Galesia 2:20 - Nupela Testamen long tokples Mende long Niugini

²⁰ Uwosik tos a liyanda nombo mbeek anhinjik a liyanda ambu nir. Krais anhik or lishiwak os amu liyanduwa. Uwosik mbele mbele misambi torok a uwa ondo orin a hishiowenda nombo orokop a unda nir. Uhu orin wavu anhik a ewenda nir. Mberem ushiwak? Or anin or rupshihi anhi farniyik hari ora.

Galesia 2:20 ပူးပေါင်းရင်းမြစ်များ

Matyu 4:3

Urik Laulaka or taha ormu mbara, “Os Avui Wasilakahi jikisi indingak mi na nahi, mi mbanak sunja toso avak si tormblehe bretik si nanak mivai aka.”

Mashi jivi Jisashi Jon or kayeri 1:49

Urik ormu mbara, “Tisa, mir jikisi Avui Wasilakahi mira. Mir yanga Israelik fehe ma malakama lihi mira.”

Mashi jivi Jisashi Jon or kayeri 10:11

Sipsip anhi ondonjik a hishiwa osik a hakwa nir. Uhu antonom sipsip mashama jivi anira.

Mashi jivi Jisashi Jon or kayeri 15:13

Os ma lar li mandingormekmbaha li unak jir yejen jihinjik ji mbanak orhi farniyik jirin li mandingormewa nombo oso man wapnukuk ewenda nombo mende sira. Uhu mbele mbele jivi ol ma li undan tikrinda sir.

Mashi jivi Jisashi Jon or kayeri 17:21

Mirin a saweshinak ma ondon mi jelyashinak lir amber wavu namtaskop li naka, os an nga mir nga wavu namtaskop shi nanda hom. Uhu halashinak lir nga shir nga wavu namtaskop ni hishika. Ushinak ma misambik fehe avak os mi mbashirik a rarin heyekrahakorokwa lir.

Mashi jivi Jisashi Jon or kayeri 3:16

“Avui Wasilaka jikisi orhi namtar numbu ria. Hako ma misambik fehendan wapnuku orhik or ewendari osik jikisi orhi oton or mbashirik ma ondon jivinakurik takari ri. Uhunda osik ma ol orin wavu lihik ewewa ma lihi lar mbeek kavak nakwa ambu ri, wahau, ermba ermbak lindan lakwa ri.

Mashi jivi Jisashi Jon or kayeri 3:35

Avui Wasilaka jikisi orhin wapnuku orhik or ewendari osik mbele mbele orhi ondon tavarenje jikisi orhik hari ri.

Mashi jivi Jisashi Jon or kayeri 6:57

Avui anhi or mbashirik a rari oto ermba ermbak linda oso tontlo oria. Or mbashiwak os amu sinduwa. Uhunda osik ma or maome anhi nga fi anhi nga awa ma oto a mbashinak ermba ermbak sikwa ria.

Mashi jivi Jisashi Jon or kayeri 6:69

Uhu angop ni hishihi armek ni heyewa nir, mir ma jivi worna Avui Wasilaka kamahanda ma mira.”

Aposel 8:36

Uhu nombok fri ihi fa las fri heyehe Itiopiak fehe ma oto mu mbara, “Heye, fa las kasai karok nandu. Anin fak tolofaleka.”

Aposel 9:20

Uhu kolok Judama lotu undari aka orok or ihi mashin ormu sawera, “Jisas orto jikisi Avui Wasilakahi ria.”

Jekamba Pol ol yanga Romik lindanjik or kayeri 1:17

Mashi orhi orok nombo os man ma worna mak or ushakurin or mukushirik ni heyeri sir. Ushiwa osik os mashi oson ni misihi ni mba, “Ome sira, Jisas nirin jivinahanda ma ria.” Os karem ni mba nahi, ma worna mak or ushakwa nira. Mbeek nombo anandi las nga nanda ambu sir. Os jekamba orhik karem li kayehendari hom, “Ma ol Avui Wasilakahi mashin misihi mba, mashi oso ome sira. Karem mbawa ma ondon ma worna mak or ushaha ermba ermbak linda oson lirin hakwa ria.”

Jekamba Pol ol yanga Romik lindanjik or kayeri 14:7

Undosik os nimu heyenduwa, tos ni liyawa nga os ni hakwa nga mbeek ni tolonda ambu nir. Oso Avui Wasilaka ortonom tolonda ria.

Jekamba Pol ol yanga Romik lindanjik or kayeri 3:22

Nombo oso karem, os ni hishihi ni mba, “Jisas kavakava anhi ondon angop or yoko ermberi lir.” Karem ni mba nahi, Avui Wasilaka avak ma worna mak or ushakwa nir. Or nombo namtas nom sari ri. Mbeek nombo las Judama ondonjik or sashihi hovok nombo anandi las Judama ambu ondonjik sari ambu ri, wahau. Nombo namtas nom or sari sir.

Jekamba Pol ol yanga Romik lindanjik or kayeri 4:25

Kavakava nihin or yoko ermbekurik Jisasin or halashirik nihi farniyik li jimandingormeri ri. Ushihi nor mbarik mawan or halaha nor usahari ri. Uhunda lerawu os Jisas lari nombo orok Avui Wasilaka nirin ma worna mak or ushakwa nir.

Jekamba Pol ol yanga Romik lindanjik or kayeri 5:2

Jisas nombon or sashihindak Avui Wasilaka waprupshi orhi os yelndam nirin or hahanda oso kormbak si ralashihindak orok nimu linduwa. Unda osik os Jisasin ni hishiowehe nombo orok er ni sinda nahi, kumak hevenik ni ihi or nga ermba ermbak ni likwa nira. Undosik mbele mbele ondon ni hishihi os nimu rupshinduwa.

Jekamba Pol ol yanga Romik lindanjik or kayeri 5:6

Nir mbeek mbele jivi las ni uhu orhi misokomek ma worna mak ni nakurik ni nari ambu nir. Mende indinga. Hako os wutari orhik ni nari wolo mendek jikisi orhi Jisas Kraisin or mbashirik kavakava nihin yoko ermbekurik or taha nihi farniyik hari ri.

Jekamba Pol ol yanga Romik lindanjik or kayeri 5:8

Hako Krais nihi farniyik or hari wolo nir mbeek ma jivik ni nari ambu nir, wahau. Nir kavakavan unda mak ni nari nira. Hako oro wolo mendek Avui Wasilaka waprupshi orhin yelndam nirin hari ria. Uhu nirin or mandingormekurin or halaha jikisi orhi Jisas Krais yejen or halashirik nihi farniyik ormu hara. Uwosik os nimu heyenduwa, Avui Wasilaka nirin warje mende nga rupshinda ri.

Jekamba Pol ol yanga Romik lindanjik or kayeri 6:13

Jir avak kumban mo tavan mo maome jihin ji halashinak sungu masi jihi si mbaskashiwa hom kavakavan li uwa hala, wahau. Hako kumba tava maome jihi simbalesik amber hom Avui Wasilakan ji haka. Uhu lerawu orhin ji laka. Mberem ushiwak? Jir angop sungu masi jihi si mbaskashirik ji undari nombo orok ji haha maninimbak nari jir. Unda osik maome jihin simbalesik Avui Wasilakan ji haha nombo worna orhin ji tiyaha os or mbawa hom mbele mbele jivi nom ji uka.

Jekamba Pol ol yanga Romik lindanjik or kayeri 6:8

He, angop Krais nga nakrem ni hari osik, karem nimu hishikuwa, or nga nakrem ermba ermbak ni likwa nir.

Jekamba Pol ol yanga Romik lindanjik or kayeri 8:10

Hako kavakavan ji unda osik, os ji hawa wolo maome jihi kuvayikwa sir. Hako masikome jihi wahau. Krais ushihindak Avui Wasilaka jirin ma worna mak or ushari jir. Uwosik masikome jihi ermba ermbak er likwa ri.

Jekamba Pol ol yanga Romik lindanjik or kayeri 8:37

Ome sira, mbele mbele nomorawu ondo avak nihik talakwa lir. Hako Krais nirin wapnuku orhik or ewenda osik, nirin or jelyashinak kwambuk er ni sikwa nir. Uhu nomorawu ondon ni mblarnaha ni tukrukwa lir.

1 Korin 6:17

Hako os Wasilaka nga nakrem ji ananja si nahi, masikome jihi ormu Masikome Wasilakahi nga nakrem namtaskop opmu nanduwa.

2 Korin 1:24

Nir mbeek os Jisasin ji hishindiyanda nombo jihi oson ni heyehe, “Nir sishiwak sinda jir,” karem ni mbanda ambu nir, wahau. Os Jisasin ji hishindiyanda nombo jihi angop jihinjik ji hishihi ji sitambananda sir. Unda osik nir jir nga nakrem lerawun ni lanak ji rupshikmba nimu hishinduwa.

2 Korin 10:3

He, misambik nimu linduwa. Hako nir mbeek ma misambik fehe li hishihi awun li unda hom ni unda ambu nir.

2 Korin 11:10

Mashi omendinga Kraishi anhik si nanda osik omendingak jirin amu mbanduwa. Os erem a uwan a rupshinda nir. Uwa osik ma jir provins Akaiak fehe lar mbeek or mbanak os erem a uwan a halakwa ambu nir.

2 Korin 13:3

Uwa osik ji auheyeka. An Krais or sauhawak mashi orhin a sawenda nir. Hako jir karem mbanda jir, “Os Krais sauhawak mashi orhin mi sawenda nahi, wa mukunak ni heyehe avak ni mba, “Mir Krais sauhawak sawenda mir.” Uwa osik avak ji heyekwa sir. Krais kavakava os ji undan or tolo wornawa wolo, kwambu orhi nga er or tolo wornakwa sir.

2 Korin 13:5

Ermba ermbak os Jisasin ji hishindiyanda nombo jihin jihinjik ji oweioweiheyeka. Os ji liyawa jihi oson mukunak ma li heye li mba, “Ma tondo Jisasin hishindiyanda ma tolir,” karem li mbaku mo wahau? Os ji mba, “Jisas Krais wavu nihik linda ambu ri,” karem ji mba nahi, jir mbeek nombo worna indingan tiyanda ambu jir. Jir nombo wornan angop halawa jir.

2 Korin 5:14

Krais ma amber wapnuku orhik or owehe ortonom kavakava li unda ondon or yoko ermbekurik lihi farniyik hari ora. Uri nombo orok lir amber or hahandari hom hari lir, karem ni hishinda nir.

2 Korin 5:15

Ortonom ma amber jelyakurik hari ri. Unda osik ter liwa ma halanak avak lihikop li hishihi li yandan li halaha os or mbahanda nombon li tiyaka. Or lihi farniyik or haha indik usahari ri. Unda osik lerawu orhin nimu landuwa.

2 Korin 5:7

Uhu nir mbeek orin ni heyenda ambu nir, men orin ni hishiowehe nimu yanduwa.

Galesia 1:4

Krais kavakava ni undanjik maome orhin ofa hom nirin jivinakurik hari ri. Uhu mbele mbele kava tos ter misambik nanda nindik nirin indik ormu lara. Os erem or uri oso Avui Wasilaka nihi or mbahandari nombo hom os ormu ura.

Galesia 2:16

Hako Avui Wasilaka mbeek ma lon tiyawak or heyehe or mba, “Rondo ma worna ma lir,” karem mbanda ambu ri, wahau. Hako os Jisas lari lerawun li heyehe li mba, “Ome sira. Ortonom hulaima nokopman jivinakmbaha Avui Wasilaka kamahanda ma ria.” Karem li mbahanda nombo orok Avui Wasilaka lirin ma worna mak ushakwa ri. Oso angop ni heyenda sir. Shir erema, Jisas Krais lerawu os or lahanda nombo orok Avui Wasilaka shirin ma worna mak ushari ri. Mbeek lon shi tiyanda nombok nembes. Mberem ushiwak? Ma lar mbeek lo amber hom or tiyawak ma worna mak or ushandahi ambu ri, wahau.

Galesia 3:11

Erem or mbashihindak os nimu krahak yarinduwa, ma lar mbeek lon tiyanda nombo orok ma worna mak nakwa ambu ri, wahau. Os jekamba orhik karem li kayehendari hom, “Ma ol Avui Wasilakahi mashin misihi mba, mashi oso ome sira. Karem mbawa ma ondon ma worna mak or ushaha ermba ermbak er linda oson lirin hakwa ria.”

Galesia 5:24

Ma ol Kraishi krahak sinda ondo mbele mbele kava ol sungu masi lihi mbaskashirik li undari ondo angop miando Jisashik er nga li tlolori lir.

Galesia 6:14

Hako an mbeek hi anhi nga, ma lal hi lihi nga, na hauowenda ambu nir, wahau. An Jisas Krais Wasilaka nihi or miandok hahanda hi orhi nom a hauowenda nir. Miando Jisas or hari orok mbele mbele ol misambi torok fehe angop a tlolori nir. Mbele mbele ondon angop a halari lir. Unda osik mbele las misambik fehe mbeek anin indik toltangrikwa ambu sir.

Efesus 3:17

Unak Kraisin ji hishindiyanda nombo jihi oso kwambuk si nashinak sunguwavu jihik or lika. Avui Wasilaka jirin or jelyashinak ma anandin wapnuku jihik owenda nombo jihi oso wasilakak si naka.

Efesus 5:2

Jir avak ma anandin wapnuku jihik owenda nombon ji toltambanaka, os erem ji uwa Krais unda hom os jimu tiyanduwa. Os nirnjik miandok or hari oso or orhinjik ofa arme kuvasahandan Avui Wasilakan hari ri.

Efesus 5:25

Hulaji jirin, jir avak nokopji jihin wapnuku jihik ji owehe lirin armek ji uka. Os Krais sios orhin wapnuku orhik or owehe sioshi farniyik or sihi miandok or hari hom.

Filipai 1:21

Wavu anhik a hishiwa karem. Os a ha nahi ambu, amu rupshinduwa. Mberem ushiwak? Os a ha nahi ambu, lerawu Kraishin er a lakwa nir. Hako os a ha nahi, a rupshi mendekwa nir. Mberem ushiwak? Or nga nakrem hevenik shi likwa shir.

Filipai 4:13

Kwambu os Krais anin or hahanda oso anin si jelyashihindak mbele mbele amber hom a undahi nir.

Kolosi 1:27

Avui Wasilaka jir Judama ambu jir nga mashi os wanyindari oso kormbak or mukushinak ji heyekmba hishiri ri. Ushinak orhi ma ondo erem arme mendek jirin or uri oson li heyekrahakorokmbahan.

1 Tesalonaika 1:10

Uhu Jikisi Avui Wasilakahi hevenin or halaha indik or takwan ji nikishinda nombo oso er nga limu haisau handasawe induwa. Or angop jirin or jivinashihinda osik, waplelena Avui Wasilakahi mbeek jihik nakwa ambu sir, avak jip likwa jir, karem ji hishihi jimu nikishinduwa. Jikisi or harik Avui Wasilaka indik or mbarik usahari oto Jisas oria.

1 Tesalonaika 5:10

Jisas nirnjik hari ri. Uhunda osik os ni liwa mo ni hawa, avak or nga ermba ermbak ni likwa nir.

Taitus 2:14

Nir ma misambik fehe amber hom ni hakurik ni nari nir. Hako Krais nihi farniyik or sihi miandok hari ri. Uhu nirin jivinari ri. Karem or uhu kavakava nihin or yoko ermbeshinak orhi krahak ni nakmbahan. Uhu os or mbahanda hom ni naha mbele mbele jivi os or mbahandan ermba ermbak ni ukmbahan.

Hibru 8:3

Hetpris misambik fehe ondo lerawu lihi karem, ma misambik fehe kavakava os li undarin laha ermbekurik mbele mbele akwa fle avi ondon li laha Avui Wasilakan ofan undari lir. Erem li undari osik Jisas er nga ofan uri ri. Maome orhin fleya hom kavakava os ni undarinjik ofan uri ri.

1 Pita 1:8

Jir mbeek or omen heyenda ambu jir, hako orin wapnuku jihik jimu owenduwa. Ter orin heyewa ambu jir. Hako orin ji hishindiyaha kumbanukuk ji sihi orin jimu rupshi mendenduwa. Os ji rupshinda oso, warje mende nga nanda sir, mberem ji mbandahi ambu.

1 Jon 1:7

Hako os or hom harandak ni yanda nahi, os nimu ma ol harandak yanda nga wavu namtaskop nimu hishinduwa. Ushiwak jikisi orhi Jisas Krais fi orhi osmu kavakava ol ni unda amber hom yoko ermbenduwa.

1 Jon 4:14

Nir angop ni heyeri osa, Jikisi orhin or mbashirik misambi torok or takaha hulaima nokopma kavakavan undarin or jivinarin. Oson angop ni heyeri osik mashi kason os nimu jirin sawenduwa.

1 Jon 5:20

Angop ni heyenda sir, Avui Wasilaka jikisi orhi, Jisas, misambik or taha wapjip hishiyarindan nirin or hashihindak Avui Wasilakan armek nimu heyekrahakoronduwa. Uhu or nga jikisi orhi Jisas Krais nga nakrem nimu linduwa. Krais God indinga ria. Uhu ermba ermbak linda oso tontlo orhik nanda sira.

Revelesen 1:5

Jisas Krais Avui Wasilakahi mashi omendinga nom sawendari ri, mbeek mbafirimbandari ambu ri. Ma ol mas hahandari lal mbeek indik usahari ambu lir, wahau. Hako Jisas ortonom or haha maifu mendek usahari ri. Uhu malakama amber misambi torok fehenda lihi malakama ria. Halanak waprupshi orhi nga waphimbiji orhi nga jihik si naka. Jisas nirin or rupshi mendehe nirnjik hari ria. Fi orhik kavakava nihin or yokoshihindak orhi samban ni tlehe Avui Wasilakahi krahak nimu sinduwa.

Revelesen 3:20

Misi, akayangak a sihi namu ushanduwa. Os ma lar mashi anhin or misi nahi, akayangan or sutlashinak a ihi layika. Uhu or nga nakrem shi aka.