengro patsepen zoreles. Krenn koy boudi! Avenn yek o vavareske koy! Yaake han t'mer lače boudepangre o Debleske.