Revelesin 11:12 - Pijin Deuterocanon

¹² Den tufala profet ya i herem wanfala voes from heven, wea hemi singaot olsem, “!Yutufala kam antap long hia!” Nao taem olketa enemi blong tufala gohed fo luk falom tufala, tufala goap nao long heven insaet long wanfala klaod.

Pijin Bible

¹² Den tufala profet ya i herem wanfala voes from heven, wea hemi singaot olsem, “!Yutufala kam antap long hia!” Nao taem olketa enemi blong tufala gohed fo luk falom tufala, tufala goap nao long heven insaet long wanfala klaod.

Revelesin 11:12 ပူးပေါင်းရင်းမြစ်များ

2 Kings 2:1

Kolsap long taem Yawe hemi tekem Profet Elaeja go long heven, hemi sendem wanfala strongfala win fo tekem hem. Long datfala taem, Profet Elaeja an Profet Elaesa, tufala lusim Gilgal, an tufala gohed fo wakabaot.

2 Kings 2:11

Tufala gohed fo wakabaot an toktok. Den wanfala faea hemi kam wea hemi luk olsem kaat fo faet wea olketa hos i pulum. Hemi gopas long midol long tufala, an semtaem nomoa, strongfala win i kam tekem Profet Elaeja goap long heven.

2 Kings 2:5

Long Jeriko tu, wanfala seksin blong olketa profet i stap long hem. Olketa kam lukim Profet Elaesa, an olketa tok long hem olsem, “?Yu save dat Yawe bae hemi tekem masta blong yu from yu tude?” An hemi sei, “Ya, mi save, bat yufala no tokabaotem.”

2 Kings 2:7

Fiftifala profet i gohed fo falom tufala. Tufala stap long saet long riva, an olketa profet ya i stanap farawe lelebet.

Sams 112:10

Bat taem olketa nogud pipol i lukim wei blong gudfala man ya, olketa kros tumas. Olketa heitem man ya, so olketa lus nao. Ya, wanem olketa nogud pipol i laekem hemi no save kamap gudfala.

Sams 15:1

?Lod Yawe, hu nao hemi fitim fo go insaet long Tambuhaos blong yu? ?Hu nao hemi fitim fo go an wosipim yu long Saeon, disfala tambu maonten blong yu ya?

Sams 24:3

?Hu nao hemi garem raet fo go antap long hil blong Yawe? ?An hu nao hemi fitim fo go insaet long holi ples blong hem ya?

Sams 86:17

Lod Yawe, plis yu somaot long mi dat yu saet wetem mi. Sapos olsem, taem yu helpem mi, an yu strongim tingting blong mi, olketa hu i heitem mi bae i barava sem fogud. (Singsing blong laen blong Kora.)

Eksodas 14:25

Hemi mekem wea olketa wil blong olketa kaat fo faet i pas so olketa no save muv kuiktaem. Olketa tok olsem, “!Yawe nao hemi gohed fo faet long saet blong olketa! !Dastawe yumi pas olsem! !Yumi mas ranawe from olketa blong Israel!”

Aesaea 14:13

Yu tok long yu seleva olsem, ‘!Bae mi goap long heven! Bae mi stanemap tron blong mi antap go long olketa sta blong God. An bae mi sidaon long tron ya, antap long tambu maonten wea olketa narafala god i kam tugeta long hem.

Aesaea 40:31

Bat olketa hu i trastem Yawe, bae i kamap strong moa. Ya, bae olketa i strong olsem igol. Bae olketa save ran, bat no save taet. An bae olketa save wakabaot go farawe, bat no save kamap wik.

Aesaea 60:8

Olketa kam kuiktaem long olketa sip, olsem olketa klaod wea win hemi gohed fo bloum kam, an olketa kam olsem olketa kurukuru wea i flae kambaek long nest blong olketa.

Malakae 3:18

An long datfala taem, bae yufala luksave wea olketa stretfala pipol hu i obeim mi i barava deferen from olketa nogud pipol hu i nating obeim mi.? Hem nao toktok blong Yawe hu hemi garem evri paoa.

Gudnius abaotem Jisas Kraes wea Luk hemi raetem 16:23

Nao ris man ya hemi barava safa tumas wea hemi stap long ples blong olketa man wea i dae finis. An taem hemi luk goap, hemi lukim Ebraham wea hemi stap farawe tumas, an hemi lukim Lasaros tu hemi stap long saet long hem.

Aposol 1:9

Nao bihaen hemi tok finis olsem, olketa lukim dat God hemi mekem Jisas fo goap long skae, go-go hemi lus long wanfala klaod an olketa no save lukim hem moa.

1 Tesalonaeka 4:17

Bihaen, yumi wea yumi laef yet long datfala taem, bae God hemi tekem yumi goap long olketa klaod wetem olketa pipol ya. An bae yumi mitim Masta blong yumi long skae, an yumi save stap wetem hem olowe nao.

Revelesin 12:5

Nao woman ya hemi bonem wanfala pikinini boe, wea bae hemi rul ovarem evri kantri long wol, an bae hemi strik tumas taem hemi rulim olketa. Bat taem pikinini ya hemi jes bon kam, olketa tekem hem goap long God hu hemi sidaon long tron.

Revelesin 3:21

Man wea hemi winim faet, bae mi mekem hem fo sidaon fo rul wetem mi, bikos mi winim faet finis an mi gohed fo rul wetem Dadi blong mi.

Revelesin 4:1

Bihaen long olketa samting ya, mi lukim moa wanfala doa long heven hemi open. Nao disfala toktok wea hemi tok kam long mi fastaem an hemi here olsem wanfala trampet, hemi talem mi olsem moa, “Yu kamap long hia, an bae mi som yu olketa samting wea bae olketa mas hapen.”